પૈપ્પલાદ-સંહિતા · અધ્યાય 7.4

ઇન્દ્રસ્ય બાહૂ સ્થવિરૌ વૃષાણૌ
ચિત્રા ઇમા વૃષભૌ પારયિષ્ણૂ ।
તૌ યોક્ષ્યે પ્રથમૌ યોગ આગતે
યાભ્યાં જિતમ્ અસુરાણાં સ્વર્ યત્ ॥

આશુઃ શિશાનો વૃષભો ન ભીમો
ઘનાઘનઃ ક્ષોભણશ્ ચર્ષણીનામ્ ।
સંક્રન્દનો ઽનિમિષ એકવીરઃ
શતં સેના જયતુ સાકમ્ ઇન્દ્રઃ ॥

સંક્રન્દનેનાનિમિષેણ જિષ્ણુના-
-અયોધ્યેન દુશ્ચ્યવનેન ધૃષ્ણુના ।
તદ્ ઇન્દ્રેણ જયત તત્ સહધ્વં
યુધો નર ઇષુહસ્તેન વૃષ્ણા ॥

સ ઇષુહસ્તૈઃ સ નિષઙ્ગિભિર્ વશી
સંસ્રષ્ટા યુધ ઇન્દ્રો ગણેન ।
સંસૃષ્ટજિત્ સોમપા બાહુશર્ધ્ય્
ઊર્ધ્વધન્વા પ્રતિહિતાભિર્ અસ્તાત્ ॥ પ્રપાઠક ॥

બલવિજ્ઞાયઃ સ્થવિરઃ પ્રવીરઃ
સહસ્વાન્ વાજી સહમાન ઉગ્રઃ ।
અભિવીરો અભિષત્વા સહોજિજ્
જૈત્રાયેન્દ્ર રથમ્ આ તિષ્ઠ ગોવિદમ્ ॥

ઇમં વીરમ્ અનુ હર્ષધ્વમ્ ઉગ્રમ્
ઇન્દ્રં સત્વાનો અનુ સં રભધ્વમ્ ।
ગ્રામજિતં ગોજિતં વજ્રબાહું
જયન્તમ્ અજ્મ પ્રમૃણન્તમ્ ઓજસા ॥

અભિ ગોત્રાણિ સહસા ગાહમાનો
અદાય ઉગ્રઃ શતમન્યુર્ ઇન્દ્રઃ ।
દુશ્ચ્યવનઃ પૃતનાષાડ્ અયોધ્યો
અસ્માકં સેના અવતુ પ્ર યુત્સુ ॥

બૃહસ્પતે પરિ દીયા રથેન
રક્ષોહામિત્રાઁ અપબાધમાનઃ ।
પ્રભઞ્જઞ્ છત્રૂન્ પ્રમૃણન્ન્ અમિત્રાન્
અસ્માકમ્ એધ્ય્ અવિતા તનૂનામ્ ॥

ઇન્દ્ર આસાં નેતા બૃહસ્પતિર્
દક્ષિણા યજ્ઞઃ પુર એતુ સોમઃ ।
દેવસેનાનામ્ અભિભઞ્જતીનાં
જયન્તીનાં મરુતો યન્તુ મધ્યે ॥

ઇન્દ્રસ્ય વૃષ્ણો વરુણસ્ય રાજ્ઞ
આદિત્યાનાં મરુતાં શર્ધ ઉગ્રમ્ ।
મહામનસાં ભુવનચ્યવાનાં
ઘોષો દેવાનાં જયતામ્ ઉદ્ અસ્થાત્ ॥

અસ્માકમ્ ઇન્દ્રઃ સમૃતેષુ ધ્વજેષ્વ્
અસ્માકં યા ઇષવસ્ તા જયન્તુ ।
અસ્માકં વીરા ઉત્તરે ભવન્ત્વ્
અસ્માન્ દેવાસો ઽવતા હવેષુ ॥