પદ્મ પુરાણ · અધ્યાય 6.99

નારદ ઉવાચ-
સ માં સંપૂજ્ય વિધિવદ્દાનવેંદ્રો ઽતિભક્તિતઃ ।
સંપ્રહસ્ય તદા વાક્યં જગાદ નૃપસત્તમ

જલંધર ઉવાચ-
કુતસ્ત્વાગમ્યતે બ્રહ્મન્કિં ચ દૃષ્ટં ત્વયા ક્વચિત્ ।
યદર્થમિહ ચાયાતસ્તદા જ્ઞાપય માં મુને

નારદ ઉવાચ-
ગતઃ કૈલાસશિખરં દૈત્યેંદ્રાહં યદૃચ્છયા ।
તત્રોમયા સહાસીનં દૃષ્ટવાનસ્મિ શંકરમ્

યોજનાયુતવિસ્તીર્ણે કલ્પદ્રુમ મહાવને ।
કામધેનુશતાકીર્ણે ચિંતામણિ સુદીપિતે

તં દૃષ્ટ્વા મહદાશ્ચર્યં વિતર્કો મેઽભવત્તદા ।
ક્વાપીદૃશી ભવેદ્વૃદ્ધિસ્ત્રિલોક્યાં વા ન વેતિ ચ

તાવત્તવાપિ દૈત્યેંદ્ર સમૃદ્ધિઃ સમ્ભૃતા મયા ।
તદ્વિલોકનકામોઽહં ત્વત્સાન્નિધ્યમિહાગતઃ

ત્વત્સમૃદ્ધિમિમાં પશ્યન્સ્ત્રીરત્નરહિતાં ધ્રુવમ્ ।
તર્કયામિ શિવાદન્યત્ત્રિલોક્યાં ન સમૃદ્ધિમાન્

અપ્સરો નાગકન્યાશ્ચ યદ્યપિ ત્વદ્વશે સ્થિતાઃ ।
તથાપિ તા ન પાર્વત્યા રૂપેણ સદૃશા ધ્રુવમ્

યસ્યા લાવણ્યજલધૌ નિમગ્નશ્ચતુરાનનઃ ।
સ્વધૈર્યમમુચત્પૂર્વં તયા કાન્યોપમીયતે

વીતરાગોઽપિ હિ યથા મદનારિઃ સ્વલીલયા ।
વિશ્વતંત્રોઽપિ તપસા સ ચાત્મવશગઃ કૃતઃ

સૌંદર્યગહને ભ્રામન્શબરીરૂપયા પુરા ।
યસ્યાઃ પુનઃ પુનઃ પશ્યન્રૂપં ધાતા વિસર્જને

સસર્જાપ્સરસસ્તાસ્તાસ્તત્સમૈકાપિ નાભવત્ ।
અતઃ સ્ત્રીરત્નસંભોક્તુઃ સમૃદ્ધિસ્તસ્ય સા વરા

તથા ન તવ દૈત્યેંદ્ર સર્વરત્નાધિપસ્ય ચ ।
એવમુક્ત્વા તમામંત્ર્ય ગતે મયિ સ દૈત્યરાટ્

તદ્રૂપશ્રવણાદાસીદનંગજ્વરપીડિતઃ ।
અથ સંપ્રેષયામાસ દૂતં ચ સિંહિકાસુતમ્

ત્ર્યંબકાય તદા કિંચિદ્વિષ્ણુમાયાવિમોહિતઃ ।
કૈલાસમગમદ્રાહુઃ સર્વશુક્લેંદુવર્ચસમ્

કાર્ત્સ્ન્યેન કૃષ્ણપક્ષેંદુવર્ચસં સ્વાંગજેન તુ ।
નિવેદિતસ્તદાદેશાન્નંદિના ચ પ્રવેશિતઃ ।
ત્ર્યંબકાભ્રૂલતાસંજ્ઞા પ્રેરિતો વાક્યમબ્રવીત્

રાહુરુવાચ-
દેવપન્નગસેવ્યસ્ય ત્રૈલોક્યાધિપતેઃ પ્રભોઃ ।
સર્વરત્નેશ્વરસ્ય ત્વમાજ્ઞાં શૃણુ વૃષધ્વજ

