પૈપ્પલાદ-સંહિતા · અધ્યાય 3.38

અજો હ્ય્ અગ્નેર્ અજનિષ્ટ શોકાત્
સો ઽપશ્યજ્ જનિતારમ્ અગ્રે ।
તેન દેવા દેવતામ્ અગ્ર આયન્
તેન રોહાન્ અરોહન્ન્ ઉપ મેધીયાંસઃ ॥

ક્રમધ્વમ્ અગ્નિભિર્ નાકમ્
ઉખ્યાં હસ્તેષુ બિભ્રતઃ ।
દિવસ્ પૃષ્ઠં સ્વર્ ગત્વા
મિશ્રા દેવેભિર્ આધ્વમ્ ॥

અગ્ને પ્રેહિ પ્રથમો દેવયતાં
ચક્ષુર્ દેવાનામ્ ઉત મર્ત્યાનામ્ ।
ઇયક્ષમાણા ભૃગુભિઃ સજોષસઃ
સ્વર્ યન્તુ યજમાનાઃ સ્વસ્તિ ॥

સ્વર્ યન્તો નાપેક્ષન્ત
આ દ્યાં રોહન્તુ રાધસઃ ।
યજ્ઞં યે વિશ્વતોધારં
સુવિદ્વાંસો વિ તેનિરે ॥

ઓદનમ્ અનજ્મિ શવસા ઘૃતેન
દિવ્યં સમુદ્રં પયસં બૃહન્તમ્ ।
તેન ગેષ્મ સુકૃતસ્ય લોકં
સરોરુહાણા અધિ નાકમ્ ઉત્તમમ્ ॥

યૌ તે પક્ષાવ્ અજરૌ પતત્રિણૌ
યાભ્યાં રક્ષાંસ્ય્ અપહંસ્ય્ ઓદન ।
તાભ્યાં પત્યાસ્મ સુકૃતસ્ય લોકં
યત્ર ર્ષયઃ પ્રથમજાઃ પુરાણાઃ ॥

યતસ્ તિષ્ઠો દિવસ્ પૃષ્ઠે
વ્યોમન્ન્ અધ્ય્ ઓદન ।
અન્વાયન્ સત્યધર્માણો
બ્રાહ્મણા રાધસા સહ ॥

પૃષ્ઠાત્ પૃથિવ્યા અહમ્ અન્તરિક્ષમ્ આરુહમ્
અન્તરિક્ષાદ્ દિવમ્ આરુહમ્ ।
દિવો નાકસ્ય પૃષ્ઠાત્ સ્વર્ જ્યોતિર્ અગામ્ અહમ્ ॥

અજો ઽસ્ય્ અજ સ્વર્ગો ઽસિ
ત્વયા લોકમ્ અઙ્ગિરસઃ પ્ર જાનન્ ।
તં લોકમ્ અનુ પ્ર જ્ઞેષ્મ ॥

યેના સહસ્રં વહસિ
યેન વા સર્વવેદસમ્ ।
તેનેમં યજ્ઞં નો વહ
સ્વર્ દેવેષુ ગન્તવે ॥

અજં ચ પચત પઞ્ચ ચૌદનાન્ ।
અજં પઞ્ચૌદનં પક્ત્વા
દેવા લોકાન્ સમ્ આનશુઃ ॥