પૈપ્પલાદ-સંહિતા · અધ્યાય 13.4

નિર્ ઇતો હરિતસ્રજમ્
ઇન્દ્રો વર્તયતે રથમ્ ।
તેનાપિ લિહ્ન ઈયતે
નિપિંષન્ન્ અહિનામ્નઃ ॥

યેનેન્દ્ર દસ્યૂન્ અમૃણોર્
યેન વૃત્રં પરાભિનઃ ।
તેના શતક્રતો ત્વમ્
અહેર્ જાતાનિ જમ્ભય ॥

પ્રત્ય્ અમોદત પૃથિવી
પ્રતિ દ્યૌઃ પ્રતિ સૂર્યઃ ।
પૈદ્વો યદ્ અશ્વમાતા
ક્રન્દેનાહીન્ અપાવપત્ ॥

યદા પૈદ્વો ઽશ્વમાતા
ક્રન્દેનાહીન્ અપાવપત્ ।
રજ્જૂ ષ્મ દત્વતીઃ શેરે
પૂયન્તીઃ પૃથિવીમ્ અનુ ॥

નાપો જીર્યન્તિ નામૃતં
નેન્દ્રાણી વિધવાભવત્ ।
ન ત્વામ્ આસ્તેગિષદ્ વિષમ્
અશ્માનમ્ ઇવ સાયકમ્ ॥

ઇન્દ્રાગ્ની મિત્રાવરુણા
ત્વષ્ટારમ્ અદિતિં ભગમ્ ।
હુવે ઽહમ્ અર્વન્તં પૈદ્વં
મા મે ઽયં પુરુષો રિષત્ ॥

સદ્યો જાતો ઽકનિક્રદત્
સોલ્બો વ્ય્ અધૂનુત ।
ક્રન્દેનાશ્વસ્ય વાજિનો
ઽહન્યન્તાહયઃ પૃથક્ ॥