પૈપ્પલાદ-સંહિતા · અધ્યાય 8.9

બ્રહ્મજ્યેષ્ઠા સંભૃતા વીર્યાણિ
બ્રહ્માગ્રે જ્યેષ્ઠં દિવમ્ આ તતાન ।
ભૂતાનાં બ્રહ્મ પ્રથમોત જજ્ઞે
તેનાર્હતિ બ્રહ્મણા સ્પર્ધિતું કઃ ॥

બ્રહ્મેમે દ્યાવાપૃથિવી
બ્રહ્મેમે સપ્ત સિન્ધવઃ ।
બ્રહ્મેમે સર્વ આદિત્યા
બ્રહ્મ દેવા ઉપાસતે ॥

બ્રહ્મ બ્રાહ્મણો વદતિ
બ્રહ્મ રાત્રી નિ વિશતે ।
સાવિત્રં બ્રહ્મણો જાતં
બ્રહ્મણાગ્નિર્ વિ રોચતે ॥

બ્રહ્મૌષધયો નિ તિષ્ઠન્તિ
બ્રહ્મ વર્ષન્તિ વૃષ્ટયઃ ।
બ્રહ્મેદં સર્વમ્ આત્મન્વદ્
યાવત્ સૂર્યો વિપશ્યતિ ॥

બ્રહ્મ હોતા બ્રહ્મ યજ્ઞો
બ્રહ્મણા સ્વરવો મિતાઃ ।
અધ્વર્યુર્ બ્રહ્મણો જાતો
બ્રહ્મણોત્ તિરતે હવિઃ ॥

બ્રહ્મ સ્રુચો ઘૃતવતીર્
બ્રહ્મણા વેદિર્ ઉદ્યતા ।
બ્રહ્મ યજ્ઞસ્ય તન્તવ
ઋત્વિજો યે હવિષ્કૃતઃ ॥

બ્રહ્મ ઋષભો ભદ્રરેતા
બ્રહ્મ ગાવો હવિષ્કૃતઃ ।
બ્રહ્મ રથસ્ય દેવસ્ય
યજ્ જયાતિ સ્વરઙ્કૃતઃ ॥

બ્રહ્મણા શીરં વહતિ
બ્રહ્મણા યુજ્યતે રથઃ ।
બ્રહ્મણા પુરુષો દ્વિપાન્
ન વ્યથતે ચરન્ ॥

બ્રહ્મણો જાતા ઋષયો
બ્રહ્મણો રાજન્યા ઉત ।
બ્રહ્મેદં બ્રહ્મણો જાતં
બ્રહ્મણો +ઽવિષ્યા અન્નમ્ ॥

બ્રહ્મ શૂદ્રા રાજન્યાનાં
બ્રહ્મૈષામ્ ઉત વિક્ષદઃ ।
બ્રહ્મૈષાં ભદ્રં સાદનં
બ્રહ્મણૈષાં સભાસદઃ ॥

બ્રહ્મ દાશા બ્રહ્મ દાસા
બ્રહ્મેમે કિતવા ઉત ।
સ્ત્રીપુંસૌ બ્રહ્મણો જાતૌ
સ્ત્રિયો બ્રહ્મ ઉત વાવન ॥

બ્રહ્મોદ્વતો નિવતો બ્રહ્મ સંવતો
વાનસ્પત્યાઃ પર્વતા બ્રહ્મ વીરુધઃ ।
બ્રહ્મેદં સર્વમ્ અન્વ્ આ તતાન-
-અન્તરા દ્યાવાપૃથિવી ઉભે ॥

બ્રહ્મૈવાભૂદ્ ઉત્તરં જાતવેદો
રદ્વજ્રો યાતુધાનં મહાલમ્ ।
ભવાશર્વૌ તપુષીં હેતિમ્ અસ્મૈ
મયેષિતૌ વિ સૃજતાં વધાય ॥