પૈપ્પલાદ-સંહિતા · અધ્યાય 4.32

યસ્ તે મન્યો ઽવિધદ્ વજ્ર સાયક
સહ ઓજઃ પુષ્યતિ વિશ્વમ્ આનુષક્ ।
સાહ્યામ દાસમ્ આર્યં ત્વયા યુજા
વયં સહસ્કૃતેન સહસા સહીયસા ॥

મન્યુર્ ઇન્દ્રો મન્યુર્ એવાસ દેવો
મન્યુર્ હોતા વરુણો જાતવેદાઃ ।
મન્યુર્ વિશ ઈડતે માનુષીર્ યાઃ
પાહિ નો મન્યો તપસા સજોષાઃ ॥

અભીહિ મન્યો તવસસ્ તવીયાન્
તપસા યુજા વિ જહિ શત્રૂન્ ।
અમિત્રહા વૃત્રહા દસ્યુહા ચ
વિશ્વા વસૂન્ય્ આ ભરા ત્વં નઃ ॥

ત્વં હિ મન્યો અભિભૂત્યોજાઃ
સ્વયમ્ભૂર્ ભામો અભિમાતિષાહઃ ।
વિશ્વચર્ષણિઃ સહુરિઃ સહીયાઁ
અસ્માસ્વ્ ઓજઃ પૃતનાસુ ધેહિ ॥

અભાગઃ સન્ન્ અપ પરેતો અસ્મિ
તવ ક્રત્વા તવિષસ્ય પ્રચેતઃ ।
તં ત્વા મન્યો અક્રતુર્ જિહીડાહં
સ્વા તનૂર્ બલદાવા ન એહિ ॥

અયં તે અસ્મ્ય્ ઉપ ન એહ્ય્ અર્વાઙ્
પ્રતીચીનઃ સહુરે વિશ્વદાવન્ ।
મન્યો વજ્રિન્ન્ ઉપ ન આ વવૃત્સ્વ
હનાવ દસ્યૂંર્ ઉત બોધ્ય્ આપે ॥

અભિ પ્રેહિ દક્ષિણતો ભવા નો
અધા વૃત્રાણિ જઙ્ઘનાવ ભૂરિ ।
જુહોમિ તે ધરુણો મધ્વો અગ્રમ્
ઉભા ઉપાંશુ પ્રથમા પિબેવ ॥