પદ્મ પુરાણ · અધ્યાય 6.33

નારદ ઉવાચ-
શનિપીડા કથં યાતિ તન્મે વદ સુરોત્તમ ।
ત્વન્મુખાચ્છ્રૂયતે યદ્વૈ તેન જંતુઃ પ્રમુચ્યતે

મહાદેવ ઉવાચ-
દેવર્ષે શૃણુ વૃત્તાંતં તેન મુચ્યેત બંધનાત્ ।
ગ્રહાણાં ગ્રહરાજોઽયં સૌરિઃ સર્વમહેશ્વરઃ

અયં તુ દેવો વિખ્યાતઃ કાલરૂપી મહાગ્રહઃ ।
જટિલો વજ્રરોમા ચ દાનવાનાં ભયંકરઃ

તસ્યાખ્યાનં ચ લોકેઽસ્મિન્પ્રથિતં નાસ્તિ વૈ પ્રભો ।
મયા ગુપ્તં વિશેષેણ નોક્તં હિ કસ્યચિત્કદા

રઘુવંશેઽતિ વિખ્યાતો રાજા દશરથઃ પુરા ।
ચક્રવર્તી મહાવીરઃ સપ્તદ્વીપાધિપોઽભવત્

કૃત્તિકાંતે શનિં જ્ઞાત્વા દૈવજ્ઞૈર્જ્ઞાપિતો હિ સઃ ।
રોહિણીં ભેદયિત્વા ચ શનિર્યાસ્યતિ સાંપ્રતમ્

શાકટં ભેદમત્યુગ્રં સુરાસુરભયંકરમ્ ।
દ્વાદશાબ્દં તુ દુર્ભિક્ષં ભવિષ્યતિ સુદારુણમ્

એતચ્છ્રુત્વા તતો વાક્યં મંત્રિભિઃ સહ પાર્થિવઃ ।
મંત્રયામાસ કિમિદં ભયંકરમુપસ્થિતમ્

આકુલં ચ જગદ્દૃષ્ટ્વા પૌરજાનપદાદિકમ્ ।
બ્રુવંતિ સર્વતો લોકાઃ ક્ષય એષ સમાગતઃ

દેશાઃ સનગરા ગ્રામા ભયભીતાઃ સમંતતઃ ।
પપ્રચ્છ પ્રયતો રાજા વસિષ્ઠપ્રમુખાન્દ્વિજાન્

સંવિધાનં કિમત્રાસ્તિ બ્રૂત માં હિ દ્વિજોત્તમાઃ

વસિષ્ઠ ઉવાચ-
પ્રાજાપત્યમૃક્ષમિદં તસ્મિન્ભિન્ને કુતઃ પ્રજાઃ ।
અયં યોગોહ્યસાધ્યસ્તુ બ્રહ્મશક્રાદિભિસ્તથા

ઇતિ સંચિંત્ય મનસા સાહસં પરમં મહત્ ।
સમાદાય ધનુર્દિવ્યં દિવ્યાયુધસમન્વિતમ્

રથમારુહ્ય વેગેન ગતો નક્ષત્રમંડલમ્ ।
સપાદં યોજનં લક્ષં સૂર્યસ્યોપરિ સંસ્થિતમ્

રોહિણીપૃષ્ઠમાસ્થાય રાજા દશરથઃ પુરા ।
રથે તુ કાંચને દિવ્યે મણિરત્નવિભૂષિતે

હંસવર્ણહયૈર્યુક્તે મહાકેતુસમુચ્છ્રયે ।
દીપ્યમાનો મહારત્નૈઃ કિરીટમુકુટોજ્જ્વલઃ

બભ્રાજ સ તદાકાશે દ્વિતીય ઇવ ભાસ્કરઃ ।
આકર્ણપૂર્ણા ચાપે તુ સંહારાસ્ત્રં ન્યયોજયત્

સંહારાસ્ત્રં શનિર્દૃષ્ટ્વા સુરાસુરભયંકરમ્ ।
હસિત્વા તદ્ભયાત્સૌરિરિદં વચનમબ્રવીત્

શનિરુવાચ -
પૌરુષં તવ રાજેંદ્ર પરં રિપુભયંકરમ્ ।
દેવાસુરમનુષ્યાશ્ચ સિદ્ધવિદ્યાધરોરગાઃ

