પૈપ્પલાદ-સંહિતા · અધ્યાય 16.13

શિવાસ્ તે સન્ત્વ્ ઓષધીર્ અપક્રીતાઃ
સહીયસીર્ વીરુધો યા અભિષ્ટુતાઃ ।
અપાં સરસ્વતીં જ્યેષ્ઠાં ત્રાયન્તામ્
અસ્માકં ગામ્ અશ્વં પુરુષં પશુમ્ ॥

મધુમન્ મૂલં મધુમદ્ અગ્રમ્ આસાં
મધુમન્ મધ્યં વીરુધાં બભૂવ ।
મધુમત્ પર્ણં મધુમત્ પુષ્પમ્ આસાં
મધોઃ સંભૂતા અમૃતસ્ય ભક્ષો
ઘૃતમ્ અન્નં દુહ્રતે ગોપુરોગવમ્ ॥

યાવતીઃ કીયતીશ્ ચેમાઃ
પૃથિવ્યામ્ અધ્ય્ ઓષધીઃ ।
તા નઃ સહસ્રપર્ણ્યો
મૃત્યોર્ મુઞ્ચન્ત્વ્ અંહસઃ ॥

વૈયાઘ્રો મણિર્ વીરુધાં
ત્રાયમાણો ઽભિશસ્તિપાઃ ।
અમીવાઃ સર્વા રક્ષાંસ્ય્
અપ હન્ત્વ્ અધિ દૂરમ્ અસ્મત્ ॥

સિંહસ્યેવ સ્તનથોર્ ઓષધીનામ્
અગ્નેર્ ઇવ વિજન્ત આભૃતાભ્યઃ ।
ગવાં યક્ષ્મઃ પુરુષાણાં વીરુદ્ભિર્
અતિનુત્તો નાવ્યા એતુ સ્રોત્યાઃ ॥

મુમુચાના ઓષધયો
અગ્નેર્ વૈશ્વાનરાદ્ અધિ ।
ભૂમિં સંતન્વતીર્ ઇત
યાસાં રાજા વનસ્પતિઃ ॥

યાશ્ ચાહં વેદ વીરુધો
યાશ્ ચ પશ્યામિ ચક્ષુષા ।
અજ્ઞાતા જાનીમશ્ ચ યા
યાસુ વિદ્મસિ સંભૃતમ્ ।
સર્વાઃ સમગ્રા ઓષધીર્
બોધન્તુ વચસો મમ ॥

યા રોહન્ત્ય્ આઙ્ગિરસીઃ
પર્વતેષુ સમેષુ ચ
વીરુધો વિશ્વભેષજીઃ ।
તા નો મયસ્વતીઃ શિવા
ઓષધીઃ સન્તુ શં હૃદે ॥

અશ્વત્થો દર્ભો વીરુધાં
સોમો રાજામૃતં હવિઃ ।
વ્રીહિર્ યવશ્ ચ ભેષજૌ
દિવસ્ પુત્રાવ્ અમર્ત્યૌ ॥

ઉજ્ જીહીધ્વે સ્તનયત્ય્
અભિક્રન્દન્ત્ય્ ઓષધીઃ ।
યદા વઃ પૃશ્નિમાતરઃ
પર્જન્યો રેતસાવતિ ॥