પૈપ્પલાદ-સંહિતા · અધ્યાય 3.12

યો અપ્સ્વ્ અન્તર્ યો વૃત્રે
અન્તર્ યઃ પુરુષે યો અશ્મનિ ।
ય આવિવેશૌષધીર્ યો વનસ્પતીંસ્
તેભ્યો અગ્નિભ્યો હુતમ્ અસ્ત્વ્ એતત્ ॥

યઃ સોમે અન્તર્ ય ઉ ગોષ્વ્ અન્તર્
ય આવિષ્ટો વયસિ યો મૃગેષુ ।
ય આવિવેશ દ્વિપદો યશ્ ચતુષ્પદસ્
તેભ્યો અગ્નિભ્યો હુતમ્ અસ્ત્વ્ એતત્ ॥

ય ઇન્દ્રેણ સરથં સંબભૂવ
વૈશ્વાનર ઉત વિશ્વદાવ્યઃ ।
યં જોહવીમિ પૃતનાસુષાસહિં
તેભ્યો અગ્નિભ્યો હુતમ્ અસ્ત્વ્ એતત્ ॥

યો દેવો વિશ્વાદ્ યમ્ ઉ કામમ્ આહુર્
યં દાતારં પ્રતિગૃહ્ણન્તમ્ આહુઃ ।
યો ધીરઃ શક્રઃ પરિભૂર્ અદાભ્યસ્
તેભ્યો અગ્નિભ્યો હુતમ્ અસ્ત્વ્ એતત્ ॥

યં ત્વા હોતારં મનસાભિસંવિદુસ્
ત્રયોદશ ભૌવનાઃ પઞ્ચ માનવાઃ ।
વર્ચોધસે યશસે સૂનૃતાવતે
તેભ્યો અગ્નિભ્યો હુતમ્ અસ્ત્વ્ એતત્ ॥

ઉક્ષાન્નાય વશાન્નાય
સોમપૃષ્ઠાય વેધસે ।
વૈશ્વાનરસ્ય જ્યેષ્ઠેભ્યસ્
તેભ્યો અગ્નિભ્યો હુતમ્ અસ્ત્વ્ એતત્ ॥

દિવં પૃથિવીમ્ અન્તરિક્ષં
યે વિદ્યુતમ્ અનુસંચરન્તિ ।
યે દિક્ષ્વ્ અન્તર્ ય ઉ વાતે અન્તસ્
તેભ્યો અગ્નિભ્યો હુતમ્ અસ્ત્વ્ એતત્ ॥

બૃહસ્પતિં વરુણં મિત્રમ્ અગ્નિં
હિરણ્યપાણિં સવિતારમ્ ઇન્દ્રમ્ ।
વિશ્વાન્ દેવાન્ અઙ્ગિરસો હવામહ
ઇમં ક્રવ્યાદં શમયન્ત્વ્ અગ્નિમ્ ॥

શાન્તો અગ્નિઃ ક્રવ્યાદ્
અથો પુરુષરેષણઃ ।
અથો યો વિશ્વદાવ્યસ્
તં ક્રવ્યાદમ્ અશીશમમ્ ॥