પૈપ્પલાદ-સંહિતા · અધ્યાય 8.1

કથા દિવે અસુરાય બ્રવામ
કથા પિત્રે હરયે ત્વેષનૃમ્ણઃ ।
પૃશ્નિં વરુણ દક્ષિણાં દદાવાન્
પુનર્મઘ ત્વં મનસાચિકિત્સીઃ ॥

ન કામેન પુનર્મઘો ભવામિ
સંપૃચ્ય કં પૃશ્નિમ્ એતામ્ ઉપાજે ।
કેન મત્ ત્વમ્ અથર્વન્ કાવ્યેન
કેન જાતેનાસિ જાતવેદાઃ ॥

સત્યમ્ અહં ગભીરઃ કાવ્યેન
સત્યં જાતેનાસ્મિ જાતવેદાઃ ।
ન મે દાસો નાર્યો મહિત્વં
વ્રતં મીમાય યદ્ અહં ધરિષ્યે ॥

ન ત્વદ્ અન્યઃ કવિતરો ન વેધા
ન ધીરતરો વરુણ સ્વધાવઃ ।
ત્વમ્ અઙ્ગ વિશ્વા જનિમાનિ વેત્થ
સ ચિન્ નુ ત્વજ્ જનો માયી બિભાય ॥

ત્વં હ્ય્ અઙ્ગ વરુણ સ્વધાવો
વિશ્વાનિ વેત્થ જનિમા શર્ધનીતે ।
કિમ્ એના રજસઃ પરો ઽસ્તિ
કિમ્ અવરેણાવરમ્ અમુર ॥

એકમ્ એના રજસઃ પરો ઽસ્તિ
પર એકેન દુર્દાશં ચિદ્ અન્યત્ ।
તત્ તે વિદ્વાન્ વરુણ પ્ર બ્રવીમ્ય્
અધોવચસઃ પણયો ભવન્તુ
નીચૈર્ દાસા ઉપ સર્પન્તુ રિપ્રાઃ ॥

ત્વં હ્ય્ અઙ્ગ વરુણ પ્ર બ્રવીષિ
પુનર્મઘેષ્વ્ અવદ્યાનિ ભૂરિ ।
મો ષુ પણ્ય્ અભ્ય્ એતાવતા ભૂર્
મા ત્વા વોચન્ન્ અરાધસં જનાસઃ ॥

મા મા વોચન્ન્ અરાધસં જનાસઃ
પુનસ્ તે પૃશ્નિં જરિતર્ દદામિ ।
સ્તોત્રં મે વિશ્વમ્ આ યાહિ જનેષ્વ્
અન્તર્ દેવેષુ માનુષેષુ વિપ્ર ॥

આ તે સ્તોત્રાણિ વર્ધનાનિ યામિ
દેહિ તન્ મહ્યં યદ્ અદત્તમ્ અસ્તિ ।
યુજ્યો નઃ સપ્તપદઃ સખાસિ
સમા નૌ બન્ધુર્ વરુણઃ સમા જા ॥

વેદ વૈ તદ્ યન્ નૌ સમા જા
દદામિ તુભ્યં યદ્ અદત્તમ્ અસ્તિ ।
દેવો દેવાય ગૃણતે વયોધા
વિપ્રો વિપ્રાય સ્તુવતે સુમેધાઃ ॥

અજીજનો હિ વરુણ સ્વધાવન્ન્
અથર્વાણં પિતરં વિશ્વદેવમ્ ।
તસ્મા ઉર્વ્ આયુષ્ કૃણુહિ પ્રશસ્તં
સખા નો ઽસિ પરમશ્ ચ બન્ધુઃ ॥