પૈપ્પલાદ-સંહિતા · અધ્યાય 4.35
મરુતાં મન્વે અધિ મે બ્રુવન્તુ
પ્રેમં વાજં વાજસાતા અવન્તુ ।
આશૂન્ ઇવ સુયમાન્ અહ્વ ઊતયે
તે નો મુઞ્ચન્ત્વ્ અંહસઃ ॥
ઉત્સમ્ અક્ષિતં વ્યચન્તિ યે સદા
યે વા સિઞ્ચન્તિ રસમ્ ઓષધીષુ ।
પુરો દધે મરુતઃ પૃશ્નિમાતૄંસ્
તે નો મુઞ્ચન્ત્વ્ અંહસઃ ॥
પયો ધેનૂનાં રસમ્ ઓષધીનાં
જવમ્ અર્વતાં કવયો ય ઇન્વથ ।
શગ્મા ભવન્તુ મરુતઃ સ્યોનાસ્
તે નો મુઞ્ચન્ત્વ્ અંહસઃ ॥
અપઃ સમુદ્રાદ્ દિવમ્ ઉદ્ વહન્તિ
દિવસ્ પૃથિવીમ્ અભિ યે સૃજન્તિ ।
યે +ઽદ્ભિર્ ઈશાના મરુતશ્ ચરન્તિ
તે નો મુઞ્ચન્ત્વ્ અંહસઃ ॥
યે કીલાલૈસ્ તર્પયન્તિ યે ઘૃતેન
યે વા વયો મેદસા સંસૃજન્તિ ।
ય ઈશાના મરુતો વર્ષયન્તિ
તે નો મુઞ્ચન્ત્વ્ અંહસઃ ॥
યદીદ્ ઇદં મરુતો મારુતેન
યદિ દેવા દૈવ્યેનેદૃગ્ આર ।
યૂયમ્ ઈશિધ્વે વસવસ્ તસ્ય નિષ્કૃતેસ્
તે નો મુઞ્ચન્ત્વ્ અંહસઃ ॥
તિગ્મમ્ અનીકં વિદિતં સહસ્વન્
મારુતં શર્ધઃ પૃતનાસૂગ્રમ્ ।
સ્તૌમિ મરુતો નાથિતો જોહવીમિ
તે નો મુઞ્ચન્ત્વ્ અંહસઃ ॥
મૂળ પાઠ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0