પૈપ્પલાદ-સંહિતા · અધ્યાય 8.13

સમુદ્રાદ્ ઊર્મિર્ મધુમાઁ ઉદ્ આરદ્
ઉપાંશુના સમ્ અમૃતત્વમ્ આનટ્ ।
ઘૃતસ્ય નામ ગુહ્યં યદ્ અસ્તિ
જિહ્વા દેવાનામ્ અમૃતસ્ય નાભિઃ ॥

વયં નામ પ્ર બ્રવામા ઘૃતસ્ય-
-અસ્મિન્ યજ્ઞે ધારયામા નમોભિઃ ।
ઉપ બ્રહ્મા શૃણવચ્ છસ્યમાનં
ચતુઃશૃઙ્ગો ઽવમીદ્ ગૌર એતત્ ॥

ચત્વારિ શૃઙ્ગા ત્રયો અસ્ય પાદા
દ્વે શીર્ષે સપ્ત હસ્તાસો અસ્ય ।
ત્રિધા બદ્ધો વૃષભો રોરવીતિ
મહો દેવો મર્ત્યાઁ આ વિવેશ ॥

ત્રિધા હિતં પણિભિર્ ગુહ્યમાનં
ગવિ દેવાસો ઘૃતમ્ અન્વ્ અવિન્દન્ ।
ઇન્દ્ર એકં સૂર્ય એકં જજાન
વેનાદ્ એકં સ્વધયા નિષ્ ટતક્ષુઃ ॥

એતા અર્ષન્તિ હૃદ્યાત્ સમુદ્રાચ્
છતવ્રજા રિપુણા નાવચક્ષે ।
ઘૃતસ્ય ધારા અભિ ચાકશીમિ
હિરણ્યયો વેતસો મધ્ય આસામ્ ॥

સમ્યક્ સ્રવન્તિ સરિતો ન ધેના
અન્તર્ હૃદા મનસા પૂયમાનાઃ ।
એતે અર્ષન્ત્ય્ ઊર્મયો ઘૃતસ્ય
મૃગા ઇવ ક્ષિપણોર્ ઈષમાણાઃ ॥

સિન્ધોર્ ઇવ પ્રાધ્વને શૂઘનાસો
વાતઃ પ્રમીયઃ પતયન્તિ યહ્વાઃ ।
ઘૃતસ્ય ધારા અરુષો ન વાજી
કાષ્ઠા ભિન્દન્ન્ ઊર્મિભિઃ પિન્વમાનઃ ॥

અભિ પ્રવન્ત સમનેવ યોષાઃ
કલ્યાણ્યઃ સ્મયમાનાસો અગ્નિમ્ ।
ઘૃતસ્ય ધારાઃ સમિધો નસન્ત
તા જુષાણો હર્યતિ જાતવેદાઃ ॥

કન્યા ઇવ વહતુમ્ એતવા ઉ
અઞ્જ્ય્ અઞ્જાના અભિ ચાકશીમિ ।
યત્ર સોમઃ સૂયતે યત્ર યજ્ઞો
ઘૃતસ્ય ધારા અભિ તત્ પવન્તે ॥

અભ્ય્ અર્ષત સુષ્ટુતિં ગવ્યમ્ આજીમ્
અસ્માસુ ભદ્રા દ્રવિણાનિ ધત્ત ।
ઇમં યજ્ઞં નયત દેવતા નો
ઘૃતસ્ય ધારા મધુમત્ પવન્તે ॥

ધામન્ તે વિશ્વં ભુવનમ્ અધિ શ્રિતમ્
અન્તઃ સમુદ્રે હૃદ્ય્ અન્તર્ આયુષિ ।
અપામ્ અનીકાત્ સમિથાદ્ ય આભૃતસ્
તમ્ અશ્યામ મધુમન્તં ત ઊર્મિમ્ ॥