પૈપ્પલાદ-સંહિતા · અધ્યાય 17.2

ગિરયસ્ તે પર્વતા હિમવન્તો
ઽરણ્યન્ તે પૃથિવિ સ્યોનમ્ અસ્તુ નઃ ।
બભ્રું કૃષ્ણાં રોહિણીં વિશ્વરૂપાં
ધ્રુવાં ભૂમિં પૃથિવીમ્ ઇન્દ્રગુપ્તામ્
અજીતો ઽહતો અક્ષતો અધ્યષ્ઠાં પૃથિવીમ્ અહમ્ ॥

યત્ તે મધ્યં પૃથિવિ યચ્ ચ નભ્યં
યાસ્ ત ઊર્જસ્ તન્વઃ સંબભૂવુઃ ।
તાસુ નો ધેહ્ય્ અભિ નઃ પવસ્વ ॥

માતા ભૂમિઃ પુત્રો અહં પૃથિવ્યાઃ
પર્જન્યઃ પિતા સ ઉ નઃ પિપર્તુ ॥

યસ્યાં વેદિં પરિગૃહ્નન્તિ ભૂમ્યાં
યસ્યાં યજ્ઞં તન્વતે વિશ્વકર્માણઃ ।
યસ્યાં મીયન્તે સ્વરવઃ પૃથિવ્યામ્
ઊર્ધ્વાઃ શુક્રા આહુત્યાઃ પુરસ્તાત્ ।
સા નો ભૂમિર્ વર્ધયાદ્ વર્ધમાના ॥

યો નો દ્વેષત્ પૃથિવિ યત્ પૃતન્યાદ્
યો ઽભિમન્યાતૈ મનસા વધેન ।
તન્ નો ભૂમે રન્ધય પૂર્વકૃત્વને ॥

ત્વજ્જાતાસ્ ત્વયિ ચરન્તિ મર્ત્યાસ્
ત્વં બિભર્ષિ દ્વિપદશ્ ચતુષ્પદઃ ।
ત્વયીમે પૃથિવિ પઞ્ચ માનવા
યેભ્યો જ્યોતિર્ અમૃતં મર્ત્યેભ્ય
ઉદ્યન્ સૂર્યો રશ્મિભિર્ આ તનોતિ ॥

તા નઃ પ્રજાઃ સં દુહ્રતાં સમગ્રા
વાચો મધુ પૃથિવી ધેહિ મહ્યમ્ ॥

વિશ્વસ્વં માતરમ્ ઓષધીનાં
ધ્રુવાં ભૂમિં પૃથિવીં ધર્મણા ધૃતામ્ ।
શિવાં સ્યોનામ્ અનુ ચરેમ વિશ્વહા ॥

મહત્ સધસ્થં મહતી બભૂવિથ
મહાન્ વેગ એજથુર્ વેપથુષ્ ટે ।
મહાંસ્ ત્વેન્દ્રો રક્ષતિ વીર્યેણ
સા નો ભૂમે પ્રરોચય
હિરણ્યસ્યેવ સંદૃશિ ॥

અગ્નિર્ ભૂમ્યામ્ અગ્નિર્ ઓષધીષ્વ્
અગ્નિમ્ આપો બિભ્રત્ય્ અગ્નિર્ અશ્મસુ ।
અગ્નિર્ અન્તઃ પુરુષેષુ
ગોષ્વ્ અશ્વેષ્વ્ અગ્નયઃ ॥