પૈપ્પલાદ-સંહિતા · અધ્યાય 3.13

આયમ્ અગન્ પર્ણમણિર્
બલી બલેન પ્રમૃણન્ સપત્નાન્ ।
ઓજો દેવાનાં પય ઓષધીનાં
મયિ રાષ્ટ્રં જિન્વત્વ્ અપ્રયુચ્છન્ ॥

મયિ રાષ્ટ્રં પર્ણમણે
મયિ ધારયા શ્રિયમ્ ।
અહં રાષ્ટ્રસ્યાભીવર્ગે
યુજા ભૂયાસમ્ ઉત્તરઃ ॥

યં નિદધુર્ વનસ્પતૌ
વાજં દેવાઃ પ્રિયં નિધિમ્ ।
તં મ ઇન્દ્રઃ સહાયુષા
મણિં દધાતુ ભર્તવે ॥

સોમસ્ય પર્ણઃ સહ ઉગ્રમ્ આગન્ન્
ઇન્દ્રેણ દત્તો વરુણેન સખ્યા ।
તમ્ અહં બિભર્મિ બહુ રોચમાનો
દીર્ઘાયુત્વાય શતશારદાય ॥

આ મા રુક્ષત્ પર્ણમણિર્
મહ્યા અરિષ્ટતાતયે ।
યથાહમ્ ઉત્તરો ઽસાનિ
માનુષ્યા અધિ સમ્પદઃ ॥

પુનર્ મૈત્વ્ ઇન્દ્રિયં
પુનર્ આત્મા દ્રવિણં બ્રાહ્મણં ચ ।
પુનર્ અગ્નયો ધિષ્ણ્યાસો
યથાસ્થામ કલ્પયન્તામ્ ઇહૈવ ॥

યે તક્ષાણો રથકારાઃ
કર્મારા યે મનીષિણઃ ।
સર્વાંસ્ તાન્ પર્ણ રન્ધય-
-ઉપસ્તિં કૃણુ મે જનમ્ ॥

ઉપસ્તિર્ અસ્તુ વૈશ્ય
ઉત શૂદ્ર ઉતાર્યઃ ।
સર્વાંસ્ તાન્ પર્ણ રન્ધય-
-ઉપસ્તિં કૃણુ મે જનમ્ ॥