पैप्पलाद-संहिता · अध्याय 13.4

निर् इतो हरितस्रजम्
इन्द्रो वर्तयते रथम् ।
तेनापि लिह्न ईयते
निपिंषन्न् अहिनाम्नः ॥

येनेन्द्र दस्यून् अमृणोर्
येन वृत्रं पराभिनः ।
तेना शतक्रतो त्वम्
अहेर् जातानि जम्भय ॥

प्रत्य् अमोदत पृथिवी
प्रति द्यौः प्रति सूर्यः ।
पैद्वो यद् अश्वमाता
क्रन्देनाहीन् अपावपत् ॥

यदा पैद्वो ऽश्वमाता
क्रन्देनाहीन् अपावपत् ।
रज्जू ष्म दत्वतीः शेरे
पूयन्तीः पृथिवीम् अनु ॥

नापो जीर्यन्ति नामृतं
नेन्द्राणी विधवाभवत् ।
न त्वाम् आस्तेगिषद् विषम्
अश्मानम् इव सायकम् ॥

इन्द्राग्नी मित्रावरुणा
त्वष्टारम् अदितिं भगम् ।
हुवे ऽहम् अर्वन्तं पैद्वं
मा मे ऽयं पुरुषो रिषत् ॥

सद्यो जातो ऽकनिक्रदत्
सोल्बो व्य् अधूनुत ।
क्रन्देनाश्वस्य वाजिनो
ऽहन्यन्ताहयः पृथक् ॥