પૈપ્પલાદ-સંહિતા · અધ્યાય 8.19

આજ્યાદ્ અજઃ સમ્ અભવદ્
દેશેભ્ય ઓદના ઇમે ।
તાન્ અપશ્યદ્ બૃહસ્પતિઃ
સ વૈ પઞ્ચૌદનો ઽભવત્ ॥

ચતુર્ધૈતાં સમ્ અભર
ઓદનાંસ્ ત્વં બૃહસ્પતે ।
અજ આજ્યાજ્ જાતઃ
સ એષાં પઞ્ચમો ઽભવત્ ॥

ધૂમેન દિવમ્ આપ્નોત્ય્
અન્તરિક્ષમ્ ઉતોષ્મણા ।
દિશ આપ્નોતિ ચક્ષુષા
અજઃ પઞ્ચૌદનઃ સવઃ ॥

યા તે માતા યસ્ તે પિતા
ભ્રાતરો યે ચ તે સ્વાઃ ।
અજં પઞ્ચૌદનં પક્ત્વા
સર્વે તમ્ ઉપ જીવત ॥

યે તે પૂર્વે પરાગતા
અપરે પિતરશ્ ચ યે ।
તેભ્યો ઘૃતસ્ય કુલ્યૈતુ
શતધારા વ્યુન્દતી ॥

યે સર્વદા દદતિ
યે વા પચન્ત્ય્ ઓદનમ્ ।
તે વૈ યમસ્ય રાજ્યાદ્
ઉત્તરે લોક આસતે ॥

નાતિરાત્ર આપ્નોતિ
નૈનમ્ આપ્નોત્ય્ ઉક્થ્યઃ ।
નાગ્નિષ્ટોમ આપ્નોત્ય્
અજં પઞ્ચૌદનં સવમ્ ॥

દશરાત્રેણ સંમિતો
દ્વાદશાહેન કલ્પતે ।
દીર્ઘસત્ત્રેણ સંમિતો
ઽજઃ પઞ્ચૌદનઃ સવઃ ॥

તેષાં બર્હિષ્યં સર્વં
યન્ નષ્ટં યચ્ ચ મ્રિયતે ।
યચ્ ચ સ્તેનો ઽપાજતિ
યેષાં પઞ્ચૌદનઃ સવઃ ॥

યા પૂર્વપતિં વિત્ત્વા-
-અથાન્યં વિન્દતે ઽપરમ્ ।
પઞ્ચૌદનં ચ તાવ્ અજં
પચતો ન વિ યોષતઃ ॥

સમાનલોકો ભવતિ
પુનર્ભુવાપરઃ પતિઃ ।
અજં પઞ્ચૌદનં
દક્ષિણાજ્યોતિષં દદત્ ॥