પૈપ્પલાદ-સંહિતા · અધ્યાય 16.107

નમસ્ તે જાયમાનાયૈ
જાતાયા ઉત તે નમઃ ।
બાલેભ્યઃ શફેભ્યો
રૂપાયાઘ્ન્યે તે નમઃ ॥

યો વિદ્યાત્ સપ્ત પ્રવતઃ
સપ્ત વિદ્યાત્ પરાવતઃ ।
શિરો યજ્ઞસ્ય યો વિદ્યાત્
સ વશાં પ્રતિ ગૃહ્ણીયાત્ ॥

વેદાહં સપ્ત પ્રવતઃ
સપ્ત વેદ પરાવતઃ ।
શિરો યજ્ઞસ્યાહં વેદ
સોમં ચાસ્યાં વિચક્ષણમ્ ॥

યયા દ્યૌર્ યયા પૃથિવી
યયાપો ગુપિતા ઇમાઃ ।
વશાં સહસ્રધારાં
બ્રહ્મણાચ્છા વદામસિ ॥

શતં વત્સાઃ શતં દોગ્ધારઃ
શતં ગોપ્તારો અધિ પૃષ્ઠે અસ્યાઃ ।
યે દેવાસ્ તસ્યાં પ્રાણન્તિ
તે વશાં વિદુર્ એકધા ॥

યજ્ઞપદીરાક્ષીરા
સ્વધાપ્રાણા મહીલુકા ।
વશા પર્જન્યપત્ની
દેવાઁ અપ્યેતિ બ્રહ્મણા ॥

અનુ ત્વાગ્નિઃ પ્રાવિશદ્
અનુ સોમો વશે ત્વા ।
ઊધસ્ તે ભદ્રે પર્જન્યો
વિદ્યુતસ્ તે સ્તના વશે ॥

અપસ્ ત્વં ધુક્ષે પ્રથમા
ઉર્વરા અપરા વશે ।
તૃતીયં રાષ્ટ્રં ધુક્ષે
અન્નં ક્ષીરં વશે ત્વમ્ ॥

યદ્ આદિત્યૈર્ હૂયમાના-
-ઉપતિષ્ઠ ઋતાવરિ ।
ઇન્દ્રઃ સહસ્રં પાત્રૈઃ
સોમં ત્વાપાયયદ્ વશે ॥

યદ્ અનૂચીન્દ્રમ્ ઐર્
આત્ ત્વ ઋષભો ઽહ્વયત્ ।
તસ્માત્ તે વૃત્રહા પયઃ
ક્ષીરં ક્રુદ્ધો ઽભરદ્ વશે ॥