પૈપ્પલાદ-સંહિતા · અધ્યાય 4.22

અહં વા ઇન્દ્રમાતરમ્
ઇન્દ્રૌજામ્ ઇન્દ્રભ્રાતરમ્ ।
ઇન્દ્રાધિવક્ત્રાં વીરુધમ્
આહાર્ષં વિષદૂષણીમ્ ॥

યત્ કિં ચ પદ્વચ્ છફવદ્
યત્ કાણ્ડિ યચ્ ચ પુષ્પવત્ ।
યદ્ એજતિ પ્રજાપતિઃ
સર્વં તદ્ વિષદૂષણમ્ ॥

સિન્ધુઃ પશ્ચાદ્ ધરુણઃ
સૂર્યસ્યોદયનં પુરઃ ।
તતો યદ્ અન્તરા વિષં
તદ્ વાચા દૂષયામસિ ॥

યાવત્ સૂર્યો વિતપતિ
યાવચ્ ચાભિ વિપશ્યતિ ।
તાવદ્ વિષસ્ય દૂષણં
વચો નિર્ મન્ત્રયામહે ॥

જિહ્વા મે મધુસંસ્રાવા
જિહ્વા મે મધુવાદિની ।
જિહ્વે વર્ચસ્વતી ભવ
માયં મે પુરુષો રિષત્ ॥

હા હૈ કલ્યાણિ સુભગે
પૃશ્નિપર્ણ્ય્ અનાતુરે ।
ઇમં મે અદ્ય પૂરુષં
દીર્ઘાયુત્વાયોન્ નય ॥

યાભ્યો વર્ષન્તિ વૃષ્ટયો
યાભિર્ જીવન્ત્ય્ અઘ્ન્યાઃ ।
તા મે વિષસ્ય દૂષણીઃ
સવિતા વ્ય્ અકાશયત્ ॥