પદ્મ પુરાણ · અધ્યાય 6.63
યુધિષ્ઠિર ઉવાચ -
શ્રુતાનિ બહુધર્માણિ વ્રતાનિ ચ જગત્પ્રભો ।
એકાદશીસમં કિંજિચ્છ્રુતં નૈવ જનાર્દન
પુનસ્ત્વેકાદશીં બ્રૂહિ પાપઘ્નીં પુણ્યદાયિનીમ્ ।
યાં કૃત્વા મનુજો લોકે પ્રાપ્નુયાત્પરમં પદમ્
શ્રીકૃષ્ણ ઉવાચ-
શુક્લે વા યદિ વા કૃષ્ણે યદા ચૈકાદશી ભવેત્ ।
ન ત્યાજ્યા જગતીપાલ મોક્ષસૌખ્યવિવર્દ્ધની
એકાદશી કલૌ રાજન્ભવબંધવિમોચની ।
કામદા સર્વકામાનાં પાપાનાં પાપહા ભુવિ
રવિવારેઽથ માંગલ્યે સંક્રમે વા નૃપોત્તમ ।
એકાદશી સદોપોષ્યા પુત્રપૌત્રવિવર્દ્ધની
એકાદશીવ્રતં ક્વાપિ ન ત્યાજ્યં વિષ્ણુવલ્લભૈઃ ।
આયુઃ કીર્તિપ્રદં નિત્યં સંતાનારોગ્યવિત્તદમ્
મોક્ષદં રૂપદં રાજ્યં નિત્યમેકાદશીવ્રતમ્ ।
યે કુર્વંતિ મહીપાલ શ્રદ્ધયા પરયા યુતાઃ
યથોક્તવિધિના લોકે તે નરા વિષ્ણુરૂપિણઃ ।
જીવન્મુક્તાસ્તુ ભૂપાલ દૃશ્યંતે નાત્ર સંશયઃ
યુધિષ્ઠિર ઉવાચ-
જીવન્મુક્તાઃ કથં કૃષ્ણ વિષ્ણુરૂપાઃ કથં પુનઃ ।
પાપરૂપાશ્ચ દૃશ્યંતે પરં કૌતૂહલં હિ મે
શ્રીકૃષ્ણ ઉવાચ-
યે ચ રાજન્કલૌ ભક્ત્યા નિર્જલં વ્રતમુત્તમમ્ ।
એકાદશ્યાઃ પ્રકુર્વંતિ વિધિદૃષ્ટેન કર્મણા
ન કથં વિષ્ણુરૂપાસ્તે જીવન્મુક્તાઃ કથં નહિ ।
સર્વપાપહરં પુણ્યં વ્રતમેકાદશીસમમ્
ન કિંચિદ્વિદ્યતે રાજન્સર્વકામપ્રદં નૃણામ્ ।
એકાશનં દશમ્યાં ચ નંદાયાં નિર્જલં વ્રતમ્
પારણં ચૈવ ભદ્રાયાં કૃત્વા વિષ્ણુસમા નરાઃ ।
શ્રદ્ધાવાન્યસ્તુ કુરુતે કામદાયા વ્રતં શુભમ્
વાંછિતં લભતે સોઽપિ ઇહલોકે પરત્ર ચ ।
પવિત્રા પાવની હ્યેષા મહાપાતકનાશિની
ભુક્તિમુક્તિપ્રદા ચૈવ કર્તૄણાં નૃપસત્તમ ।
કામદાયાં વિધાનેન પૂજયેત્પુરુષોત્તમમ્
પુષ્પધૂપાદિભિશ્ચૈવ નૈવેદ્યૈર્વિવિધૈસ્તથા ।
કાંસ્ય માંસમસૂરાંશ્ચ ચણકાન્કોદ્રવાંસ્તથા
શાકં મધુ પરાન્નં ચ પુનર્ભોજન મૈથુનમ્ ।
વૈષ્ણવો વ્રતકર્ત્તા ચ દશમ્યાં દશ વર્જયેત્
દ્યૂતં ક્રીડાં તથા નિદ્રા તાંબૂલં દંતધાવનમ્ ।
પરાપવાદં પૈશુન્યં સ્તેયં હિંસાં તથા રતિમ્
ક્રોધં ચ વિતથં વાક્યમેકાદશ્યાં વિવર્જયેત્ ।
કાંસ્યં માંસંમસૂરાંશ્ચ તૈલં વિતથભાષણમ્
વ્યાયામં ચ પ્રવાસં ચ પુનર્ભોજનમૈથુનમ્ ।
વૃષપૃષ્ઠં પરાન્નં ચ શાકં ચ દ્વાદશીદિને
અનેન વિધિના રાજન્વિહિતા યૈશ્ચ કામદા ।
રાત્રૌ જાગરણં કૃત્વા પૂજિતઃ પુરુષોત્તમઃ
સર્વપાપવિનિર્મુક્તાસ્તે યાંતિ પરમાં ગતિમ્ ।
પઠનાચ્છ્રવણાદ્રાજન્ગોસહસ્રફલં લભેત્
ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખણ્ડે ઉમાપતિનારદસંવાદે પુરુષોત્તમમાસસ્ય શુક્લા કામદાનામૈકાદશીનામ ત્રિષષ્ટિતમોઽધ્યાયઃ
મૂળ પાઠ: padmapurāṇam · Sanskrit Wikisource contributors · Sanskrit Wikisource · CC BY-SA 4.0