પૈપ્પલાદ-સંહિતા · અધ્યાય 8.2

વૃષા મે રવો નભસા ન તન્યતુર્
ઉગ્રેણ તં વચસા બાધ ઇદ્ ઉ તે ।
અહં તમ્ અસ્ય ગ્રભિર્ અગ્રભં રસં
જ્યોતિષેવ તમસ ઉદ્ એતિ સૂર્યઃ ॥

યત્ તે ઽપોદકં વિષં
તત્ ત આત્ તાભિર્ અગ્રભમ્ ।
ગૃહ્ણામિ મધ્યમ્ ઉત્તમમ્
ઉતાવમં ભિયસા નેશદ્ આદ્ ઉ તે ॥

બલેન તે બલં હન્મિ
તન્વા હન્મિ તે તનુમ્ ।
વિષેણ હન્મિ તે વિષમ્
અહે મૃષીષ્ઠા મા જીવીઃ
પ્રત્યગ્ અભ્ય્ એતુ ત્વા વિષમ્ ॥

અસિતસ્ય તૈમાતસ્ય
બભ્રોર્ અપોદકસ્ય ચ ।
સાત્રાસાહસ્ય મન્યોર્ જ્યામ્
ઉગ્રસ્યેવ ધન્વનો
વિ મુઞ્ચામિ રથાઁ ઇવ ॥

કૈલાત પૃશ્ન ઉપતૃણ્ય બભ્રવ્
આ મે શૃણુતાસિતા અલીકાઃ ।
મા નઃ સખ્યુઃ કામમ્ અપિ ષ્ઠાદ્
આશ્રાવયાદ્ધો વીર્ષે રમધ્વમ્ ॥

આલિકિ ચ વિલિ પિતા
યસ્ તે માતા ચ ।
વિદ્મ તે વિશ્વતો બન્ધુમ્
અરસ કિં કરિષ્યસિ ॥

ઉરુગૂલાયા દુહિતા
જાતા દાસ્ય્ અસિક્ન્યાઃ ।
પ્રતઙ્કં દદ્રુષી નુ
સાહીન્ અરસાઁ અકઃ ॥

કર્ણા શ્વાવિદ્ અબ્રવીદ્
ગિરેર્ અવચરન્તિકા ।
યાઃ કાશ્ ચેમાઃ ખનિત્રિમાસ્
તાસામ્ અરસતમં વિષમ્ ॥

તાબુવં ન તાબુવં
ન ઘેદ્ અસિ ત્વં તાબુવમ્ ।
તાબુવેનારસં વિષમ્ ॥

તસ્તુવં ન તસ્તુવં
ન ઘેદ્ અસિ ત્વં તસ્તુવમ્ ।
તસ્તુવેનારસં વિષમ્ ॥

અરસં તે ઽહે વિષમ્
ઇયં કૃણોત્વ્ ઓષધિઃ ।
ત્રાયમાણા સહમાના સહસ્વતી
સહાતા ઇદ્ ગોર્ અશ્વાત્ પુરુષાદ્ વિષમ્ ॥