શ્મશાનવાસિનો નિત્યં મુંડમાલાધરસ્ય ચ ।
દિગંબરસ્ય તે ભાર્યા કથં હૈમવતી શુભા

અહં રત્નાધિનાથોઽસ્મિ સા ચ સ્ત્રી રત્નસંજ્ઞકા ।
તસ્માન્મમૈવ સા યોગ્યા નૈવ ભિક્ષાશિનસ્તવ

નારદ ઉવાચ-
વદત્યેવં તદા રાહૌ ભ્રૂમધ્યાચ્છૂલપાણિનઃ ।
અભવત્પુરુષો રૌદ્રસ્તીવ્રાશનિસમસ્વનઃ

સિંહાસ્યઃ પ્રચલજ્જિહ્વઃ સજ્વલન્નયનો મહાન્ ।
ઊર્ધ્વકેશઃ શુષ્કતનુર્નૃસિંહ ઇવ ચાપરઃ

સ તં ખાદિતુમારેભે દૃષ્ટ્વા રાહુર્ભયાતુરઃ ।
અધાવદતિવેગેન બહિઃ સ ચ દધાર તમ્

સ ચ રાહુર્મહાબાહુર્મેઘગંભીરયા ગિરા ।
ઉવાચ દેવદેવેશં પાહિ માં શરણાગતમ્

બ્રાહ્મણં માં મહાદેવ ખાદિતું સમુપાગતઃ ।
એતસ્માદ્રક્ષ દેવેશ શરણાગતવત્સલ

મહાદેવો વચઃ શ્રુત્વા બ્રાહ્મણસ્ય તદાબ્રવીત્ ।
નૈવાસૌ વધ્યતામેતિ દૂતોઽયં પરવાન્યતઃ

મુંચેતિ પુરુષઃ શ્રુત્વા રાહું તત્યાજ સોંબરે ।
રાહું ત્યક્ત્વા સ ષુરુષો મહાદેવં વ્યજિજ્ઞપત્

પુરુષ ઉવાચ-
ક્ષુધા માં બાધતે સ્વામિન્ક્ષુત્ક્ષામશ્ચાસ્મિ સર્વથા ।
કિં ભક્ષ્યં મમ દેવેશ તદાજ્ઞાપય માં પ્રભો

ઈશ્વર ઉવાચ-
સંભક્ષયાત્મનઃ શીઘ્રં માંસં ત્વં હસ્તપાદયોઃ

નારદ ઉવાચ-
સશિવેનૈવમાજ્ઞપ્તશ્ચખાદ પુરુષઃ સ્વયમ્ ।
હસ્તપાદોદ્ભવં માંસં શિરઃશેષો યદાભવત્

દૃષ્ટ્વા શિરોઽવશેષં તુ સુપ્રસન્નઃ સદાશિવઃ ।
પુરુષં ભીમકર્માણં તમુવાચ સવિસ્મયઃ

ઈશ્વર ઉવાચ-
ત્વં કીર્તિમુખસંજ્ઞો હિ ભવ મદ્દ્વારગઃ સદા ।
ત્વદર્ચાં નૈવ કુર્વંતિ નૈવ તે મત્પ્રિયંકરાઃ ૩૧*।
નારદ ઉવાચ-
તદાપ્રભૃતિ દેવસ્ય દ્વારે કીર્તિમુખઃ સ્થિતઃ ।
નાર્ચયંતીહ યે પૂર્વં તેષામર્ચા વૃથા ભવેત્

રાહુર્વિમુક્તો યસ્તેન સોઽપતદ્બર્બરસ્થલે ।
અતઃ સ બર્બરોદ્ભૂત ઇતિ ભૂમૌ પૃથાં ગતઃ

તતશ્ચ રાહુઃ પુનરેવ જાતમાત્માનમસ્મિન્નિતિ મન્યમાનઃ ।
સમેત્ય સર્વં કથયાં બભૂવ જલંધરાયેશવિચેષ્ટિતં તત્

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્તિકામાહાત્મ્યે શ્રીકૃષ્ણસત્યભામાસંવાદે દૂતસંવાદો જાલંધરોપાખ્યાનંનામ નવનવતિતમોઽધ્યાયઃ