પદ્મ પુરાણ · અધ્યાય 6.214

નારદ ઉવાચ-
ઇત્યાકર્ણ્ય પિતુર્વાક્યં સ જગામ ત્વરાન્વિતઃ ।
પુણ્યં મધુવનં રાજન્ગયાશતગુણાધિકમ્

તત્તીર્થવાસિનો વિપ્રાન્સાયમામંત્ર્ય મંત્રવિત્ ।
કાલે પુનઃ સમાહૂય બભાષે સ્વાગતં વચઃ

તતઃ પ્રક્ષાલ્ય તત્પાદૌ ગંધાદ્યૈરભિપૂજ્ય ચ ।
પાદાર્ઘ્યમદદાત્પ્રીત્યા સમેન સ્વયમાચમત્

તતસ્તાન્બ્રાહ્મણાન્નીત્વા શ્રાદ્ધદેશે ન્યવેશયત્ ।
કુશાંબુ તુલસીપુષ્પ ગંધાક્ષત તિલૈઃ સહ

પૂરયિત્વા કર્મપાત્રં પુંડરીકાક્ષમસ્મરત્ ।
દેવતાભ્ય ઇતિ શ્લોકં ત્રિઃકૃત્વા સોઽપઠદ્દ્વિજઃ

સતિલં શોધિતકુશૈર્વિદધે બંધનં તતઃ ।
અગ્નિષ્વાત્તેતિ મંત્રેણ પૂર્વાદીનાં દિશાં ક્રમાત્

રક્ષોભૂતેતિ મંત્રેણ નીવીબંધં વ્યધાચ્ચ સઃ ।
તતઃ પ્રતિજ્ઞામાધાય દદૌ દ્વિજકુશાસનમ્

પિતૄન્સમાહ્વયામાસ સ તદા બ્રાહ્મણોત્તમઃ ।
દત્ત્વા તતસ્તુ હસ્તાર્ઘ્યં પાત્રં ન્યુબ્જીચકાર વૈ

કૃત્વા ગંધાદિદાનં ચ પુનઃ સવ્યેન ચાચમત્ ।
સવ્યાપસવ્યેન તદા દત્વા પાત્રાણિ સ દ્વિજઃ

તૈર્બ્રાહ્મણૈરનુજ્ઞાતશ્ચક્રેઽગ્નૌકરણં તતઃ ।
આજ્યાદિહવિષા રાજંસ્તાન્યમત્રાણ્યપૂરયત્

અનુત્તાનોત્તાનપાણિઃ કુર્વન્પાત્રાવલંબનમ્ ।
પપાઠ પાઠિતો વિપ્રૈઃ પૃથ્વી ત્વેતિ દ્વિજન્મનામ્

અસંસ્કૃતપ્રણીતાનામિતિ મંત્રેણ સ દ્વિજઃ ।
દર્ભેષુ દક્ષિણાગ્રેષુ દદૌ ચ વિકિરાસનમ્

અગ્નિદગ્ધેતિ મંત્રેણ ઘૃતમિશ્રાન્નમક્ષિપત્ ।
જલેન સહ રાજેંદ્ર વિષ્ટરે કુશકલ્પિતે

સવ્યેન પુનરાચમ્ય દદૌ ચુલકજીવનમ્ ।
તૃપ્તાઃ સ્થેતિ ચ સંપૃચ્છ્યાતૃપ્તાસ્મ પ્રતિભાષિતાઃ

શેષાન્નભોજને તેષાં જગ્રાહાજ્ઞાં દ્વિજન્મનામ્ ।
પિંડાર્થં વેદિકાં કૃત્વા વિતસ્તિપ્રમિતાં દ્વિજઃ

રેખાં ચકાર દર્ભેણ દક્ષિણાભિમુખીં નૃપ ।
યે રૂપાણીતિ મંત્રેણ દધેઽગ્નિદિશિ ચોલ્મુકમ્

