પદ્મ પુરાણ · અધ્યાય 6.233

શંકર ઉવાચ-
તતઃ પ્રોવાચ ભગવાન્સુરાંશ્ચૈવ મહામુનીન્ ।
દેવ્યા સહ પ્રહૃષ્ટાત્મા સર્વલોકહિતાય વૈ

શ્રીભગવાનુવાચ-
શૃણુધ્વં મુનયઃ સર્વે દેવતાશ્ચ મહાબલાઃ ।
એકાદશી મહાપુણ્યા સર્વોપદ્રવનાશિની

લક્ષ્મીસંદર્શનાર્થાય ભવદ્ભિઃ સમુપોષિતા ।
તસ્માત્તુ સર્વદા પુણ્યા દ્વાદશી મમ વલ્લભા

અદ્યપ્રભૃતિ યે લોકા ઉષિતાઃ પૂર્વવાસરે ।
દ્વાદશ્યામુદિતે ભાનૌ શ્રદ્ધયા પરયા યુતાઃ

યે પૂજયંતિ માં ભક્ત્યા તુલસ્યા ચ શ્રિયા સહ ।
સર્વે તે બન્ધ નિર્મુક્તાઃ પ્રાપ્નુવંતિ પદં મમ

નાર્ચ્ચયંતિ ચ યે વૈ માં દ્વાદશ્યાં પુરુષોત્તમમ્ ।
તે નરાઃ પાપકર્માણો મમ માયાવિમોહિતાઃ

યે નાર્ચયંતિ પાપિષ્ઠા નરા નરકગામિનઃ ।
તાન્પાપાન્વિષયૈર્વદ્ધાન્મમપૂજાપરાઙ્મુખાન્

ક્ષિપત્યજસ્રં સંસારે માયા મમ દુરત્યયા ।
રુદ્ર ઉવાચ-
એવમુક્ત્વા તુ ભગવાન્પરમાત્મા સનાતનઃ

સંસ્તૂયમાનો મુનિભિઃ પ્રયયૌ કમલાલયમ્ ।
ક્ષીરાબ્ધૌ શેષપર્ય્યઙ્કે વિમાને સૂર્ય્યસન્નિભે

દેવ્યા સહ વિશાલાક્ષ્યા રમયા પરમેશ્વરઃ ।
દર્શનાર્થં સુરાણાં ચ તત્ર સન્નિહિતોઽભવત્

તતઃ સુરગણાઃ સર્વ્વે કૂર્મ્મરૂપં સનાતનમ્ ।
ભક્ત્યા સંપૂજયિત્વાથ તુષ્ટુવુર્હૃષ્ટમાનસાઃ

તતઃ પ્રસન્નો ભવગાન્કૂર્મ્મરૂપી જનાર્દ્દનઃ ।
ભગવાનુવાચ-
વરં વૃણીધ્વં દેવેશા યદ્વો મનસિ વર્ત્તતે ।
રુદ્ર ઉવાચ-
તતો દેવગણાઃ સર્વે કૂર્મ્મરૂપં જનાર્દનમ્

ઉચુઃ પ્રાંજલયઃ સર્વ્વે હર્ષ નિર્ભરમાનસાઃ ।
દેવા ઊચુઃ-
શેષસ્ય દિગ્ગજાનાં ચ સહાયાર્થં મહાબલ

ધર્તુમર્હસિ દેવેશ સપ્તદ્વીપવતીં મહીમ્ ।
રુદ્ર ઉવાચ-
એવમસ્ત્વિતિ હૃષ્ટાત્મા ભગવાંલ્લોકભાવનઃ

ધારયામાસ ધરણીં સપ્તદ્વીપસમાવૃતામ્ ।
તતો દેવાઃ સગંધર્વા દૈત્યદાનવમાનુષાઃ

મહર્ષિભિરનુજ્ઞાતાઃ સ્વર્લોકાન્પ્રતિપેદિરે ।
તદાપ્રભૃતિ તે સર્વ્વે દેવા બ્રહ્મપુરોગમાઃ

સિદ્ધા યે માનુષાશ્ચૈવ યોગિનો મુનિસત્તમાઃ ।
વિષ્ણોરાજ્ઞાં પુરસ્કૃત્ય ભક્ત્યા પરમયા યુતાઃ

એકાદશ્યામુપોષ્યાથ ભક્ત્યા ચૈવ જનાર્દનમ્ ।
દ્વાદશ્યામર્ચ્ચનં ચક્રુર્વિધિના વરવર્ણિનિ

એતત્તુ સર્વમાખ્યાતં દેવ્યા જન્મ વરાનને ।
કૌર્મ્યં ચ વૈભવં વિષ્ણોઃ કિમન્યચ્છ્રોતુમિચ્છસિ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે એકાદશ્યુપવાસકથનંનામ ત્રયસ્ત્રિંશદધિકદ્વિશતતમોઽધ્યાયઃ