પદ્મ પુરાણ · અધ્યાય 6.25

નારદૌવાચ-
એવં તુલસ્યા માહાત્મ્યં ત્વત્પ્રસાદાચ્છ્રુતં મયા ।
સાંપ્રતં તુ સમાચક્ષ્વ ત્રિરાત્રં તુલસીવ્રતમ્

સદાશિવ ઉવાચ-
શૃણુ વિપ્ર મહાબુદ્ધે વ્રતમેતત્પુરાતનમ્ ।
યચ્છ્રુત્વા સર્વપાપેભ્યો મુચ્યતે નાત્ર સંશયઃ

પુરા રૈભ્યંતરે કલ્પે રાજા હ્યાસીત્પ્રજાપતિઃ ।
તસ્ય ભાર્યા ચ વિખ્યાતા ચંદ્રરૂપા મહાસતી

સા વૈ વ્રતમિદં ચક્રે સર્વકામફલપ્રદમ્ ।
ત્રિરાત્રં તુ વ્રતં તસ્યા ધર્મકામાર્થ મોક્ષદમ્

સફલં જીવિતં તેષાં યૈઃ શ્રુતં તુલસીવ્રતમ્ ।
કાર્તિકે શુક્લપક્ષે તુ નવમ્યાં ચૈવ નારદ

નિયમસ્થો વ્રતી તિષ્ઠેદ્ભૂમિશાયી જિતેંદ્રિયઃ ।
વ્રતં ત્રિરાત્રમુદ્દિશ્ય શુચિઃ સંયતમાનસઃ

સ્વપેન્નિયમપૂર્વં તુ તુલસીવનસંનિધૌ ।
તતો મધ્યાહ્નસમયે નદ્યાદૌ વિમલે જલે

સ્નાનં કૃત્વા પિતૄન્દેવાંસ્તર્પયેદ્વિધિપૂર્વકમ્ ।
સુવર્ણં કારયેદ્દેવં લક્ષ્મ્યા સહ જનાર્દનમ્

વિત્તશાઠ્યં ન કર્તવ્યમાત્મનઃ શ્રેયમિચ્છતા ।
વસ્ત્રયુગ્મં તતઃ કાર્યં પીતે શુક્લેઽપિ વાસસી ।
નવગ્રહાણામારંભં શાંતિકં વિધિપૂર્વકમ્

શ્રપયિત્વા ચરું તત્ર વૈષ્ણવં હોમમાચરેત્ ।
દ્વાદશ્યાં દેવદેવેશં પૂજયિત્વા પ્રયત્નતઃ

અવ્રણં શુદ્ધકલશં સ્થાપયેદ્વિધિપૂર્વકમ્ ।
પંચરત્નસમોપેતં પલ્લવૈશ્ચોષધીયુતમ્

તસ્યોપરિન્યસેત્પાત્રે લક્ષ્મ્યા સહ જનાર્દનમ્ ।
સ્થાપયેત્તુલસીમૂલે મંત્રૈર્વેદપુરાણકૈઃ

પયસા કેવલેનૈવ સિંચયેત્તુલસીવનમ્ ।
પંચામૃતેન સંસ્નાપ્ય દેવદેવં જગદ્ગુરુમ્

યોઽનંતરૂપોઽખિલવિશ્વરૂપો ગર્ભોદકે લોકવિધિં બિભર્ત્તિ ।
પ્રસીદતામેષ સદેવ દેવો યો માયયા વિશ્વકૃદેષ દેવી

પ્રાર્થનામંત્રઃ ।
આગચ્છાચ્યુત દેવેશ તેજોરાશે જગત્પતે ।
સદૈવ તિમિરધ્વંસી પાહિ માં ભવસાગરાત્

આવાહનમંત્રઃ ।
પંચામૃતેન સુસ્નાનં તથા ગંધોદકેન ચ ।
ગંગાદીનાં ચ તોયેન સ્નાતોઽનંતઃપ્રસીદતુ

સ્નાનમંત્રઃ ।
શ્રીખંડાગુરુકર્પૂરં કુંકુમાદિવિલેપનમ્ ।
ભક્ત્યા દત્તં મયા દેવ લક્ષ્મ્યા સહ ગૃહાણ વૈ

વિલેપનમંત્રઃ ।
નારાયણ નમસ્તેઽસ્તુ નરકાર્ણવતારણ ।
ત્રૈલોક્યાધિપતે તુભ્યં દદામિ વસને શુભે

વસ્ત્રમંત્રઃ ।
દામોદર નમસ્તેસ્તુ ત્રાહિ માં ભવસાગરાત્ ।
બ્રહ્મસૂત્રં મયા દત્તં ગૃહાણ પુરુષોત્તમ

ઉપવીતમંત્રઃ ।
પુષ્પાણિ ચ સુગંધીનિ માલત્યાદીનિ વૈ પ્રભો ।
મયા દત્તાનિ દેવેશ પ્રીતિતઃ પ્રતિગૃહ્યતામ્

પુષ્પમંત્રઃ ।
નૈવેદ્યં ગૃહ્યતાં નાથ ભક્ષ્યભોજ્યૈઃ સમન્વિતમ્ ।
સર્વૈ રસૈઃ સુસંપન્નં ગૃહાણ પરમેશ્વર