પૂર્વજન્મનિ યા માતા પિતા યશ્ચ મહીપતે ।
તયોશ્ચ પિતરૌ યૌ હિ યૌ ચ રાજન્ પિતામહૌ

યઃ પ્રમાતામહશ્ચાપિ પિતરૌ રાજસત્તમ ।
પિત્રાદીન્ષટ્સપત્નીકાંસ્તાનુદ્દિશ્ય યથાવિધિ

કુશાસનાનિ દત્ત્વા વૈ દદૌ પિંડાન્ષડૈવ હિ ।
ગંધાદિભિશ્ચ સંપૂજ્ય મધ્યપિંડવિસર્જનમ્

કૃત્વાઘ્રાય ચ વામાંસે પિંડપાત્રં ન્યવેશયેત્ ।
જલપાત્રં તદાદાય વાજેવાજે પઠન્નિતિ

પાદ્યાર્ઘં ચ પુનર્દત્ત્વા દક્ષિણાદ્યૈરતૂતુષત્ ।
આદ્વારં તાનનુવ્રજ્ય તેભ્યો લબ્ધ્વાનુશાસનમ્

બુભુજે ચ સ્વયં રાજન્બાંધવૈઃ સહ સ દ્વિજઃ ।
એવં સમાપ્ય રાજેંદ્ર શ્રાદ્ધં સ દ્વિજસત્તમઃ

પૂર્વસબંધિનાં તત્ર તીર્થે મધુવને શુભે ।
યદા ચચાલ શાંતાત્મા પિતુરાશ્રમકં પ્રતિ

તદા સંમિલિતા માર્ગે સર્વે તે શ્રાદ્ધભોજિનઃ ।
વિમાનષટ્કમારૂઢા દિવ્યાભરણભૂષિતાઃ ।
દિવ્યાંબરધરા રાજન્નિત્યૂચુસ્તં દ્વિજોત્તમમ્

પિતર ઊચુઃ -
ભો વત્સ વિપ્રશાર્દૂલ વૃણીષ્વ વરમુત્તમમ્ ।
તીર્થેઽત્ર કુર્વતા શ્રાદ્ધં ભવતા તારિતા વયમ્

વયં ગણત્વમાપન્નાઃ શ્રીપતેસ્ત્વત્પ્રસાદતઃ ।
પ્રાર્થયસ્વ મહાબુદ્ધે યદિષ્ટં તવ ચેતસિ

મુનિપુત્ર ઉવાચ-
કે યૂયં કુત આયાતા ગણત્વં હિ કુતો ગતાઃ ।
ઉપકારં વિના કસ્માદ્વરં યન્મે પ્રયચ્છત

નારદ ઉવાચ-
ઇત્યાકર્ણ્યવચસ્તસ્ય પૂર્વજન્મસુતસ્ય વૈ ।
પિતા પ્રોવાચ યો દુઃખાદ્ભક્ષયિત્વા વિષં મૃતઃ

પિતોવાચ -
અહં તવ પિતા વિપ્ર પૂર્વજન્મનિ ભૂસુરઃ ।
ભાર્યયા વ્યભિચારિણ્યા માત્રા તે પીડિતા ભૃશમ્

અતીવદુઃખમાપન્નો ભક્ષયિત્વા વિષં નિશિ ।
અપમૃત્યું ગતસ્તસ્માદભવં રજનીચરઃ

એવં મન્વતરં તાત શતં પંચદશાધિકમ્ ।
વર્ષાણાં ચ વ્યતીતં તદ્રાક્ષસત્વં ગતે મયિ

ઇદાનીં ષોડશાબ્દે તુ ત્વયા શ્રાદ્ધે કૃતેઽત્ર વૈ ।
પુણ્યે મધુવને તીર્થે દેવત્વં પ્રાપ્તવાનહમ્

એતદ્વિમાનમાયાંતં સ્વર્ગાદિંદ્રપ્રણોદિતમ્ ।
સગણં સાપ્સરોવૃંદં મમારોહણહેતવે

અત્ર તુભ્યં વરં દાતું સગણઃ સાપ્સરોગણઃ ।
વિમાનવરમારુહ્ય ગચ્છન્સ્વર્ગેઽહમાગમમ્

વરં વરય ભદ્રં તે ન વિલંબસહા વયમ્ ।
ઐરાવતગજારૂઢઃ સુરેશો મામવેક્ષતે

નારદ ઉવાચ।
ઇત્યુક્ત્વા નિજવૃત્તાંતં દત્ત્વા ચ નિજસૂનવે ।
તત્પ્રાર્થિતાં હરેર્ભક્તિં જગામ સ દિવં નૃપ

