પૈપ્પલાદ-સંહિતા · અધ્યાય 4.13
શં નો દેવી પૃશ્નિપર્ણ્ય્
અશં નિરૃતયે કરત્ ।
ઉગ્રા હિ કણ્વજમ્ભની
તાં ત્વાહાર્ષં સહસ્વતીમ્ ॥
સદાન્વાઘ્ની પ્રથમા
પૃશ્નિપર્ણ્ય્ અજાયત ।
તયા કણ્વસ્યાહં શિરશ્
છિનદ્મિ શકુનેર્ ઇવ ॥
ઊર્જભૃતં પ્રાણભૃતં
પ્રજાનામ્ ઉત તર્પણીમ્ ।
સર્વાસ્ તાઃ પૃશ્નિપર્ણી-
-ઇતઃ કણ્વા મા નીનશત્ ॥
સમાકૃત્યૈના નિર્ અજ
તીક્ષ્ણશૃઙ્ગ ઇવ ઋષભઃ ।
અરાયં કણ્વં પાપ્માનં
પૃશ્નિપર્ણિ સહસ્વતિ ॥
ત્વમ્ ઉગ્રે પૃશ્નિપર્ણ્ય્
અગ્નિર્ ઇવ પ્રદહન્ન્ ઇહિ
કણ્વા જીવિતયોપનીઃ ।
ગિરિમ્ એના આ વેશય
તમાંસિ યત્ર ગચ્છાંસ્
તત્ પાપીર્ અપિ પાદય ॥
અરાયમ્ અસૃક્પાવાનં
યશ્ ચ સ્ફાતિં જિહીર્ષતિ ।
ગર્ભાદં કણ્વં નાશય
પૃશ્નિપર્ણિ સહસ્વતિ ॥
યા નો ગા યા નો ગૃહાન્
યા ન સ્ફાતિમ્ ઉપાહરાન્ ।
તા ઉગ્રે પૃશ્નિપર્ણિ ત્વં
કણ્વા મા નીનશ ઇતઃ ॥
મૂળ પાઠ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0