પદ્મ પુરાણ · અધ્યાય 6.239

રુદ્ર ઉવાચ-
પ્રહ્લાદસ્ય સુતો જજ્ઞે વિરોચન ઇતીરિતઃ ।
તસ્ય પુત્રો મહાબાર્હુબલિર્વૈશ્વાનરઃ પ્રભુઃ

સ તુ ધર્મવિદાં શ્રેષ્ઠઃ સત્યસંધો જિતેંદ્રિયઃ ।
હરેઃ પ્રિયતમો ભક્તો નિત્યં ધર્મરતઃ શુચિઃ

સ જિત્વા સકાલાન્દેવાન્સેંદ્રાંશ્ચ સમરુદ્ગણાન્ ।
ત્રીંલ્લોકાન્સ્વવશે સ્થાપ્ય રાજ્યં ચક્રે મહાબલઃ

અકૃષ્ટપચ્યા પૃથિવી બહુસસ્યફલપ્રદા ।
ગાવઃ પૂર્ણદુઘાઃ સર્વાઃ પાદપાઃ ફલપુષ્પિતાઃ

સ્વધર્મ્મનિરતાઃ સર્વે નરાઃ પાપવિવર્જિતાઃ ।
અર્ચયંતિ હૃષીકેશં સતતં વિગતજ્વરાઃ

એવં ચકાર ધર્મેણ રાજ્યં દૈત્યપતિર્બલી ।
ઇંદ્રાદિત્રિદશાસ્તસ્ય કિંકરાઃ સમુપસ્થિતાઃ

ઐશ્વર્યં ત્રિષુ લોકેષુ બુભુજે બલદર્પ્પહૃત્ ।
ભ્રષ્ટરાજ્યં સુતં દૃષ્ટ્વા તસ્યાપિ હિતકામ્યયા

કશ્યપો ભાર્યયા સાર્દ્ધં તપસ્તેપે હરિં પ્રતિ ।
અદિત્યા સહ ધર્માત્મા પયોવ્રતસમન્વિતઃ

અર્ચયામાસ દેવેશં પદ્મનાભં જનાર્દનમ્ ।
તતો વર્ષસહસ્રાણિ તેન સંપૂજિતો હરિઃ

તત્રૈવાવિરભૂત્તસ્ય દેવ્યા સહ સનાતનઃ ।
તં દૃષ્ટ્વા પુંડરીકાક્ષં શંખચક્રગદાધરમ્

ઇંદ્રનીલમણિશ્યામં સર્વાભરણભૂષિતમ્ ।
સ્ફુરત્કિરીટકેયૂરહારકુંડલશોભિતમ્

કૌસ્તુભોદ્ભાસિતોરસ્કં પીતવસ્ત્રેણ વેષ્ટિતમ્ ।
શ્રિયા સહ સમાસીનં મંડલેંદ્રે મહાત્મનિ

તં દૃષ્ટ્વા જગતામીશં હર્ષનિર્ભરચેતસા ।
પત્ન્યા સહ નમસ્કૃત્વા તુષ્ટાવ દ્વિજસત્તમઃ

કશ્યપ ઉવાચ-
નમો નમસ્તે લક્ષ્મીશ સર્વજ્ઞ જગદીશ્વર ।
સર્વાત્મન્સર્વદેવેશ સૃષ્ટિસંહારકારકઃ

અનાદિનિધનાનંતવપુષે વિશ્વધારિણે ।
નમસ્તે વેદવેદાંગ વપુષે સર્વચક્ષુષે

સર્વાત્મને નમસ્તુભ્યં નમઃ સૂક્ષ્મતરાય ચ ।
કલ્યાણગુણપૂર્ણાય યોગિધ્યેયાત્મને નમઃ

નમો યુવકુમારાય શ્રીભૂલીલાધિપાય ચ ।
નિત્યમુક્તૈકભોગાય પરધામ્નિ સ્થિતાય ચ

ચતુરાત્મન્નમસ્તુભ્યં ચતુર્વ્યૂહ નમોસ્તુ તે ।
પંચાવસ્થાય તે તુભ્યં નમસ્તે પંચમાત્મકમ્

પંચમાત્મકનિષ્ઠૈસ્તુ યોગિભિઃ પૂજ્યસે સદા ।
પંચાર્થતત્વવિદુષાં પંચસંસ્કારસંસ્થિતઃ

પંચાપરં સ્વરૂપં તે વિજ્ઞેયં સતતં હરે ।
ચતુર્ધા પરિપૂર્ણાત્મન્નિયતં કવયો વિદુઃ

ત્વત્પ્રસૂતિં જગત્સર્વં પુનંતિ તવ કિંકરાઃ ।
ત્રયીમયાઃ કર્મ્મનિષ્ઠા યે દ્વિજા ભક્તવત્સલાઃ

તેષાં દયે ક્ષણાદેવ ભવબંધવિમુક્તયે ।
નમોસ્તુ ત્રિજગદ્ધાત્રે સ્વયં ધાત્રેઽખિલાત્મને

ધાત્રે વિધાત્રે વિશ્વાય વિશ્વરૂપાય તે નમઃ ।
નારાયણાય કૃષ્ણાય વાસુદેવાય શાર્ઙ્ગિણે ।
વિષ્ણવે જિષ્ણવે તુભ્યં શુદ્ધસત્વાય તે નમઃ

મહાદેવ ઉવાચ-
ઇત્યાદિસ્તુતિભિઃ સમ્યક્સ્તૂયમાનો મહર્ષિણા ।
પ્રાહ ગંભીરયા વાચા પરિતુષ્ટો જનાર્દનઃ

શ્રીભગવાનુવાચ-
સંતુષ્ટોઽહં દ્વિજશ્રેષ્ઠ ત્વયા ભક્ત્યા સમર્ચ્ચિતઃ ।
વરં વૃણીષ્વ ભદ્રં તે કરોમિ તવ વાંછિતમ્

મહાદેવ ઉવાચ-
તતઃ પ્રાહ હૃષીકેશં ભાર્ય્યયા સહ કશ્યપઃ

કશ્યપ ઉવાચ-
પુત્રત્વં મમ દેવેશ સંપ્રાપ્ય ત્રિદશાં હિતમ્ ।
કુરુષ્વ બલિના દેવ ત્રૈલોક્યં નિર્જિતં બલાત્

ઇંદ્રસ્યાવરજો ભૂત્વા ઉપેંદ્ર ઇતિ વિશ્રુતઃ ।
યેનકેન ચ માર્ગેણ બલિં નિર્જિત્ય માયયા ।
ત્રૈલોક્યં મમ પુત્રાય દેહિ શક્રાય શાશ્વતમ્

મહાદેવ ઉવાચ-
ઇત્યુક્તસ્તેન વિપ્રેણ તથેત્યાહ જનાર્દ્દનઃ ।
સંસ્તૂયમાનસ્ત્રિદશૈસ્તત્રૈવાંતરધીયત

એતસ્મિન્નેવ કાલે તુ કશ્યપસ્ય મહાત્મનઃ ।
અદિત્યાગર્ભમાગચ્છદ્ભગવાન્ભૂતભાવનઃ

તસ્મિન્કાલે બલિર્યાગં દીર્ઘસત્રં મહાતપાઃ ।
અષ્ટમહર્ષિભિં સાર્દ્ધમારેભે તદ્વિધાનતઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે વામનપ્રાદુર્ભાવોનામૈકોનચત્વારિંશદધિકદ્વિશતતમોઽધ્યાયઃ