મયા વિલોકિતા રાજન્ભસ્મસાચ્ચ ભવંતિતે ।
તુષ્ટોઽહં તવ રાજેંદ્ર તપસા પૌરુષેણ ચ ।
વરં બ્રૂહિ પ્રદાસ્યામિ મનસા યત્કિમિચ્છસિ

દશરથ ઉવાચ-
રોહિણીં ભેદયિત્વા તુ ન ગંતવ્યં કદાચન ।
સરિતઃ સાગરા યાવત્યાવચ્ચંદ્રાર્કમેદિની

યાચિતં તુ મયા સૌરે નાન્યમિચ્છામિ તે વરમ્ ।
એવમસ્તુ શનિઃ પ્રાહ વરં દત્ત્વા તુ શાશ્વતમ્

પુનરેવાબ્રવીત્તુષ્ટો વરં વરય સુવ્રત ।
પ્રાર્થયામાસ હૃષ્ટાત્મા વરમન્યં શનેસ્તદા

ન ભેત્તવ્યં હિ શકટં ત્વયા ભાસ્કરનંદન ।
દ્વાદશાબ્દં તુ દુર્ભિક્ષં ન કર્તવ્યં કદાચન

શનિરુવાચ-
દ્વાદશાબ્દં તુ દુર્ભિક્ષં ન કદાચિદ્ભવિષ્યતિ ।
કીર્તિરેષા ત્વદીયા ચ ત્રૈલોક્યે વિચરિષ્યતિ

વરદ્વયં તુ સંપ્રાપ્ય હૃષ્ટરોમા ચ પાર્થિવઃ ।
રથોપરિ ધનુર્મુક્ત્વા ભૂત્વા ચૈવ કૃતાઞ્જલિ

ધ્યાત્વા સરસ્વતીં દેવીં ગણનાથં વિનાયકમ્ ।
રાજા દશરથઃ સ્તોત્રં સૌરેરિદમથાબ્રવીત્

દશરથ ઉવાચ-
નમઃ કૃષ્ણાય નીલાય શિતિકંઠનિભાય ચ ।
નમઃ કાલાગ્નિરૂપાય કૃતાંતાય ચ વૈ નમઃ

નમો નિર્માંસદેહાય દીર્ઘશ્મશ્રુજટાય ચ ।
નમો વિશાલનેત્રાય શુષ્કોદરભયાકૃતે

નમઃ પુષ્કલગાત્રાય સ્થૂલરોમ્ણેઽથ વૈ નમઃ ।
નમો દીર્ઘાય શુષ્કાય કાલદંષ્ટ્ર નમોસ્તુ તે

નમસ્તે કોટરાક્ષાય દુર્નિરીક્ષ્યાય વૈ નમઃ ।
નમો ઘોરાય રૌદ્રાય ભીષણાય કપાલિને

નમસ્તે સર્વભક્ષાય વલીમુખ નમોસ્તુ તે ।
સૂર્યપુત્ર નમસ્તેસ્તુ ભાસ્કરે ભયદાય ચ

અધોદૃષ્ટે નમસ્તેસ્તુ સંવર્તક નમોસ્તુ તે ।
નમો મંદગતે તુભ્યં નિસ્ત્રિંશાય નમોસ્તુ તે

તપસા દગ્ધદેહાય નિત્યં યોગરતાય ચ ।
નમો નિત્યં ક્ષુધાર્તાય અતૃપ્તાય ચ વૈ નમઃ

જ્ઞાનચક્ષુર્નમસ્તેસ્તુ કશ્યપાત્મજસૂનવે ।
તુષ્ટો દદાસિ વૈ રાજ્યં રુષ્ટો હરસિ તત્ક્ષણાત્

