પૈપ્પલાદ-સંહિતા · અધ્યાય 11.2

અત્સસો યમનં સસો
ઽભૂતિર્ યક્ષ્મમ્ અજીજનત્ ।
ઇમં સહસ્રભાગ્ ઇન્દ્રો
વિશરં નાશયાતિ તે ॥

યઃ કાર્યો યશ્ ચ કૃતઃ
સ્વયંજા ઉત હાર્યઃ ।
દેવા ઇન્દ્રજ્યેષ્ઠા
વિશરં નાશયન્તુ તે ॥

વિશરસ્ય વિજૃમ્ભસ્ય-
-ઇષુર્ માતા ધનુષ્ પિતા ।
આદિત્યાઃ પુત્રા આદિત્યા
વિશરં નશયન્તુ તે ॥

ધન્વનો જ્યાયા ઇષ્વા
અપસ્કમ્ભસ્ય બાહ્વોઃ ।
અપાષ્ઠાચ્ છૃઙ્ગાત્ કુર્મલાદ્
વિશરં નાશયામિ તે ॥

અલવતી રુરુશીર્ષ્ણ્ય્
અથો યસ્યાયો મુખમ્ ।
દેવ્યૈ પર્જન્યરેતસ
ઇષવે કૃણુતા નમઃ ॥

યામ્ અત્રયો અઙ્ગિરસો
ગોતમા વીરુધં વિદુઃ ।
તયા ભરદ્વાજઃ કણ્વો
વિશરં નાશયાતિ તે ॥

યસ્ ત્વા સ્ત્રૈણાદ્ અપસરો
યઃ પુંસો અધ્યારુહત્ ।
આક્લાન્તં સંક્લાન્તં સ્નાવ
તદ્ ઉ તે કલ્પયામસિ ॥

વાત ઇવાભ્રં ચ્યાવયામિ
યક્ષ્મં તે તન્વસ્ પરિ ।
વાચા યચ્ ચક્રુસ્ તે ગુરુ
તદ્ ઋચા લઘુ કૃણ્મસિ ।
તેનાહમ્ ઋતોદ્યેન
વિશરં નાશયામિ તે ॥

યથા ન સત્યં પુરુષઃ
સદા વદિતુમ્ અર્હતિ ।
વિષ્કન્ધં ત્વદ્ અપશરં
વિશરં પુષ્ટ્યામયમ્ ।
જમ્ભં હનુગ્રાભં શઙ્ખં
તાન્ અજેના અજામસિ ॥

શુનમ્ ઇદ્ વ ઓષધયો
વિ દધે ભેષજાય કમ્ ।
ધનાયુવઃ સનાયુવઃ
પુરુષં પારયિષ્ણવઃ ॥

આત્મત્રાણિ દેવજૂતા
વીરુધાયુષ્યા કૃતા ।
તયાહમ્ ઇન્દ્રદત્તયા
વિશરં નાશયામિ તે ॥

અલસ્ય વ્યઞ્જનસ્ય
વેષ્ટનસ્યોત પર્ણધેઃ ।
ગ્રન્થેર્ જ્યાયા ઇષ્વા
વિશરં નાશયામિ તે ॥

સાકં વિષ્કન્ધ પ્ર પત
ચાષેણ કિકિદીવ્યા ।
સાકં વાતસ્ય ધ્રાજ્યા
સહ નશ્ય નિહાકયા ॥