પૈપ્પલાદ-સંહિતા · અધ્યાય 3.21

ઇમમ્ ઇન્દ્ર વર્ધય ક્ષત્રિયં મ
ઇમં વિશામ્ એકવૃષં કૃણુ ત્વમ્ ।
નિર્ અમિત્રાન્ અક્ષ્ણુહ્ય્ અસ્ય સર્વાંસ્
તાન્ રન્ધયાસ્મા અહમુત્તરેષુ ॥

અયમ્ અસ્તુ ધનપતિર્ ધનાનામ્
અયં વિશાં વિશ્પતિર્ અસ્તુ રાજા ।
અસ્મિન્ન્ ઇન્દ્ર મહિ વર્ચાંસિ ધેહ્ય્
અવર્ચસં કૃણુહિ શત્રુમ્ અસ્ય ॥

એમં ભજ ગ્રામે અશ્વેષુ ગોષુ
નિષ્ટં ભજ યો ઽમિત્રો અસ્ય ।
વર્ષ્મત્ ક્ષત્રાણામ્ અયમ્ અસ્તુ રાજા-
-ઇન્દ્ર શત્રૂં રન્ધય સર્વમ્ અસ્મૈ ॥

અસ્મૈ દ્યાવાપૃથિવી ભૂરિ વામં
સં દુહાતાં ઘર્મદુઘે ઇવ ધેનુમ્ ।
અયં રાજા પ્રિય ઇન્દ્રસ્ય ભૂયાત્
પ્રિયો ગવામ્ ઓષધીનામ્ ઉતાપામ્ ॥

યુનજ્મિ ત ઉત્તરાવન્તમ્ ઇન્દ્રં
યેન જયન્તિ ન પરાજયન્તે ।
યસ્ ત્વા કરદ્ એકવૃષં જનાનામ્
ઉત રાજન્ન્ ઉત્તમં માનવાનામ્ ॥

ઉત્તરસ્ ત્વમ્ અધરે સન્ત્વ્ અન્યે
યે કે ચ રાજન્ પ્રતિશત્રવસ્ તે ।
એકવૃષ ઇન્દ્રસખા જિગીવાં
છત્રૂયતામ્ અભિ તિષ્ઠા મહાંસિ ॥