પદ્મ પુરાણ · અધ્યાય 6.79

મહાદેવ ઉવાચ-
અપામાર્જનકં દિવ્યં પરમાદ્ભુતમેવ ચ ।
પઠિતવ્યં વિશેષેણ પુત્રકામાર્થસિદ્ધયે

એતત્સ્તોત્રં પઠેત્પ્રાજ્ઞઃ સર્વકામાર્થસિદ્ધયે ।
એકકાલં દ્વિકાલં વા યે પઠંતિ દ્વિજાતયઃ

આયુશ્ચ શ્રીર્બલં તસ્ય વર્દ્ધયંતિ દિને દિને ।
બ્રાહ્મણો લભતે વિદ્યાં ક્ષત્રિયો રાજ્યમેવ વા

વૈશ્યો ધનસમૃદ્ધિં ચ શૂદ્રો ભક્તિં ચ વિંદતિ ।
અન્યૈશ્ચ લભતે ભક્તિં પઠનાચ્છ્રવણાજ્જપાત્

સામવેદફલં તસ્ય જાયતે નગનન્દિનિ ।
અખિલં પાપસંઘાતં તત્ક્ષણાદેવ નશ્યતિ

ઇતિ જ્ઞાત્વા તુ ભો દેવિ પઠિતવ્યં સમાહિતૈઃ ।
પુત્રાશ્ચૈવ તથા લક્ષ્મીઃ સંપૂર્ણા ભવતિ ધ્રુવમ્

લિખિત્વા ભૂર્જપત્રે તુ યો ધારયતિ વૈષ્ણવઃ ।
ઇહલોકે સુખં ભુક્ત્વા યાતિ વિષ્ણોઃ પરં પદમ્

પઠિત્વા શ્લોકમેકં તુ તુલસીં યઃ સમર્પયેત્ ।
સર્વં તીર્થં કૃતં તેન તુલસ્યાઃ પૂજને કૃતે

એતત્સ્તોત્રં તુ પરમં વૈષ્ણવં મુક્તિદાયકમ્ ।
પૃથ્વીદાનસમં પાઠાદ્વિષ્ણુલોકં તુ ગચ્છતિ

જપેત્સ્તોત્રં વિશેષેણ વિષ્ણુલોકસ્ય વાંછયા ।
બાલાનાં જીવનાર્થાય પઠિતવ્યં સમાહિતૈઃ

રોગગ્રહાભિભૂતાનાં બાલાનાં શાંતિકારકમ્ ।
ભૂત ગ્રહ વિષં ચૈવ પઠનાદેવ નશ્યતિ

કંઠે તુલસિજાં માલાં ધૃત્વા વિપ્રો હિ યઃ પઠેત્ ।
સ ચ વૈ વૈષ્ણવો જ્ઞેયો વિષ્ણુલોકં સ ગચ્છતિ

કંઠે માલા ધૃતા યેન શંખચક્રાદિચિહ્નિતઃ ।
વૈષ્ણવઃ પ્રોચ્યતે વિપ્રઃ સ્તોત્રં ચૈતત્પઠન્સદા

ઇહલોકં પરિત્યજ્ય વિષ્ણુલોકં સ ગચ્છતિ ।
મોહમાયાપરિત્યક્તો દંભતૃષ્ણાવિવર્જિતઃ

એતત્સ્તોત્રં પઠેદ્દિવ્યં પરં નિર્વાણમાપ્નુયાત્ ।
તે ધન્યાઃ સંતિ ભૂર્લોકે યે વિપ્રા વૈષ્ણવાઃ સ્મૃતાઃ

સ્વાત્મા વૈ તારિતસ્તૈસ્તુ સકુલં નાત્ર સંશયઃ ।
તે વૈ ધન્યતમા લોકે નારાયણપરાયણાઃ ।
તૈર્ભક્તિશ્ચ સદા કાર્યા તે વૈ ભાગવતા નરાઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુમાપતિનારદસંવાદે અપામાર્જનમહિમાનામૈકોનાશીતિતમોઽધ્યાયઃ