પૈપ્પલાદ-સંહિતા · અધ્યાય 7.5

વૈશ્વાનરાદ્ અરોચત
જાતો હિરણ્યયો મણિઃ ।
તમ્ આભરદ્ બૃહસ્પતિઃ
કશ્યપો વીર્યાય કમ્ ॥

બૃહસ્પતિસ્ તમ્ અકૃણોન્
મણિં વૈશ્વાનરં સહઃ ।
સપ્તર્ષયો બલાય કં
સં દધુષ્ ટ્વા વયોધસઃ ॥

વિશ્વે દેવાસ્ ત ઇન્દ્રિયં
સપ્તર્ષયશ્ ચ સં દધુઃ ।
જાતો હિરણ્યયો મણિર્
અગ્નેર્ વૈશ્વાનરાદ્ અધિ ॥

અશ્વત્થો જાતઃ પ્રથમો
ઽગ્નેઃ પ્રિયતમા તનૂઃ ।
વૈશ્વાનરસ્ય સૃષ્ટ્યા
કૃત્યાદૂષિઃ કૃતો મણિઃ ॥

કૃત્યાદૂષિં ત્વાવિદં
કૃત્યાદૂષિં ભરામિ ત્વા ।
કૃત્યાદૂષિં કૃણોમિ ત્વા
કૃત્યાદૂષિં વયોધસમ્ ॥

પતત્રી પક્ષી બલવાન્
કૃત્યાદૂષિઃ સપત્નહા ।
નિતત્નિર્ વિશ્વભેષજ
ઉગ્ર આપતિકો મણિઃ ॥

પતત્રી તે બલાય કં
નિતત્નિર્ ભેષજાય તે ।
જાતો હિરણ્યયો મણિર્
અપ રક્ષાંસિ સેધતુ ॥

દેવો મણિઃ સપત્નહા
રક્ષોહામીવચાતનઃ ।
હિરણ્યયોનિર્ અંશુમાન્
કશ્યપેનાભૃતં સહઃ ॥

વૈશ્વાનરં તેજનમ્ એકમ્ આહુર્
અગ્નેર્ યોનેઃ સહ ચન્દ્રેણ જાતમ્ ।
ગયસ્ફાનઃ પ્રતરણો વયોધાઃ
કૃત્યાદૂષિર્ વલગહાસ્ય્ ઉગ્રઃ ॥

યસ્યેદં ભૂમ્યામ્ અધિ
નિક્રાન્તં પાંસુરે પદમ્ ।
મૃજાનસ્ તન્વો યદ્ રપસ્
તસ્ય સ્નાહિ તનૂ અધિ ॥

દૂષ્યાસ્ ત્વા વધં વયં
દેવસ્ય સવિતુઃ સવે ।
જીવાતવે ભરામસિ
મહ્યા અરિષ્ટતાતયે ॥

આચ્છેદનઃ પ્રચ્છેદનો
દ્વિષતસ્ તપનો મણિઃ ।
શત્રુઞ્જયઃ સપત્નહા
દ્વિષન્તમ્ અપ બાધતામ્ ॥