ગ્રંથ પાઠ

પૈપ્પલાદ-સંહિતા · અધ્યાય 2.1

2.1.1

અરસં પ્રાચ્યં વિષમ્
અરસં યદ્ ઉદીચ્યમ્ ।
અથેદમ્ અધરાચ્યં
કરમ્ભેણ વિ કલ્પતે ॥

2.1.2

કરમ્ભં કૃત્વા તિર્યં
પીવસ્ફાકમ્ ઉદારથિમ્ ।
ક્ષુધા કિલ ત્વા દુષ્ટનો
જક્ષિવાંસં ન રૂરુપઃ ॥

2.1.3

વિ તે મદં મદવતિ
શરુમ્ ઇવ પાતયામસિ ।
પ્ર ત્વા ચરુમ્ ઇવ યેષન્તં
વચસા સ્થાપયામસિ ॥

2.1.4

પરિ ગ્રામમ્ ઇવાચિતં
પરિ ત્વા સ્થાપયામસિ ।
તિષ્ઠા વૃક્ષ ઇવ સ્થામન્ન્
અભ્રિખાતે ન રૂરુપઃ ॥

2.1.5

પવસ્તૈસ્ ત્વા પર્ય્ અક્રીણન્
દૂર્શેભિર્ અજિનૈર્ ઉત ।
પ્રક્રીર્ અસિ ત્વમ્ ઓષધે
ઽભ્રિખાતે ન રૂરુપઃ ॥

મૂળ પાઠ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0