પૈપ્પલાદ-સંહિતા · અધ્યાય 10.4

ઇદં રાષ્ટ્રં પ્રથતાં ગોભિર્ અશ્વૈર્
ઇદં રાષ્ટ્રમ્ અન્નેનેરયા રસેન ।
અસ્મૈ ષડ્ ઉર્વીર્ ઉપ સં નમન્તુ
સપ્તહોત્રા હત શત્રૂન્ સચિત્તાઃ ॥

ઇમે રાજાન ઇષુભિર્ ઘ્નન્તુ શત્રૂન્
ઇમે રાજાનઃ સમિત્યાન્યાન્ વધેયુઃ ।
ઇમે રાજાનઃ પૃતનાઃ સહન્તામ્
અહં બ્રહ્મા વિ મૃધો હન્મિ સર્વાઃ ॥

ઇદં રાષ્ટ્રં ક્રતુમદ્ વીરવજ્ જિષ્ણૂગ્રમ્
ઇદં રાષ્ટ્રં ગર્દ્નુમચ્ ચિત્રઘોષમ્ ।
અસ્મૈ રાષ્ટ્રાય બલિમ્ અન્યે હરન્ત્વ્
અહં દેવેભ્યો હવિષા વિધેયમ્ ॥

યદિ યુદ્ધં યદ્ય્ ઋતિતં વો અસ્તિ
દેવૈનસાદ્ યદિ વા પિત્ર્યેણ ।
યેનર્ત્તીયા ધેનવો અસ્તુ તસ્મા
અહં દેવેભ્યો હવિષા જુહોમિ ॥

યદ્ વઃ ક્રૂરં મનસો યચ્ ચ વાચો
દેવૈનસાદ્ યદિ વા પિત્ર્યેણ ।
આપ ઇવ દુઃષ્વપ્ન્યમ્ અપ તત્ સ્વપધ્વમ્
અથાનન્દિનઃ સુમનસઃ સમ્ એત ॥

અપામ્ ઇવ વેગઃ પ્ર શૃણીત શત્રૂન્
દિશોદિશો રભમાણઃ સમ્ એત ।
એકવ્રતા વિ ધનં ભજધ્વં
પુરોહિતેન વો રાષ્ટ્રં પ્રથયન્તુ દેવાઃ ॥

સમ્યગ્ વો રાષ્ટ્રં સહ વો મનાંસિ
સમીચીનાઃ પશવો વિશ્વરૂપાઃ ।
સમીચીનાનાં વો અહમ્ અસ્મિ બ્રહ્મા
સમ્યઞ્ચો દેવા હવમ્ આ યન્તુ મ ઇમમ્ ॥

યથાપઃ સમુદ્રાય
સમીચીર્ વહથ શ્રિયમ્ ।
એવા રાષ્ટ્રાય મે દેવાઃ
સમ્યઞ્ચો વહત શ્રિયમ્ ॥

સંસૃષ્ટં વો રાષ્ટ્રં પશુભિર્ ગોભિર્ અશ્વૈઃ
સંસૃષ્ટમ્ અન્નેનેરયા રસેન ।
મયા બ્રહ્મણા પ્રથમાનાશ્વો
વસીયાંસઃ સદમ્ ઉગ્રા ભવાથ ॥

બહુર્ યુવા પ્રમૃણો ધૃષ્ણુર્ અસ્તુ
બહુઃ કુમારઃ પ્રતિરૂપઃ પિતૄણામ્ ।
સત્યં વદન્તઃ સમિતિં ચરન્તો
મિત્રં ગૃહ્ણાના જરસો યન્તુ સખ્યમ્ ॥

ઇહ ક્ષત્રં દ્યુમ્નમ્ ઉત રાષ્ટ્રં સમૈત્વ્
ઇહેન્દ્રિયં પશુભિઃ સંવિદાનમ્ ।
અવધુન્વાના અપ્રિયાન્ યાંશ્ ચ દ્વિષ્મ
ઇદં રાષ્ટ્રં પ્રથતાં સર્વદૈવ ॥

ઇદં રાષ્ટ્રમ્ ઇષુમદ્ વીરવજ્ જિષ્ણૂગ્રમ્
ઇદં રાષ્ટ્રં પશુમદ્ બ્રહ્મવૃદ્ધમ્ ।
ઇદં રાષ્ટ્રં હતશત્રુ જિષ્ણુ ॥

સપત્નસાહં પ્રમૃણમ્
ઇદં રાષ્ટ્રં દૃઢમ્ ઉગ્રમ્ ।
સાઢામિત્રમ્ અભિમાતિષાહં
સર્વા જિગાય પૃતના અભિષ્ટિ ॥