પૈપ્પલાદ-સંહિતા · અધ્યાય 5.10

ઇયં યા મુસલાહતા
દૃષત્પિષ્ટા વિષાસુતા ।
તપુર્ અગ્નિસ્ તપુર્ દ્યૌસ્
તપુસ્ ત્વં સુરે ભવ ॥

વિષં તે તોક્મ રોહયન્તો ઽબ્રુવન્
વિષં કુમ્ભે ઽવ સ્રવ ।
વિષં ત આમનં સુરે
વિષં ત્વં હસ્ત આહિતા
વિષં પ્રતિહિતા ભવ ॥

સિંહસ્ તે અસ્તુ તણ્ડુલો
વ્યાઘ્રઃ પર્યોદનમ્ ।
પૃદાકૂર્ અસ્તુ નગ્નહુર્
વૃકસ્ય હૃદિ સં સ્રવ ॥

ઇયં યા પાત્ર આસૂતા
શષ્પસ્રક્વા વિઘસ્વરી ।
વરાહમન્યુર્ અજન્ય્
ઉત્તાનપાદમ્ અર્દય ॥

ઉદર્દની પ્રચ્યવની
પાંસુપિઙ્ગા વિઘસ્વરી ।
ઉત્ખાતમન્યુર્ અજનિ
યત્ પશ્ચાત્ તત્ પુરસ્ કૃધિ ॥

વિષં તે પવને સુરે
રુધિરં સ્થાલે અસ્તુ તે ।
મથ્નન્ત્વ્ અન્યો અન્યસ્મા
ઇષુધીંસ્ ત્વદ્ ધનુસ્ ત્વત્ ॥

વિષપાવાનો રુધિરાશ્ ચરન્તિ
પાતારો મર્તાસ્ તવસે સુર ઇમે ।
હતાસો અન્યે યોધયન્ત્ય્ અન્યાંસ્
તમ્ ઇચ્ છંસ મહિમાનં સુરાયાઃ ॥

તાન્ વીરુધો વિસ્રવો બલેન-
-ઉત્ પાતય માદય યોધનાયૈ ।
ભિન્નારત્નીર્ ભિન્નશીર્ષ્ણા સમ્ ઋચ્છતામ્
આર્તચેલો વિસ્રવન્ તે સુરાપઃ ॥

વિષાસુતાં પિબત જર્હૃષાણા
અસ્ના સંસૃષ્ટં રુધિરેણ મિશ્રામ્ ।
છિન્નહસ્તશ્ ચરતિ ગ્રામે અન્તર્
વૈરહત્યાનિ બહુધા પણાયન્ ॥

અસિમતીમ્ ઇષુમતીમ્
ઉન્ નયામિ સતાદ્ અધિ ।
માદયાભિ માદય-
-અહિર્ ઇવૈનાન્ પ્ર રોપય-
-અન્યો ઽન્યસ્ય મોચ્ છિષન્ ॥