અથ પ્રોવાચ તન્માતા પૂર્વજન્મસુતં ચ તમ્ ।
માતોવાચ-।
ત્વત્પ્રસાદાદહં જાતા દેવી મુક્તા ચ પાપતઃ

પ્રાપ્તં શચ્યાઃ સખીત્વં મે પાપયાપિ દ્વિજોત્તમ ।
ત્વયાત્ર વિહિતે શ્રાદ્ધે તીર્થે વિશ્રાંતિસંજ્ઞકે

પ્રાર્થયસ્વ મહાભાગ નિજચિત્તસમીહિતમ્ ।
દદામિ તે યતોઽસ્માકં દેવીનાં ન વચો મૃષા

યેન પાપેન જાતાહં ગોધા ચ પિતૃકાનને ।
નરકે ચિરમાસ્થાય તત્ત્વં વેત્સિ દ્વિજોત્તમ

અનુજાનીહિ માં પુત્ર પુલોમતનયા દિવિ ।
મામપેક્ષિતમાકાશે વૃતા દેવાંગનાગણૈઃ

નારદ ઉવાચ-
ઇત્યુક્ત્વા સાપિ તન્માતા નિષ્કામાય સ્વસૂનવે ।
યયૌ ત્રિવિષ્ટપં રાજન્શિરસા તેન વંદિતા

તતઃ પિતામહસ્તસ્ય સ્વપૌત્રં તં દ્વિજોત્તમમ્ ।
ઉવાચ વચનં ભૂયઃ હરેર્બિભ્રત્સ્વરૂપતામ્

પિતામહ ઉવાચ-
વત્સવત્સ ચિરંજીવ લભસ્વ નિજવાંચ્છિતમ્ ।
ત્વત્પ્રસાદાદ્વયં તીર્ણા દુસ્તરાદ્ભવસાગરાત્

પિતામહોઽહં તે વત્સ તવેયં ચ પિતામહી ।
મૃતં માનુગતા સાધ્વી સાલોક્યમચિરં ગતા

અદ્ય ત્વયાત્ર વિશ્રાંતૌ વિહિતે શ્રાદ્ધકર્મણિ ।
આવયોસ્તુ હરેર્લોકે લબ્ધા તસ્ય સ્વરૂપતા

નારદ ઉવાચ-
એવમુક્ત્વા તયા સાર્દ્ધં સ્વસ્ત્રિયા ભૂપસત્તમ ।
બ્રહ્મલોકમતિક્રમ્ય વૈકુંઠં સ યયૌ દ્વિજઃ

અથ પ્રોવાચ રાજેંદ્ર વચસ્તત્પ્રપિતામહઃ ।
યત્તે તત્કથયામ્યદ્ય શૃણુષ્વૈકમના દ્વિજ

પ્રપિતામહ ઉવાચ-
ભોભો વત્સ મહાભાગ તવાહં પ્રપિતામહઃ ।
ભ્રૂણહત્યાફલેનાહં શૌકરીં યોનિમાપ્તવાન્

તતો વિનિર્ગતસ્તાત શ્વાભવં પાપપીડિતઃ ।
તતઃ સ્થાવરતાં પ્રાપ્તો વિંધ્યે પર્વતસત્તમે

તત્રાપિ ચિરકાલેન સ્થિતં સ્થાવરતાં દધત્ ।
હસ્તિના કેનચિત્તાત મૂલાદુત્પાટિતો બલાત્

તસ્મિન્નેવ તતઃ કાલે ત્વયા શ્રાદ્ધમકારિ વૈ ।
અસ્મિંસ્તીર્થોત્તમે તાત મુક્તોઽહં સ્થાવરાત્તતઃ

પ્રાપ્તોઽયં યક્ષરાજસ્ય નગર્ય્યાં વાસ ઉત્તમઃ ।
દેહ્યનુજ્ઞાં દ્વિજશ્રેષ્ઠ યામિ તાં ત્વત્પ્રસાદતઃ

ત્વાં દિદૃક્ષુરિહાયાતો દૃષ્ટસ્ત્વં પુણ્યદર્શનઃ ।
તીર્થં ચ સર્વતીર્થેષુ શ્રેષ્ઠં મધુવનં મયા

નારદ ઉવાચ-
ઇત્યુક્તસ્તેન રાજેંદ્ર મુનિપુત્રઃ સ ધર્મવિત્ ।
પપ્રચ્છ શિરસા નમ્ય તં નિજં પ્રપિતામહમ્

