પૈપ્પલાદ-સંહિતા · અધ્યાય 7.1

સુપર્ણસ્ ત્વાન્વવિન્દત્
સૂકરસ્ ત્વાખનન્ નસા ।
દિપ્સૌષધે ત્વં દિપ્સન્તં
પ્રતિ કૃત્યાકૃતો દહ ॥

પ્રતિ દહ યાતુધાનાન્
પ્રતિ કૃત્યાકૃતો દહ ।
અથો યો અસ્માન્ દિપ્સતિ
તમ્ ઉ ત્વં જહ્ય્ ઓષધે ॥

અગ્ને પૃતનાષાટ્ પૃતનાઃ સહસ્વ ।
પ્રતિ કૃત્યાં કૃત્યાકૃતે
પ્રતિહરણેન હરામસિ ॥

ઇષ્વા ઋજીયઃ પતતુ
દ્યાવાપૃથિવી તત્ સુતાત્ ।
તત્ તં મૃગ ઇવ વિધ્યતુ
કૃત્યા કૃત્યાકૃતં કૃતા ॥

અઘમ્ અસ્ત્વ્ અઘકૃતે
શપથાઃ શપથીવ્ને ।
પ્રત્યક્ પ્રતિ પ્ર હિણ્મસિ
યશ્ ચકાર તમ્ ઋચ્છતુ ॥

યસ્ ત્વા કૃત્ય ઇત્ય્ એકા ॥

પુનઃ કૃત્યાં કૃત્યાકૃતે
હસ્તગૃહ્ય પરા ણય ।
સમક્ષમ્ અસ્મા આ દધ્મો
યથા કૃત્યાકૃતં હનત્ ॥

પુત્ર ઇવ પિતરં ગચ્છ
સ્વજ ઇવાભિષ્ઠિતો દશ ।
તન્તુર્ ઇવાવવ્યયન્ન્ ઇહિ
કૃત્યે કૃત્યાકૃતં કૃતા ॥

ઉદ્ એણીવ વારિણ્ય્
અભિસ્કન્દં મૃગીવ ।
કૃત્યા કર્તારમ્ ઋચ્છતુ ॥

ઋશ્યસ્યેવ પરીશાસં
પરિમાય પરિ ત્વચઃ ।
દુર્હાર્દે ચક્રુષે કૃત્યાં
ગ્રીવાસુ પ્રતિ મુઞ્ચત ॥

યા કૃત્યે દેવકૃતા
યા વા મનુષ્યજા અસિ ।
તાં ત્વા પ્રતિ પ્ર હિણ્મસિ
પ્રતીચીનેન બ્રહ્મણા ॥

યદિ સ્ત્રી યદિ વા પુમાન્
કૃત્યાં ચકાર પાપ્મને ।
તામ્ ઉ તસ્મૈ નયામસ્ય્
અશ્વમ્ ઇવાશ્વાભિધાન્યા ॥