પદ્મ પુરાણ · અધ્યાય 6.19

યુધિષ્ઠિર ઉવાચ-
શ્રીશૈલઃ પર્વતો રમ્યઃ કુત્ર તિષ્ઠતિ નારદ ।
કિં તત્ર વર્ત્તતે તીર્થં કસ્ય દેવસ્ય પૂજનમ્ ।
કસ્યાં દિશિ સમાખ્યાતો લોકેષુ ચ વદાધુના

નારદ ઉવાચ-
શૃણુ રાજન્પ્રવક્ષ્યામિ શ્રીશૈલં પર્વતોત્તમમ્ ।
યં શ્રુત્વા મુચ્યતે લોકો બાલહત્યાદિ પાતકાત્

તત્પર્વતવનં રમ્યં મુનિભિશ્ચોપસેવિતમ્ ।
નાનાદ્રુમલતાકીર્ણં નાનાપુષ્પોપશોભિતમ્

હંસકોકિલનાદૈશ્ચ મયૂરધ્વનિનાદિતમ્ ।
શ્રીવૃક્ષૈશ્ચ કપિત્થૈશ્ચ શિરીષૈ રાજવૃક્ષકૈઃ

પારિજાતકપુષ્પૈશ્ચ કદંબોદુંબરૈસ્તથા ।
નાનાપુષ્પૈઃ સુગંધાઢ્યૈર્વાસિતં તદ્વનં ગિરૌ

સર્વાભિરૃષિપત્નીભિઃ સશિષ્યાભિઃ સુસેવિતમ્ ।
કેચિદભ્યાસયુક્તાશ્ચ કેચિદ્વ્યાખ્યાનતત્પરાઃ

કેચિદૂર્ધ્વભુજાસ્તત્ર અંગુષ્ઠાગ્રૈઃ સ્થિતાઃ પરે ।
શિવધ્યાનરતાઃ કેચિત્કેચિદ્વિષ્ણુપરાયણાઃ

નિરાહારાશ્ચ કેપ્યત્ર કેચિત્પર્ણાશને રતાઃ ।
કંદમૂલફલાહારાઃ કેચિન્મૌનવ્રતાઃ સ્થિતાઃ

એકપાદાઃ સ્થિતાઃ કેચિત્કેચિત્પદ્માસને સ્થિતાઃ ।
કેચિચ્ચૈવ નિરાહારાસ્તપસ્તેપુઃ સુદુષ્કરમ્

આશ્રમાણિ ચ પુણ્યાનિ નદ્યશ્ચ વિવિધાઃ શુભાઃ ।
દેવખાતાન્યનેકાનિ તડાગાનિ બહૂનિ ચ

પર્વતોઽયં મહારાજ દૃશ્યતે કિલ સર્વતઃ ।
મલ્લિકાર્જુનકો રાજન્યત્ર તિષ્ઠતિ નિત્યશઃ

તચ્ચૈવ શિખરં રમ્યં પર્વતોપરિ સેવિતમ્ ।
શૃંગદર્શનમાત્રેણ મુક્તિરેવ ન સંશયઃ

દક્ષિણાં દિશમાશ્રિત્ય વર્ત્તતે પર્વતોત્તમઃ ।
અત્ર ગંગા મહદ્રમ્યા પાતાલેતિ સમાશ્રિતા

તત્ર ચ સ્નાનમાત્રેણ મહાપાપૈઃ પ્રમુચ્યતે ।
શ્રીશૈલશિખરં દૃષ્ટ્વા વારાણસ્યાં મૃતૌ ધ્રુવમ્

કેદારે હ્યુદકં પીત્વા પુનર્જન્મ ન વિદ્યતે ।
તાપસાનાં મહત્સ્થાનં યોગિનાં ચ તથૈવ ચ

તસ્માત્સર્વપ્રયત્નેન દર્શનં તસ્ય કારયેત્ ।
અયં વિજ્ઞાનદેવોઽસૌ મહાપાતકનાશનઃ

સિદ્ધપુરં ચ નગરં રમ્યં સ્વર્ગસુખાવહમ્ ।
નિત્યમપ્સરસો યત્ર ગાયંતિ ચ રમંતિ ચ

અતઃ પર્વતારાજોઽયં દર્શને સૌખ્યકારકઃ ।
તસ્ય તૈર્દર્શનં કાર્યં મુક્તિમિચ્છંતિ યે નરાઃ

ઇતિ શ્રીપાદ્મે મહાપુરાણે પંચપંચાશતસહસ્રસંહિતાયાં ઉત્તરખંડે શ્રીશૈલોપાખ્યાને એકોનવિંશોઽધ્યાયઃ