ઋષિરુવાચ-
બ્રાહ્મણાનાં કુલે તાત જાતોઽસિ ત્વં ગરીયસિ ।
કથં વિહિતવાન્પાપં ભ્રૂણહત્યાભિધં ગુરો

યેન નિંદ્યાં સમાપન્નો ભવાન્યોનિપરં પરામ્ ।
સમાચક્ષ્વ મહાભાગ યદિ તત્સ્મૃતિરસ્તિ તે

પ્રપિતામહ ઉવાચ-
પુરાહં દ્વિજશાર્દૂલ બ્રાહ્મણસ્યેવ જન્મનિ ।
મંત્રયંત્રવિધાનેન કૃતવાન્વૃત્તિમાત્મનઃ

ધનલોભેન નારીણાં ગર્ભાર્થમહમૌષધમ્ ।
દત્તવાંશ્ચૈવ નાશાય દૈવોપહતચેતનઃ

લોભો હિ ધનહીનાનાં જનાનાં જ્ઞાનમાહરેત્ ।
શુચિકાલે દિનાધીશઃ કુલ્યાનામિવ જીવનમ્

જ્ઞાને નષ્ટે જનસ્તાત પાપમાચરતે ધ્રુવમ્ ।
પાપાન્નરકમાપ્નોતિ તતો યાતિ કુયોનિતામ્

કાચિદેકા તદા નારી ગુર્વિણી મામપૃચ્છત ।
કિં જનિષ્યામ્યહં વિપ્ર પુત્રં વેત્યથ વા સ્ત્રિયમ્

તદાહમુક્તવાંસ્તાં વૈ તવ કન્યા ભવિષ્યતિ ।
પુત્રોત્પત્તિકૃતે તુભ્યં પ્રદાસ્યામિ મહૌષધમ્

ઇત્યુક્તા ચ મયા નારી દુર્બુદ્ધિસ્ત્રીશિરોમણિઃ ।
જગ્રાહ મમ પાદૌ તુ દત્તં હેમપલં ચ મે

ઇત્યુવાચ ચ સા મહ્યં ષટ્કન્યાજનિતા મયા ।
સપ્તમીયં ત્વયા ચોક્તા જીવિષ્યે સ્યા ન જન્મનિ

તથા કુરુ મહાબુદ્ધે યથાહં વૈ ન કન્યકામ્ ।
જનયિષ્યામિ વિપ્રાન્યાં નિજપ્રાણવિનાશિનીમ્

ઇત્યાકર્ણ્ય વચસ્તસ્યાસ્તામહં પુનરુક્તવાન્ ।
પ્રસૂતિકાલે દાસ્યામિ પુત્રોત્પાદ્યહમૌષધમ્

તથેતિ સા વચો મહ્યં પ્રતિશ્રુત્ય ગતા ગૃહમ્ ।
અપેક્ષમાણા તં કાલં તસ્થૌ વાક્યપ્રતીતિકૃત્

તસ્યાં ગતાયાં ભો તાત ચિંતયા ભવમાતુરઃ ।
ઇત્યહં દ્વિજશાર્દૂલ તચ્છૃણુષ્વ વદામિ તે

પુત્રોત્પત્તિપ્રતીતેયં મહ્યં દત્તવતી પલમ્ ।
સુવર્ણસ્ય ન જાનામિ કિમસ્યાઃ સંભવિષ્યતિ

કિમત્ર કરણીયં મે કથમેતત્સુવર્ણકમ્ ।
પલપ્રમાણં તિષ્ઠેદ્વૈ દરિદ્રસ્ય ગૃહે મમ

એવં વિમૃશ્ય તદ્દાસ્યાસ્તસ્યૈ હસ્તેન દાપિતમ્ ।
ગર્ભપાતકરં તાત મયા દારુણમૌષધમ્

તેનૌષધેન તસ્યાસ્તુ ગર્ભસ્રાવેઽભવત્તદા ।
માસે તૃતીયે ન જ્ઞાતં ચિહ્નં પુરુષકન્યયોઃ

તદા સા મદ્ગૃહં પ્રાપ્તા વિષણ્ણા ગર્ભસ્રાવતઃ ।
અથાર્થયત્સુવર્ણં તન્નિરાશા પુત્રજન્મનિ

