પૈપ્પલાદ-સંહિતા · અધ્યાય 11.12

શતકાણ્ડો દુશ્ચ્યવનઃ
સહસ્રપર્ણ ઉત્તિરઃ ।
દર્ભો ય ઉગ્ર ઓષધિસ્
તં તે બધ્નામ્ય્ આયુષે ॥

નાસ્ય કેશાન્ પ્ર વપન્તિ
નોરસિ તાડમ્ આ ઘ્નતે ।
યસ્મા અચ્છિન્નપર્ણેન
દર્ભેણ શર્મ યચ્છતિ ॥

દિવિ તે તૂલમ્ ઓષધે
પૃથિવ્યામ્ અસિ નિષ્ઠિતઃ ।
ત્વયા સહસ્રકાણ્ડેન
આયુષ્ પ્ર વર્ધયામહે ॥

તિસ્રો દિવો અત્ય્ અતૃણસ્
તિસ્ર ઇમાઃ પૃથિવીર્ ઉત ।
તયાહં સર્વાન્ દુર્હાર્દો
જિહ્વાં નિ તૃણદ્મિ વચાંસિ ચ ॥

ત્વમ્ અસિ સહમાનો
અહમ્ અસ્મિ સહસ્વાન્ ।
ઉભૌ સહસ્વન્તૌ ભૂત્વા
સપત્નાન્ સહિષીવહિ ॥

સહસ્વ નો અભિમાતિં
સહસ્વ પૃતનાયતઃ ।
સહસ્વ સર્વાન્ દુર્હાર્દઃ
સુહાર્દો મે બહૂન્ કૃધિ ॥

દર્ભેણ દેવજાતેન
દિવિષ્ટમ્ભેન શશ્વદ્ ઇત્ ।
તેનાહં સસ્વતો જનાઁ
અસનં સનવાનિ ચ ॥

પ્રિયં મા દર્ભં કૃણુ બ્રહ્મરાજન્યાભ્યાં
શૂદ્રાય ચાર્યાય ચ ।
યસ્મૈ ચ કામયામહે
સર્વસ્મૈ ચ વિપશ્યતે ॥

યો જાયમાનઃ પૃથિવીમ્ અદૃંહદ્
યો અસ્તભ્નાદ્ અન્તરિક્ષં દિવં ચ ।
યં બિભ્રતં નનુ પાપ્મા વિવેદ
સ નો ઽયં દર્ભો ધરુણો દિવા કઃ ॥

સપત્નહા શતકાણ્ડઃ સહસ્વાન્
ઓષધીનાં પ્રથમઃ સં બભૂવ ।
સ નો ઽયં દર્ભઃ પરિ પાતુ વિશ્વતસ્
તેન સાક્ષીય પૃતનાઃ પૃતન્યતઃ ॥