પૈપ્પલાદ-સંહિતા · અધ્યાય 6.11

અનાપ્તા યે વઃ પ્રથમા
યાનિ કર્માણિ ચક્રિરે ।
વીરાન્ નો અત્ર મા દભન્
તદ્ વ એતત્ પુરો દધે ॥

પ્રત્નાન્ માનાત્ પરિ યે સંબભૂવુઃ
શ્લોકવન્તઃ સૌમનસસ્ય વન્તવઃ ।
અપાનક્ષાસો બધિરા અહાસત-
-ઋતસ્ય પન્થાં ન તરન્તિ દુષ્કૃતઃ ॥

સહસ્રધારમ્ અભિ તે સમ્ અસ્વરન્
દિવો નાકે મધુજિહ્વા અસશ્ચતઃ ।
તસ્ય સ્પશો ન નિ મિષન્તિ ભૂર્ણયઃ
પદેપદે પાશિનઃ સન્તુ સેતવે ॥

પર્ય્ ઊ ષુ પ્ર ધન્વા વાજસાતયે
પરિ વૃત્રાણિ સક્ષણિઃ ।
દિવસ્ તદ્ અર્ણવાઁ અન્વ્ ઈયસે
સનિસ્રસો નામાસિ ત્રયોદશો માસઃ ॥

ઇન્દ્રસ્ય ગૃહો ઽસીન્દ્રસ્ય શર્માસીન્દ્રસ્ય વર્માસીન્દ્રસ્ય વરૂથમ્ અસિ ।
વ્ય્ એતેનાવૈતેનાપૈતેનારાત્સીર્ અસૌ સ્વાહા ॥

તિગ્માયુધૌ તિગ્મહેતી સુશેવાવ્
અગ્નીષોમાવ્ ઇહ સુ મૃડતં નઃ ।
મુમુક્તમ્ અસ્માન્ ગૃભીતાન્ અવદ્યાજ્
જુષેથાં યજ્ઞમ્ અમૃતમ્ અસ્માસુ ધત્તં સ્વાહા ॥

ચક્ષુષો હેતે મનસો હેતે બ્રહ્મણો હેતે મેન્યામેનિર્ અસિ ।
અમેનયસ્ તે સન્તુ યે ઽસ્માન્ અભ્યઘાયન્તિ સ્વાહા ॥

યો ઽસ્માઞ્ ચક્ષુષા મનસા
યશ્ ચ વાચાકૂત્યા ચિત્ત્યા બ્રહ્મણાઘાયુર્ અભિદાસાત્ ।
તમ્ અગ્ને ત્વં મેન્યામેનિં કૃણુ સ્વાહા ॥

ઉદ્ આયુર્ ઉત્ કૃતમ્ ઉદ્ બલમ્ ઉન્ મનીષોદ્ ઇન્દ્રિયં
નૃમ્ણમ્ અસ્માસુ ધેહિ સ્વાહા ॥