પદ્મ પુરાણ · અધ્યાય 6.153

મહાદેવ ઉવાચ।
અન્યત્તીર્થં પ્રવક્ષ્યામિ દુર્દ્ધર્ષેશ્વરમુત્તમમ્ ।
યસ્ય સ્મરણમાત્રેણ પાપોઽપિ પુણ્યવાન્ભવેત્

વૃત્તે દેવાસુરે યુદ્ધે દૈત્યે ચ નિધનં ગતે ।
દુર્ધર્ષં ચ વ્રતં કૃત્વા યત્ર ભાર્ગવનંદનઃ

સમારાધ્ય મહાદેવં દુર્દ્ધર્ષં લોકકારણમ્ ।
મૃતસંજીવનીમાપ યત્ર વિદ્યાં હિ ત્ર્યંબકાત્

દૈત્યાર્થમુશનસ્તીર્થં વિખ્યાતં જગતીતલે ।
કાવ્યતીર્થે કૃતસ્નાનઃ પૂજ્ય દેવં મહેશ્વરમ્

દુર્દ્ધર્ષેશ્વરસંજ્ઞં વૈ સર્વપાપૈઃ પ્રમુચ્યતે ।
અત્ર વૃત્તં તુ શ્રોતવ્યં ત્વયા ચ નગનંદિનિ

પુરા યદાભવદ્યુદ્ધં વૃત્રવાસવયોરિહ ।
તદાસુરૈર્જિતા દેવા મઘવાન્વૈ સુરેશ્વરઃ ।
કિં કર્ત્તવ્યમિતિ ધ્યાત્વા ગતોઽસૌ તં ગુરું પ્રતિ

ઇંદ્ર ઉવાચ।
અસ્માકં ત્વં ગુરુઃ સાક્ષાદ્દેવાનાં પાલકઃ સદા ।
ઋષીણાં ત્વં વરઃ શ્રીમાન્કૃપાં કુરુ દયાનિધે

વૃત્રેણ નિર્જિતોઽહં ચ ક્વ ગચ્છામિ ચ સુવ્રત

બૃહસ્પતિરુવાચ।
શૃણુ દેવેંદ્ર વક્ષ્યામિ યેન ત્વં હિ સદા સુખી ।
મમ વાક્યં કુરુષ્વૈવ યદીચ્છેચ્છુભમાત્મનઃ

સાભ્રમત્યાં તદા ગચ્છ તત્ર ગત્વા સુખી ભવ ।
દુર્દ્ધરાખ્યો યત્ર દેવો નિત્યં તિષ્ઠતિ ભૂતિદઃ

દદાતિ વાંછિતાન્કામાન્સત્યં સત્યં સુરેશ્વર ।
ગુરોર્વચનમાકર્ણ્ય સ ગતસ્તાં નદીં પ્રતિ

તત્ર સ્નાત્વા તુ દેવેશો મહેશં તમપૂજયત્ ।
સ્નાનાચ્ચ પૂજનાદેવ સંતુષ્ટઃ શ્રીમહેશ્વરઃ

મહાદેવ ઉવાચ।
યં યં પ્રાર્થયસે નિત્યં તત્સર્વં હિ દદામ્યહમ્ ।
શ્રુત્વા વાક્યં તુ દેવેશો હ્યુવાચ પરમં વચઃ

ઇંદ્ર ઉવાચ।
ત્વં નાથઃ સર્વલોકાનાં ત્વમેવ કારણં પદમ્ ।
ત્વં હિ વિશ્વેશ્વરો દેવો સર્વદા લક્ષ્યસે મયા

યદિ ત્વં મે પ્રસન્નોઽસિ વિશ્વેશ્વર સુરેશ્વર ।
વૃત્રં હન મહાદેવ એષ કામો મહાન્મમ

મહાદેવ ઉવાચ।
તવ વાક્યાત્તુ દેવેશ વૃત્રોઽસૌ નિહતો મયા ।
મયા યદ્દીયતે શસ્ત્રં તદ્ગૃહ્ણીષ્વ સુરેશ્વર

તેનૈવ ચાસુયોગેન હનિષ્યસિ ન સંશયઃ

ઇંદ્ર ઉવાચ।
કિમસ્ત્રં વદ વિશ્વેશ યેન વૃત્રં હિ હન્મ્યહમ્ ।
વજ્રાદપ્યધિકં કિં ત્તન્નિર્મિતં તુ ત્વયા કદા

મહાદેવ ઉવાચ।
ઇદં પાશુપતં હ્યસ્ત્રં નિર્મિતં તુ મયા પુરા ।
ન દત્તં કસ્યચિચ્છક્ર તવાર્થે રક્ષિતં મયા

અત્ર સ્નાતં ત્વયા દેવ પૂજનં વૈ ત્વયા કૃતમ્ ।
અતસ્ત્વં ગૃહ્ણ મે શસ્ત્રં યેન વૃત્રં હનિષ્યસિ

શ્રીમહેશપ્રસાદાચ્ચ પ્રાપ્તં મઘવતા તતઃ ।
તેન પાશુપતાસ્ત્રેણ હતો વૃત્રો મહાબલઃ

તત્સર્વમત્ર સંજાતં દુર્દ્ધર્ષેશ પ્રસાદતઃ ।
સ્નાનમાત્રાત્તુ દેવેશિ પૂજનાદેવ સાંપ્રતમ્

તીર્થપ્રભાવાત્સંપ્રાપ્તં સત્યં સત્યં વરાનને ।
એવં જ્ઞાત્વા તુ દેવેશિ તત્ર વૈ સ્નાનમાચરેત્ ।
દર્શનં તુ મહેશસ્ય સર્વપાપપ્રણાશનમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે દુર્દ્ધર્ષેશ્વરમાહાત્મ્યંનામ ત્રિપંચાશદધિકશતતમોઽધ્યાયઃ