તદાહમિષ્ટકાચૂર્ણં ભસ્મના ચ સમન્વિતમ્ ।
હરિદ્રાચૂર્ણસંયુક્તં સાંબુ તસ્યૈ અદર્શયમ્

એતચ્ચૂર્ણં કૃતં માતસ્ત્વત્પુત્રોત્પત્તયે મયા ।
ત્વદ્દાનાદ્દ્વિગુણં દ્રવ્યં લગ્નમેતસ્ય સાધને

ઇત્યુક્ત્વા સા મયા તાત ત્યક્ત્વા ચૂર્ણં ગૃહં યયૌ ।
મામુક્ત્વેતિ ગૃહીષ્યામિ કાલે ત્વત્તો દ્વિજોત્તમ

એવં મયા કૃતા તાત ભ્રૂણહત્યાતિદારુણા ।
યયાતિકુત્સિતે યોનિત્રિતયે ભ્રમિતં મયા

ત્વત્પ્રસાદાદહં મુક્તઃ સાંપ્રતં સ્થાવરત્વતઃ ।
દેહ્યનુજ્ઞાં મુનિશ્રેષ્ઠ યામ્યહં હ્યલકાં શુભામ્

નારદ ઉવાચ-
એવમુક્ત્વા તુ રાજેંદ્ર તસ્ય તુ પ્રપિતામહઃ ।
તેનાભિવંદિતો મૂર્ધ્ના પ્રયયૌ દિશમુત્તરામ્

વિમાનેન વિચિત્રેણ કિંકિણીજાલમાલિના ।
નૃત્યદ્ગંધર્વજુષ્ટેન મણિપ્રાકારશોભિના

અથ તસ્ય મહારાજ વિપ્રસ્ય પ્રપિતામહી ।
ઉવાચ સ્વપ્રપૌત્રં તં વિમાનવરમાસ્થિતા

પ્રપિતામહ્યુવાચ ।
નાન્યત્ર કુત્ર ગંતાસિ પુણ્યેનાનેન સુવ્રત ।
વિના પદ્માપતેઃ પાદપદ્મચિહ્નિતમંદિરમ્

અયં મમ પતિઃ પાપો મુને ત્વત્પ્રપિતામહઃ ।
વારિતોઽપિ મયા પાપમાચચાર સુદુષ્ટધીઃ

સોઽપિ ત્વયાતિપાપાત્મા તારિતો દુઃખસાગરાત્ ।
શક્યતે કેન વૈ કર્તું તાવકં ગુણવર્ણનમ્

નારદ ઉવાચ-
ઇત્યુક્ત્વા સાપિ રાજેંદ્ર પતિલોકં જગામ હ ।
અલકાયાં ચિરં પત્યા તેનૈવ મુમુદે સહ

અથ તે મુનિપુત્રસ્ય સર્વે માતામહાદયઃ ।
સપત્નીકાઃ સમારુહ્ય વિમાનેષુ યયુર્દિવમ્

સોઽપિ દ્વિજવરસ્તસ્માત્તીર્થાત્સ્વપિતુરાશ્રમમ્ ।
ગત્વા તં સર્વવૃત્તાંતં સ્વપિત્રે સમવર્ણયત્

સોઽપિ તત્ર ગતઃ સાર્દ્ધં કુટુંબેન વને મધોઃ ।
ચકાર પર્ણશાલાં વૈ વિશ્રાંતેસ્તુ સમીપતઃ

તત્ર વિશ્રાંતતીર્થં તુ ત્રિકાલં સ્નાનમાચરન્ ।
નાકરોદ્વિષ્ણુલોકેઽપિ સ્પૃહાં સ મુનિસત્તમઃ

એકદા જલમધ્યે સ સ્નાનં કુર્વન્મુનિર્નૃપ ।
આચકાંક્ષે ચ ભવતા કદા મે હરિદર્શનમ્

એવં કામયમાનસ્ય મુનિવર્યસ્ય ભૂપતે ।
આજગામ ત્વરાયુક્તો પક્ષિરાજાસનો હરિઃ

લક્ષ્મ્યા વક્ષઃસ્થયા સાર્દ્ધં ચતુર્બાહુધરો હરિઃ ।
નવીનઘનવર્ણાંગો વિદ્યુદ્વર્ણાંબરાવૃતઃ

