પદ્મ પુરાણ · અધ્યાય 6.142

શ્રીમહાદેવ ઉવાચ।
કંબુતીર્થે નરઃ સ્નાત્વા કૃત્વા વા પિતૃતર્પણમ્ ।
અર્ચયેદ્દેવદેવેશં નારાયણમનામયમ્

દત્ત્વા દાનાનિ વિધિવદ્ બ્રહ્મણેભ્યો વિધાનતઃ ।
વિષ્ણુલોકમવાપ્નોતિ તીર્થસ્યાસ્ય પ્રભાવતઃ

અત્ર રાજર્ષિણા પૂર્વં વિશ્વામિત્રેણ ધીમતા ।
તપસ્તપ્તં વિશેષેણ પ્રજાકામેન સુંદરિ

વાયુભક્ષો નિરાહારો યત્રાસીદનિલાશનઃ ।
વિષ્ણુપૂજાપરો નિત્યં વિષ્ણુધ્યાનપરાયણઃ

તપસાનેન સંજાતઃ પ્રજાકામમવાપ્તવાન્ ।
પ્રજાકામો નરો યશ્ચ કંબુતીર્થં હિ ગચ્છતિ

સ પ્રજાં લભતે નિત્યં સત્યં સત્યં વરાનને

ઇતિ કંબુતીર્થમાહાત્મ્યમ્ ।
તતો ગચ્છેત્સુરશ્રેષ્ઠે તીર્થં નામ કપીશ્વરમ્ ।
સંનિધૌ રક્તસિંહસ્ય મહાપાતકનાશનમ્

બધ્યમાને પુરા સેતૌ રામરાવણવિગ્રહે ।
ગૃહીત્વા પર્વતશ્રેષ્ઠં વિશેષાત્કપિભિઃ કૃતમ્

નામ્ના કપીશ્વરાદિત્યં ચક્રુસ્તીર્થમનુત્તમમ્ ।
યત્ર તીર્થે નરઃ સ્નાત્વા કૃત્વા વા પિતૃતર્પણમ્

દૃષ્ટ્વા કપીશ્વરાદિત્યં મુચ્યતે બ્રહ્મહત્યયા ।
તત્ર સ્નાનં પ્રકર્તવ્યં ચૈત્રાષ્ટમ્યાં વિશેષતઃ

હનુમત્પ્રમુખૈસ્તત્ર સ્નાતં યત્ર દિનત્રયમ્ ।
કપિતીર્થપ્રભાવોઽયં ભવત્યૈ સમુદીરિતઃ

અસ્મિંસ્તીર્થે નરઃ સ્નાત્વા પૂજયિત્વા કપીશ્વરમ્ ।
રૂપવાન્બહુભોગશ્ચ જાયતે નાત્ર સંશયઃ

બલં વાંછતિ યો લોકો ધર્મં વા પુત્રમેવ ચ ।
સર્વં સ તુ લભેન્નિત્યં કપિતીર્થપ્રભાવતઃ

ઇતિ શ્રીપાદ્મેમહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વર।
સંવાદે કપિતીર્થમાહાત્મ્યં નામ દ્વિચત્વારિંશદધિકશતતમોઽધ્યાયઃ