પૈપ્પલાદ-સંહિતા · અધ્યાય 8.7

મોક્ષેજાંસ્ તોદાંસ્ તુમલાન્
પથિષ્ઠાઁ ઉત પાર્ષતાન્ ।
અહીનાં સર્વેષાં વિષમ્
અરસં કૃણ્વ્ ઓષધે ॥

અશ્વક્રન્દસ્ય વણ્ડસ્ય
પૃદાકોર્ ગોનસેર્ ઉત ।
શ્વિત્રાણાં સર્વેષાં વિષમ્
અરસં કૃણ્વ્ ઓષધે ॥

દ્યાંપાતસ્ય ગવકસ્ય
ગોધાપૃષ્ઠેર્ અહેર્ ઉત ।
અસિતાનામ્ એતજ્ જાતમ્
અરિષ્ટે ઽરસં કૃધિ ॥

એતજ્ જાતં સ્વજાનાં
તદ્ બભ્રો અરસં કૃધિ ।
સર્વસ્ય બભ્રોર્ ભેષજ્ય્
અસીહ વિષદૂષણી ॥

ત્રાયમાણા પ્ર બ્રવીતુ
સર્વાઙ્ રાજ્ઞો અહીનામ્ ।
તિરશ્ચિરાજીન્ અસિતાન્
અથો ઉપશયાશ્ ચ યે ॥

સહસાહં યાતુધાનાન્
સહસા યાતુધાન્યઃ ।
સહો વઃ સર્વાન્ સાસાહ
તસ્યાહં નામ જગ્રભ ॥

સહઃ સાકં પૈદ્વેન-
-ઉગ્રેણ વચસા મમ ।
અન્ધાહીંશ્ ચ સૃજયાશ્ ચ
શફકાંશ્ ચ રથવ્રયઃ ।
સહસા સહ ઉત્પત્ય
તાન્ સર્વાઁ અરસાઁ અકઃ ॥

અસિતસ્ય વિદ્રધસ્ય
હરિતો યશ્ ચ વિદ્રધઃ ।
નિમઙ્ક્ષી વિદ્રધાનાં યો
મૃજન્તી તાઁ અજીજભત્ ॥

યઃ સ્વજાનાં નીલગ્રીવો
યઃ સ્વજાનાં હરિર્ ઉત ।
કલ્માષપુચ્છમ્ ઓષધે
જમ્ભયાસ્ય્ અરુન્ધતિ ॥

માયં મરદ્ અહિદષ્ટઃ
પિતુર્ અસ્મા અસદ્ વિષમ્ ।
ઇમા હ્ય્ અસ્મા ઓષધિમ્
આ હરામ્ય્ અરુન્ધતીમ્ ॥

એતજ્ જાતં પૃદાકૂનામ્
અરસં જીવલે કૃધિ ।
ઇન્દ્રસ્ય ભદ્રિકા વીરુદ્
અસીહ વિષદૂષણી ॥