કૌસ્તુભોદ્ભાસિ સદ્વક્ષાઃ શંખચક્રગદાબ્જભૃત્ ।
વનમાલાલસત્કંઠો મકરાકૃતિકુંડલઃ

ફુલ્લાંબુજપલાશાક્ષઃ સ્વલકાલં કૃતાનનઃ ।
વિદ્રુમાકારકરજોરુણહસ્તાંઘ્રિસત્તલઃ

ઉવાચ તં દ્વિજશ્રેષ્ઠં દંતભાસા વિભાસયન્ ।
શરન્નિશાપતિસ્તોમ તિરસ્કારકૃતાદિશઃ

શ્રીભગવાનુવાચ-
ભોભો દ્વિજવરૈતન્મે તીર્થં મધુવનં શુભમ્ ।
વિશ્રાંતસંજ્ઞકં સ્નાનાત્સર્વકામોપપાદકમ્

અત્ર ત્વયા સ્નાનકાલે વાંછિતં મમ દર્શનમ્ ।
તુભ્યં હિ તન્મયા દત્તં બ્રહ્માદિસુરદુર્લભમ્

ત્યજ દેહમિમં વિપ્ર માનુષં દિવ્યમાપ્નુહિ ।
આયાહિ મદ્ગૃહં સાર્દ્ધં મયારુહ્ય ખગેશ્વરમ્

નારદ ઉવાચ-
ઇત્યાકર્ણ્યવચસ્તસ્ય શ્રીપતેઃ સ મુનીશ્વરઃ ।
તુષ્ટાવ પ્રણતો ભૂત્વા જલ એવ વિશાંપતે

મુનિરુવાચ-
શ્રીપતે શ્રીમદંભોજ સંમર્દિતપદાંબુજમ્ ।
ભવતો ભવતાપઘ્નં વંદે ત્રિદશવંદિતમ્

ત્વદીય માયયા નાથ મોહિતા યેઽત્ર જંતવઃ ।
તેષાં કદાચિન્નિસ્તારો ન કૃપામંતરેણ તે

સત્તીર્થસેવનાદીશ તથા સજ્જનસંગમાત્ ।
પુસાં ભક્તિસ્તુ યેષાં વૈ જાયતે કૃપયા તવ

સાધુભિર્બહુભિરીરિતં હરે યો નિશમ્ય ગુણકીર્ત્તનં તવ ।
કીર્તયત્યખિલપાપનાશનં માતૃગર્ભકુહરે સ નો પતેત્

શ્રીપતે તવ જનસ્ય માનસં દૈવતસ્તુ પતિતં મહારણે ।
ગુંઠિતં ચ રજસા જહાતિ નો નિર્મલત્વમિવ રત્નમુત્તમમ્

યઃ પુમાન્પતતિ તે પદાંબુજે દંડવત્પુલકમંગકે દધત્ ।
સોન્વયં નયતિ તાવકં પદં સ્વં ચ વાંછિતમશેષયોગિભિઃ

જીવ એવ તવ માયયા વિભો મોહિતો ભ્રમતિ વિશ્વવર્ત્મસુ ।
ત્વત્કૃપાલલિતલોચનાંચલૈસ્તત્ક્ષણં તરતિ વિશ્વવારિધિમ્

નારદ ઉવાચ-
ઇતિ સંસ્તુત્ય ગોવિંદં દંડવત્તસ્ય પાદયોઃ ।
પપાત સ મુનિશ્રેષ્ઠો જયેતિ મુહુરીરયન્

શ્રીપતિસ્તં મુનિશ્રેષ્ઠં દંડવત્પતિતં ભુવિ ।
ઉત્થાપ્ય બાહુભિસ્તૂર્ણં સુપર્ણે સમરોપયત્

તત્કુટુંબં ચ વિશ્વાત્મા વૈકુંઠં ચ જગામ હ ।
ઇત્યેતત્કથિતં રાજન્શિવે મધુવનસ્ય વૈ

મહાત્મ્યં સર્વપાપઘ્નં કિમન્યચ્છ્રોતુમિચ્છસિ ।
ય ઇદં શૃણુયાન્મર્ત્યઃ સર્વપાપૈઃ પ્રમુચ્યતે

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે કાલિંદીમાહાત્મ્યે મધુવનમાહાત્મ્યંનામ ચતુર્દશાધિકદ્વિશતતમોઽધ્યાયઃ