પદ્મ પુરાણ · અધ્યાય 6.59

યુધિષ્ઠિર ઉવાચ-
કથયસ્વ પ્રસાદેન મમાગ્રે મધુસૂદન ।
ઇષસ્ય શુક્લપક્ષે તુ કિં નામૈકાદશીભવેત્

શ્રીકૃષ્ણ ઉવાચ-
શૃણુરાજેંદ્ર વક્ષ્યામિ માહાત્મ્યં પાપ નાશનમ્ ।
શુક્લપક્ષે ચાશ્વિનસ્ય ભવેદેકાદશી તુ યા

પાપાંકુશેતિ વિખ્યાતા સર્વપાપહરા પરા ।
પદ્મનાભાભિધાનં માં પૂજયેત્તત્ર માનવઃ

સર્વાભીષ્ટ ફલં પ્રાપ્તૌ સ્વર્ગમોક્ષપ્રદં નૃણામ્ ।
તપસ્તપ્ત્વા પુનસ્તીવ્રં ચિરં સુનિયતેન્દ્રિયઃ

યત્ફલં સમવાપ્નોતિ તન્ન ત્વા ગરુડધ્વજમ્ ।
કૃત્વાપિ બહુશઃપાપં નરો મોહ સમન્વિતઃ

ન યાતિ નરકં નત્વા સર્વપાપહરં હરિમ્ ।
પૃથિવ્યાં યાનિ તીર્થાનિ પુણ્યાન્યાયતનાનિ ચ

તાનિ સર્વાણ્યવાપ્નોતિ વિષ્ણોર્નામાનુકીર્ત્તનાત્ ।
દેવં શાર્ઙ્ગધરં વિષ્ણું યે પ્રપન્ના જનાર્દનમ્

ન તેષાં યમલોકસ્ય યાતના જાયતે ક્વચિત્ ।
ઉપોષ્યૈકાદશીમેકાં પ્રસંગેનાપિ માનવઃ ।
ન યાતિ યાતનાં યામીં પાપં કૃત્વાપિ દારુણમ્

વૈષ્ણવઃ પુરુષો ભૂત્વા શિવનિંદાં કરોતિ યઃ ।
ન વિંદેદ્વૈષ્ણવં લોકં સ યાતિ નરકં ધ્રુવમ્

શૈવઃ પાશુપતો ભૂત્વા વિષ્ણુનિંદાં કરોતિ ચેત્ ।
રૌરવે પચ્યતે ઘોરે યાવદિન્દ્રાશ્ચતુર્દશ

નેદૃશં પાવનં કિંચિત્ત્રિષુ લોકેષુ વિદ્યતે ।
યાદૃશં પદ્મનાભસ્ય વ્રતં પાતકનાશનમ્

તાવત્પાપાનિ દેહેઽસ્મિન્તિષ્ઠંતિ મનુજાધિપમ્ ।
યાવન્નોપવસેજ્જંતુઃ પદ્મનાભદિનં શુભમ્

અશ્વમેધસહસ્રાણિ રાજસૂયશતાનિ ચ ।
એકાદશ્યુપવાસસ્ય કલાં નાર્હંતિ ષોડશીમ્

એકાદશીસમં કિંચિદ્વ્રતં લોકે ન વિદ્યતે ।
વ્યાજેનાપિ કૃતા યૈશ્ચ ન તે યાંતિ હિ ભાસ્કરિમ્

સ્વર્ગમોક્ષપ્રદા હ્યેષા શરીરારોગ્યદાયિની ।
કલત્રસુતદા હ્યેષા ધનમિત્રપ્રદાયિની

ન ગંગા ન ગયા રાજન્ન ચ કાશી ચ પુષ્કરમ્ ।
ન ચાપિ કૌરવં ક્ષેત્રં પુણ્યં ભૂપ હરેર્દિનાત્

રાત્રૌ જાગરણં કૃત્વા સમુપોષ્ય હરેર્દિનમ્ ।
અનાયાસેન ભૂપાલ પ્રાપ્યતે વૈષ્ણવં પદમ્

દશૈવ માતૃકે પક્ષે રાજેંદ્ર દશ પૈતૃકે ।
પ્રિયાયા દશપક્ષે તુ પુરુષાનુદ્ધરેન્નરઃ

ચતુર્ભુજા દિવ્યરૂપા નાગારિકૃતકેતનાઃ ।
સ્રગ્વિણઃ પીતવસ્ત્રાશ્ચ પ્રયાંતિ હરિમંદિરમ્

બાલત્વે યૌવનત્વે ચ વૃદ્ધત્વે ચ નૃપોત્તમ ।
ઉપોષ્યૈકાદશીં નૂનં નૈવ પ્રાપ્નોતિ દુર્ગતિમ્

પાપાંકુશામુપોષ્યૈવ આશ્વિનસ્ય સિતે નરઃ ।
સર્વપાપવિનિર્મુક્તો હરિલોકં સ ગચ્છતિ

દત્ત્વા હેમતિલાન્ભૂમિં ગામન્નમુદકં તથા ।
ઉપાનચ્છત્રવસ્ત્રાદીન્ન પશ્યતિ યમં નરઃ

યસ્ય પુણ્યવિહીનાનિ દિનાન્યાયાંતિ યાંતિ ચ ।
સ લોહકારભસ્ત્રેવ શ્વસન્નપિ ન જીવતિ

અવંધ્યં દિવસં કુર્યાદ્દરિદ્રોઽપિ નૃપોત્તમ ।
સદાચરન્યથાશક્તિ સ્નાનદાનાદિકાઃ ક્રિયાઃ

હોમસ્નાનજપધ્યાનસત્રાદિપુણ્યકર્મણામ્ ।
કર્ત્તારો નૈવ પશ્યંતિ ઘોરાં તાં યમયાતનામ્

દીર્ઘાયુષો ધનાઢ્યાશ્ચ કુલીના રોગવર્જિતાઃ ।
દૃશ્યંતે માનવા લોકે પુણ્યકર્ત્તાર ઈદૃશાઃ

કિમત્ર બહુનોક્તેન યાંત્યધર્મેણ દુર્ગતિમ્ ।
આરોહંતિ દિવં ધર્મૈર્નાત્રકાર્યા વિચારણા

ઇતિ તે કથિતં રાજન્યત્પૃષ્ટોઽહં ત્વયાનઘ ।
પાપાંકુશાયા માહાત્મ્યં કિમન્યચ્છ્રોતુમિચ્છસિ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે આશ્વિનશુક્લપાપાંકુશૈકાદશીમાહાત્મ્યનામૈકોનષષ્ટિતમોઽધ્યાયઃ