પૈપ્પલાદ-સંહિતા · અધ્યાય 4.9

સંવસવ ઇતિ વો નામધેયમ્
ઉગ્રંપશ્યા રાષ્ટ્રભૃતો હ્ય્ અક્ષાઃ ।
તસ્મૈ ત ઇન્દો હવિષા વિધેમ
વયં સ્યામ પતયો રયીણામ્ ॥

ઇદમ્ ઉગ્રાય બભ્રવે
યો ઽક્ષેષુ તનૂવશી ।
ઘૃતેન કલિં શિક્ષાણિ
સ નો મૃડાતીદૃશે ॥

ઘૃતમ્ અગ્ને અપ્સરાભ્યો વહ ત્વં
પાંસૂન્ અક્ષેભ્યઃ સિકતા અપશ્ ચ ।
યથાભગં હવ્યદાતિં જુષાણા
મદન્તુ દેવા ઉભયાનિ હવ્યા ॥

યો નો દેવો ધનમ્ ઇદં દિદેશ
યો અક્ષાણાં ગ્રહણં શેષણં ચ ।
સ નો ઽવતુ હવિર્ ઇદં જુષાણો
ગન્ધર્વૈઃ સધમાદં મદેમ ॥

યા અપ્સરસઃ સધમાદં મદન્ત્ય્
અન્તરા હવિર્ધાનં સૂર્યં ચ ।
તા નો હસ્તૌ કૃતેન સં સૃજન્તુ
સપત્નં નઃ કિતવં રન્ધયન્તુ ॥

યદ્ દેવાન્ નાથિતો હુવે
બ્રહ્મચર્યં યદ્ ઊષિમ ।
અક્ષાન્ યદ્ બભ્રૂન્ આલભે
તે નો મૃડન્ત્વ્ ઈદૃશે ॥

આદિનવમ્ ઇત્ય્ એકા ॥