નૈવેદ્યમંત્રઃ ।
પૂગાનિ નાગપત્રાણિ કર્પૂરસહિતાનિ ચ ।
મયા દત્તાનિ દેવેશ તાંબૂલં પ્રતિગૃહ્યતામ્

તાંબૂલમંત્રઃ ।
ધૂપં દત્વા ગુરું ભક્ત્યા ગુગ્ગુલં ઘૃતમિશ્રિતમ્ ।
એવં પૂજા પ્રકર્ત્તવ્યા ઘૃતેન દીપમાચરેત્

વિવિધં મુનિશાર્દૂલ દીપં કૃત્વા સમાહિતઃ ।
લક્ષ્મીનારાયણસ્યાગ્રે તુલસીવનસન્નિધૌ

અર્ઘં તત્ર પ્રદાતવ્યં દેવદેવાય ચક્રિણે ।
નવમ્યાં નાલિકેરેણ પુત્રાર્થમર્ઘમુત્તમમ્

દશમ્યાં બીજપૂરં તુ ધર્મકામાર્થસિદ્ધયે ।
એકાદશ્યાં દાડિમેન દારિદ્ર્યં નાશયેત્સદા

સપ્તધાન્યેન સંયુક્તં વંશપાત્રેણ નારદ ।
ફલસપ્તકસંયુક્તં પત્રં પૂગસમન્વિતમ્

વસ્ત્રેણાચ્છાદિતં કૃત્વા દેવસ્યાગ્રે નિવેદયેત્ ।
મંત્રેણાનેન વિપેંદ્ર શૃણુષ્વૈકાગ્રમાનસઃ

તુલસીસહિતો દેવ સદા શંખેન સંયુતમ્ ।
ગૃહાણાર્ઘં મયા દત્તં દેવદેવ નમોસ્તુતે ૨૯। અર્ઘમંત્રઃ ।
એવં સંપૂજ્ય દેવેશં લક્ષ્મ્યા સહ જનાર્દનમ્ ।
પ્રાર્થયેદ્દેવદેવેશં વ્રતસંપૂર્તિસિદ્ધયે

ઉપોષિતોઽહં દેવેશ કામક્રોધવિવર્જિતઃ ।
વ્રતેનાનેન દેવેશ ત્વમેવશરણં મમ

ગૃહીતેઽસ્મિન્વ્રતે દેવ યદપૂર્ણં કૃતં મયા ।
સર્વં તદસ્તુ સંપૂર્ણં ત્વત્પ્રસાદાજ્જનાર્દન

નમઃ કમલપત્રાક્ષ નમસ્તે જલશાયિને ।
ઇદં વ્રતં મયાચીર્ણં પ્રસાદાત્તવ કેશવ

અજ્ઞાનતિમિરધ્વંસિન્વ્રતેનાનેન કેશવ ।
પ્રસાદસુમુખો ભૂત્વા જ્ઞાનદૃષ્ટિપ્રદો ભવ

તતો જાગરણં રાત્રૌ ગીતપુસ્તકવાચનમ્ ।
નાદ નૃત્યકલાભિજ્ઞૈઃ પુણ્યાખ્યાનૈઃ સુભોભનૈઃ

વિભાતાયાં તુ શર્વર્યામુદિતે વિમલે રવૌ ।
નિમંત્ર્ય બ્રાહ્મણાન્ભક્ત્યા શ્રાદ્ધં કુર્યાચ્ચ વૈષ્ણવમ્

ભોજયિત્વા યથાકામં પાયસેન ઘૃતેન ચ ।
તાંબૂલપુષ્પગંધાદિ દક્ષિણાભિઃ સમન્વિતમ્

ઉપવીતાનિ વાસાંસિ દત્વા માલાં ચ ચંદનમ્ ।
દાંપત્યત્રિતયં ભોજ્યં વસ્ત્રભૂષણ કુંકુમૈઃ

વંશપાત્રાણિ શક્ત્યા ચ વિરૂઢૈઃ પરિપૂરયેત્ ।
નાલિકેરૈશ્ચ પક્વાન્નૈર્વસ્ત્રૈશ્ચ વિવિધૈઃ ફલૈઃ

સપત્નીકં ગુરું તત્ર વસ્ત્રાણિ પરિધાપયેત્ ।
વિભૂષણાનિ દિવ્યાનિ ગંધમાલ્યૈઃ પ્રપૂજયેત્

સર્વોપસ્કરસંયુક્તાં ગાં દદ્યાચ્ચ પયસ્વિનીમ્ ।
સદક્ષિણાં સવસ્ત્રાં ચ તન્મે નિગદતઃ શૃણુ

સર્વતીર્થેષુ યત્પુણ્યં સ્નાતાનાં જાયતે નૃણામ્ ।
તત્ફલં સ લભેત્સર્વં દેવદેવપ્રસાદતઃ

ભુક્ત્વા ચ વિપુલાન્ભોગાન્સર્વકામાન્મનોરમાન્ ।
વૈષ્ણવં પદમાપ્નોતિ અંતે વિષ્ણોઃ પ્રસાદતઃ

ઇતિ શ્રીપાદ્મેમહાપુરાણે પંચપંચાશત્સહસ્રસંહિતાયાં ઉત્તરખણ્ડે ઉમાપતિનારદસંવાદે તુલસીત્રિરાત્રવ્રતવર્ણનંનામ પંચવિંશોઽધ્યાયઃ