પૈપ્પલાદ-સંહિતા · અધ્યાય 8.14

દ્વે વિરૂપે ચરતઃ સ્વર્થે
અન્યાન્યા વત્સમ્ ઉપ ધાપયેતે ।
હરિર્ અન્યસ્યાં ભવતિ સ્વધાવાઞ્
છુક્રો અન્યસ્યાં દદૃશે સુવર્ચાઃ ॥

દશેમં ત્વષ્ટુર્ જનયન્ત ગર્ભમ્
અતન્દ્રાસો યુવતયો વિભૃત્રમ્ ।
તિગ્માનીકં સ્વયશસં જનેષુ
વિરોચમાનં પરિ ષીં નયન્તિ ॥

ત્રીણી જાનાત્ પ્રતિ ભૂષન્ત્ય્ અસ્ય
સમુદ્ર એકં દિવ્ય્ એકમ્ અપ્સુ ।
પૂર્વામ્ અનુ પ્ર દિશં પાર્થિવાનામ્
ઋતૂન્ પ્રશાસદ્ વિ દધાવ્ અનુષ્ઠુ ॥

ક ઇમં વો નિણ્યમ્ આ ચિકેત
વત્સો માતૄર્ જનયત સ્વધાભિઃ ।
બહ્વીનાં ગર્ભો અપસામ્ ઉપસ્થાન્
મહાન્ કવિર્ નિશ્ ચરતિ સ્વધાવાન્ ॥

આવિષ્ટ્યો વર્ધતે ચારુર્ આસુ
જિહ્માનામ્ ઊર્ધ્વઃ સ્વયસામ્ ઉપસ્થે ।
ઉભે ત્વષ્ટુર્ બિભ્યતુર્ જાયમાનાત્
પ્રતીચી સિંહં પ્રતિ જોષયેતે ॥

ઉભે ભદ્રે જોષયેતે ન મેને
ગાવો ન વાશ્રા ઉપ તસ્થુર્ એવૈઃ ।
સ દક્ષાણાં દક્ષપતિર્ બભૂવ-
- અઞ્જન્તિ યં દક્ષિણતો હવિર્ભિઃ ॥

ઉદ્ યંયમીતિ સવિતેવ બાહૂ
ઉભે સિચૌ યતતે ભીમ ઋઞ્જન્ ।
ઉચ્ છુક્રમ્ અત્કમ્ અજતે સિમસ્માન્
નવા માતૃભ્યો વસના જહાતિ ॥

ત્વેષં રૂપં કૃણુત ઉત્તરં યત્
સંપૃઞ્ચાનઃ સદનં ગોભિર્ અદ્ભિઃ ।
કવિર્ બુધ્નં પરિ મર્મૃજ્યતે ધીઃ
સા દેવતાતા સમિતિર્ બભૂવ ॥

ઉરુ તે જ્રયઃ પર્ય્ એતિ બુધ્નં
વિરોચમાનં મહિષસ્ય ધામ ।
વિશ્વેભિર્ અગ્ને સ્વયશોભિર્ ઇદ્ધો
ઽદબ્ધેભિઃ પાયુભિઃ પાહ્ય્ અસ્માન્ ॥

ધન્વં સ્રોતઃ કૃણુતે ગાતુમ્ ઊર્મિં
શુક્રૈર્ ઊર્મિભિર્ અભિ નક્ષતિ ક્ષામ્ ।
વિશ્વા સનાનિ જઠરેષુ ધત્તે
ઽન્તર્ નવાસુ ચરતિ પ્રસૂષુ ॥

એવા નો અગ્ને સમિધા વૃધાનો
રેવત્ પાવક શ્રવસા વિ ભાહિ ।
તન્ નો મિત્રો વરુણો મામહન્તામ્
અદિતિઃ સિન્ધુઃ પૃથિવી ઉત દ્યૌઃ ॥