પૈપ્પલાદ-સંહિતા · અધ્યાય 8.3

યદ્ આઞ્જનં ત્રૈકકુદં
જાતં હિમવતસ્ પરિ ।
યાતૂંશ્ ચ સર્વાન્ જમ્ભયા
સર્વાશ્ ચ યાતુધાન્યઃ ॥

ઉતેવાસિ પરિપાણં
યાતુજમ્ભનમ્ આઞ્જન ।
ઉતામૃતત્વસ્યેશિષ
ઉતાસિ પિતુભોજનમ્ ॥

પરિપાણં પુરુષાણાં
પરિપાણં ગવામ્ અસિ ।
અશ્વાનામ્ અર્વતામ્ ઇત્
પરિપાણાય તસ્થિષે ॥

પરિ માં પરિ ણઃ પ્રિયં
પરિ ણઃ પાહિ યદ્ ધનમ્ ।
અરાતિર્ ઇન્ નો મા તારીન્
મા ચ નઃ કિં ચનામમત્ ॥

ન તં પ્રાપ્નોતિ શપથો
ન કૃત્યા નાભિશોચનમ્ ।
નૈનં વિષ્કન્ધમ્ અશ્નુતે
યસ્ ત્વા બિભર્ત્ય્ આઞ્જન ॥

આસન્ મન્ત્ર્યાદ્ દુષ્વપ્ન્યાત્
ક્ષેત્રિયાચ્ છપથાદ્ ઉત ।
દુર્હાર્દશ્ ચક્ષુષો ઘોરાત્
તસ્માન્ નઃ પાહ્ય્ આઞ્જન ॥

ત્રયો દાસા આઞ્જનસ્ય
તક્મા બલાસ આદ્ અહિઃ ।
વર્ષિષ્ઠઃ પર્વતાનાં
ત્રિકકુન્ નામ તે પિતા ॥

વૃત્રસ્યાસિ કનીનિકા
પર્વતસ્યાસ્ય્ અક્ષ્યૌ ।
દેવેભિઃ સર્વૈઃ પ્રોક્તં
પરિધિર્ નામ વા અસિ ॥

વૈદો હ વેદ તે નામ
ગન્ધર્વઃ પરિવાચનમ્ ।
યત આઞ્જન પ્રજાયસે
તત એહ્ય્ અરિષ્ટતાતયે ॥

યદિ વાસિ ત્રૈકકુદં
યદિ યામુનમ્ ઉચ્યસે ।
ઉભે તે ભદ્રે નામ્ની
તાભ્યાં નઃ પાહ્ય્ આઞ્જન ॥

યસ્યાઞ્જન પ્રસર્પસ્ય્
અઙ્ગમઙ્ગં પરુષ્પરુઃ ।
તસ્માદ્ યક્ષ્મં વિ બાધસ્વ-
-ઉગ્રો મધ્યમશીર્ ઇવ ॥

નૈનં ઘ્નન્તિ પર્યાયિણો
ન સન્નાઁ અવ ગચ્છતિ ।
જને સ ન પ્ર મીયતે
યસ્ ત્વા બિભર્ત્ય્ આઞ્જન ॥

ઇદં વિદ્વાન્ આઞ્જન
સત્યં વક્ષ્યામિ નાનૃતમ્ ।
સનેયમ્ અશ્વં ગાં વાસ
આત્માનં તવ પૂરુષ ॥