પૈપ્પલાદ-સંહિતા · અધ્યાય 4.33

અગ્નેર્ મન્વે પ્રથમસ્ય પ્રચેતસઃ
પાઞ્ચજન્યસ્ય બહુધા યમ્ ઇન્ધતે ।
વિશોવિશઃ પ્રવિશિવાંસમ્ ઈમહે
સ નો મુઞ્ચત્વ્ અંહસઃ ॥

સુજાતં જાતવેદસમ્
અગ્નિં વૈશ્વાનરં વિભુમ્ ।
હવ્યવાહં હવામહે
સ નો મુઞ્ચત્વ્ અંહસઃ ॥

યથા હવ્યં વહસિ જાતવેદો
યથા યજ્ઞં કલ્પયસિ પ્રજાનન્ ।
એવા દેવેભ્યઃ સુમતિમ્ ઇહા વહ
સ નો મુઞ્ચત્વ્ અંહસઃ ॥

યામન્યામન્ન્ ઉપયુક્તં વહિષ્ઠં
કર્મન્કર્મન્ન્ આભગમ્ ।
અગ્નિમ્ ઈડે રક્ષોહણં
યજ્ઞવૃધં ઘૃતાહુતં
સ નો મુઞ્ચત્વ્ અંહસઃ ॥

યેન ર્ષયો વલમ્ અદ્યોતયન્ યુજા
યેનાસુરાણામ્ અયુવન્ત માયાઃ ।
યેનાગ્નિના પણીન્ ઇન્દ્રો જિગાય
સ નો મુઞ્ચત્વ્ અંહસઃ ॥

યેન દેવા અમૃતમ્ અન્વવિન્દન્
યેનૌષધીર્ મધુમતીર્ અકૃણ્વન્ ।
યેનેદં સ્વર્ આભરન્
સ નો મુઞ્ચત્વ્ અંહસઃ ॥

યસ્યેદં પ્રદિશિ યદ્ વિરોચતે
યજ્ જાતં જનિતવ્યં ચ કેવલમ્ ।
સ્તૌમ્ય્ અગ્નિં નાથિતો જોહવીમિ
સ નો મુઞ્ચત્વ્ અંહસઃ ॥