પૈપ્પલાદ-સંહિતા · અધ્યાય 16.67

દ્વાદશારં નહિ તજ્ જરાય
વર્વર્તિ ચક્રં પરિ દ્યામ્ ઋતસ્ય ।
આ પુત્રા અગ્ને મિથુનાસો અત્ર
સપ્ત શતાનિ વિંશતિશ્ ચ તસ્થુઃ ॥

પઞ્ચપાદં પિતરં દ્વાદશાકૃતિં
દિવ આહુઃ પરે અર્ધે પુરીષિણમ્ ।
અથેમે અન્ય ઉપરિ વિચક્ષણં
સપ્તચક્રે ષડર આહુર્ અર્પિતમ્ ॥

પઞ્ચારે ચક્રે પરિવર્તમાને
તસ્મિન્ન્ આ તસ્થુર્ ભુવનાનિ વિશ્વા ।
તસ્ય નાક્ષસ્ તપ્યતે ભૂરિભારઃ
સનાદ્ એવ ન છિદ્યતે સનાભિઃ ॥

સનેમિ ચક્રમ્ અજરં વિ વાવૃત
ઉત્તાનાયાં દશ યુક્તા વહન્તિ ।
સૂર્યસ્ય ચક્ષૂ રજસૈત્ય્ આવૃતં
યસ્મિન્ન્ આ વિશ્વા ભુવનાન્ય્ આર્પિતા ॥

સાકંજાનાં સપ્તથમ્ આહુર્ એકજં
ષડ્ ઇદ્ યમા ઋષયો દેવજા ઇતિ ।
તેષામ્ ઇષ્ટાનિ વિહિતાનિ ધામશઃ
સ્થાત્રે રેજન્તે વિકૃતાનિ રૂપશઃ ॥

સ્ત્રિયઃ સતીસ્ તાઁ ઉ મે પુંસ આહુઃ
પશ્યદ્ અક્ષણ્વાન્ ન વિ ચેતદ્ અન્ધઃ ।
કવિર્ યઃ પુત્રઃ સ ઈમ્ આ ચિકેત
યસ્ તા વિજાનાત્ સ પિતુષ્ પિતાસત્ ॥

અવઃ પરેણ પર એનાવરેણ
પદા વત્સં બિભ્રતી ગૌર્ ઉદ્ અસ્થાત્ ।
સા કદ્રીચી કં સ્વિદ્ અર્ધં પરાગાત્
સા ક્વ સ્વિત્ સૂતે નહિ યૂથે અસ્મિન્ ॥

અવઃ પરેણ પિતરં યો અસ્ય-
-અનુવેદ પર એનાવરેણ ।
કવીયમાનઃ ક ઇહ પ્ર વોચદ્ દેવં
મનઃ કુતો અધિ પ્રજાતમ્ ॥

યે અર્વાઞ્ચસ્ તાઁ ઉ પરાચ આહુર્
યે પરાઞ્ચસ્ તાઁ ઉ અર્વાચ આહુઃ ।
ઇન્દ્રશ્ ચ યા ચક્રથુઃ સોમ તાનિ
ધુરા નિ યુક્તા રજસો વહન્તિ ॥

દ્વા સુપર્ણા સયુજા સખાયા
સમાનં વૃક્ષં પરિ ષસ્વજાતે ।
તયોર્ અન્યઃ પિપ્પલં સ્વાદ્વ્ અત્ત્ય્
અનશ્નન્ન્ અન્યો અભિ ચાકશીતિ ॥

યસ્મિન્ વૃક્ષે મધ્વદઃ સુપર્ણા
નિવિશન્તે સુવતે ચાધિ વિશ્વે ।
તસ્યેદ્ આહુઃ પિપ્પલં સ્વાદ્વ્ અગ્રે
તન્ નોન્ નશદ્ યઃ પિતરં ન વેદ ॥

યત્રા સુપર્ણા અમૃતસ્ય ભક્ષમ્
અનિમેષં વિદથાભિસ્વરન્તિ ।
ઇનો વિશ્વસ્ય ભુવનસ્ય ગોપાઃ
સ મા ધીરઃ પાકમ્ અત્રા વિવેશ ॥