પૈપ્પલાદ-સંહિતા · અધ્યાય 16.150

બ્રહ્મ ભ્રાજદ્ ઉદ્ અગાદ્ અન્તરિક્ષં
દિવં ચ બ્રહ્માવાધૂષ્ટામૃતેન મૃત્યુમ્ ।
બ્રહ્મોપદ્રષ્ટા સુકૃતસ્ય સાક્ષાદ્
બ્રહ્માસ્મદ્ અપ હન્તુ શમલં તમશ્ ચ ॥

પ્રતીચીર્ આયતા સ્તર
વિતતાઃ પશ્યામહૈ ।
સમુદ્રે અપ્સુ યા હિતા-
-અસુરાણામ્ અયસ્મયી ॥

હરિઃ સુપર્ણો દિવમ્ આરુહો ઽર્ચિષા
યે ત્વા દિપ્સન્તિ દિવમ્ ઉત્પતન્તમ્ ।
અવ તાં જહિ હરસા જાતવેદો
ઽબિભ્યદ્ ઉગ્રો હ્ય્ અર્ચિષા
દિવમ્ આ રોહ સૂર્ય ॥

અયોજાલા અસુરા માયિનો ઽયસ્મયૈઃ
પાશૈર્ અઙ્કિનો યે ચરન્તિ ।
તાંસ્ તે રન્ધયામિ હરસે જાતવેદઃ
સહસ્રભૃષ્ટિઃ સપત્નાન્ પ્રમૃણન્ યાહિ વજ્રઃ ॥

દેવાનામ્ અધિપા એતિ ઘર્મ
ઋતેન ભ્રાજન્ન્ અમૃતં વિચષ્ટે ।
હિરણ્યવર્ણો નભસો દેવ સૂર્ય
ઘર્મો ભ્રાજન્ દિવો અન્તાન્ પર્ય્ એષિ વિદ્યુતા ॥

વિદ્યોતન્તે વિદ્યુતો અગ્નિજિહ્વા
હિરણ્યવર્ણા અમૃતા અપ્સ્વ્ અન્તઃ સમુદ્રે ।
રુદ્રસ્ય ક્ષિપ્નો સ્તનયિત્નોર્ વિદ્યુત્ તસ્ય
વૈશ્વાનારસ્ય હેતિઃ પરિ ણો વૃણક્તુ ॥

વિદ્યુતા ભ્રાજન્ હૃદયં યાત્ય્ અગ્નિર્
વ્યાઘ્રા અપ્સુષદો યત્ર ભીમાઃ ।
વિષ્ણોઃ ક્રમૈ સ્તનયન્ન્ એતિ રુદ્રો
નુદં છત્રૂન્ વિ મૃધો બાધમાનો
ઽસપત્નાઃ પ્રદિશો મે કૃણોતુ ॥

અપો વસાનઃ સમૈત્ય્ અન્તરિક્ષં
દિવં ચ સમિદ્ધો અગ્નિર્ દિવ્યસ્ તપોધાઃ ।
વૈશ્વાનરઃ શમયા શીતરૂરે
અપાં સુપર્ણો દિવ એતિ પૃષ્ઠે ॥

વૈશ્વાનરઃ સમુદ્રં પર્ય્ એતિ શુક્રો
ઘર્મો ભ્રાજન્ તેજસા રોચમાણઃ ।
નુદં છત્રૂન્ પ્રદહન્ મે સપત્નાન્
આદિત્યો દ્યામ્ અધ્યરુક્ષદ્ વિપશ્ચિત્ ॥