દેવાસુરમનુષ્યાશ્ચ સિદ્ધવિદ્યાધરોરગાઃ ।
ત્વયા વિલોકિતાઃ સર્વે નાશં યાંતિ સમૂલતઃ

પ્રસાદં કુરુ મે દેવ વરાર્હોઽહમુપાગતઃ ।
એવં સ્તુતસ્તદા સૌરિર્ગ્રહરાજો મહાબલઃ

અબ્રવીચ્ચ પુનર્વાક્યં હૃષ્ટરોમા તુ ભાસ્કરિઃ ।
તુષ્ટોઽહં તવ રાજેંદ્ર સ્તવેનાનેન સુવ્રત ।
વરં બ્રૂહિ પ્રદાસ્યામિ સ્વેચ્છયા રઘુનંદન

દશરથ ઉવાચ-
અદ્યપ્રભૃતિ તે સૌરે પીડા કાર્યા ન કસ્યચિત્ ।
દેવાસુરમનુષ્યાણાં પશુપક્ષિસરીસૃપામ્

શનિરુવાચ-
ગૃહ્ણંતીતિ ગ્રહાઃ સર્વે ગ્રહાઃ પીડાકરાઃ સ્મૃતાઃ ।
અદેયં યાચિતં રાજન્કિંચિદ્યુક્તં વદામ્યહમ્

ત્વયા પ્રોક્તમિદં સ્તોત્રં યઃ પઠિષ્યતિ માનવઃ ।
એકકાલં દ્વિકાલં વા પીડામુક્તો ભવેત્ક્ષણાત્

દેવાસુરમનુષ્યાણાં સિદ્ધવિદ્યાધ્રરક્ષસામ્ ।
મૃત્યું મૃત્યુગતો દદ્યાં જન્મન્યંતે ચતુર્થકે

યઃ પુનઃ શ્રદ્ધયા યુક્તઃ શુચિર્ભૂત્વા સમાહિતઃ ।
શમીપત્રૈઃ સમભ્યર્ચ્ય પ્રતિમાં લોહજાં મમ

માષૌદનતિલૈર્મિશ્રં દદ્યાલ્લોહં ચ દક્ષિણામ્ ।
કૃષ્ણાં ગાં વૃષભં વાપિ યો વૈ દદ્યાદ્દિવજાતયે

મદ્દિને તુ વિશેષેણ સ્તોત્રેણાનેન પૂજયેત્ ।
પૂજયિત્વા જપેત્સ્તોત્રં ભૂત્વા ચૈવ કૃતાંજલિ

તસ્ય પીડા ન ચૈવાહં કરિષ્યામિ કદાચન ।
ગોચરે જન્મલગ્ને વા દશાસ્વંતર્દશાસુ ચ

રક્ષામિ સતતં તસ્ય પીડાં ચાપિ ગ્રહસ્ય ચ ।
અનેનૈવ વિધાનેન પીડામુક્તં જગદ્ભવેત્

એવં યુક્ત્યા મયા દત્તો વરસ્તે રઘુનંદન ।
વરત્રયં તુ સંપ્રાપ્ય રાજા દશરથસ્તદા

મેને કૃતાર્થમાત્માનં નમસ્કૃત્ય શનૈશ્ચરમ્ ।
શનિના ચાભ્યનુજ્ઞાતો રથમારુહ્ય વેગવાન્

સ્વસ્થાનં ગતવાન્રાજા પ્રાપ્તઃ શ્રેયોઽભવત્તદા ।
ય ઇદં પ્રાતરુત્થાય શનિવારે સ્તવં પઠેત્

પઠ્યમાનમિદં સ્તોત્રં શ્રદ્ધયા યઃ શૃણોતિ ચ ।
નરઃ સ મુચ્યતે પાપાત્સ્વર્ગલોકે મહીયતે

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયાં ઉત્તરખણ્ડે- ઉમાપતિનારદસંવાદે દશરથકૃતશનિસ્તોત્રંનામ ત્રયસ્ત્રિંશોઽધ્યાયઃ