પદ્મ પુરાણ · અધ્યાય 6.134

મહાદેવ ઉવાચ।
વેત્રવત્યાસ્તુ માહાત્મ્યં વક્ષ્યામિ શૃણુ સુંદરિ ।
યત્ર સ્નાત્વા વિમુચ્યંતે યાવદાભૂતસંપ્લવમ્

વૃત્રેણ ચ કૃતઃ કૂપો મહાગંભીરસંજ્ઞકઃ ।
કૂપાત્સા નિઃસૃતા દેવી મહાપાપૌઘનાશિની

યથા ગંગા તથેયં ચ સરિચ્છ્રેષ્ઠા સુરોત્તમે ।
અસ્યા દર્શનમાત્રેણ પાપૌઘાઃ શમયંતિ ચ

શૃણુ દેવિ પ્રવક્ષ્યામિ ઇતિહાસં પુરાતનમ્ ।
યચ્છ્રુત્વા પાપિનો દોષૈર્વિમુક્તાઃ કર્મબંધનાત્

ચંપકે નગરે ચૈવ રાજા રાજ્યં કરોતિ સઃ ।
સદા દુષ્ટો દુષ્ટરૂપો જનાનાં સ પ્રપીડકઃ

અધર્મો ધર્મરૂપશ્ચ વિષ્ણુનિંદાપરાયણઃ ।
દેવ દ્વિજ નિહંતા ચ આશ્રમાણાં વિદૂષકઃ

વેદનિંદાપરઃ શ્રીમાન્મૂર્ખો વા નિર્ઘૃણઃ શઠઃ ।
અસચ્છાસ્ત્રેષુ નિરતઃ પરદારાભિમર્શકઃ

વિદારુણેતિ નામા ચ સંજાતો મૂર્ખ એવ ચ ।
કદાચિદ્દૈવયોગેન આગતસ્તાં નદીં પ્રતિ

આખેટકસમાયુક્તઃ સ્વયં કુષ્ઠી સુરેશ્વરિ ।
મહાપાપાદયં જાતો બ્રાહ્મણાનાં ચ નિંદનાત્

વૃથાવાદી દુરાત્મા ચ શઠો વૈ નિર્ઘૃણઃ પશુઃ ।
વેદનિંદારતો નિત્યં ગોશાસ્ત્રાણાં પ્રદૂષકઃ

એવંવિધો વને ભ્રામ્યંસ્તૃષાર્તઃ સ સુહૃદ્વૃતઃ ।
અશ્વાદુત્તીર્ય રાજાઽસૌ જલં પીત્વા ગૃહં ગતઃ

તેનૈવોદકપાનેન ગતં કુષ્ઠં ન સંશયઃ ।
બુદ્ધિસ્તુ નિર્મલા જાતા તસ્ય રાજ્ઞો વિશેષતઃ

વિષ્ણૌ ભક્તિઃ સમુત્પન્ના તદા તસ્ય સુરેશ્વરિ ।
તતઃ પ્રભૃતિ કાલેન સ્નાનં વૈ કૃતવાન્સદા

નિર્મલો બહુરૂપાઢ્યો જાતસ્તત્ર સુરેશ્વરિ ।
ઇહલોકે સુખં ભુક્ત્વા કૃત્વા યજ્ઞાનનેકશઃ

વિપ્રેભ્યો દક્ષિણાં દત્વા સ ગતો વૈષ્ણવં પદમ્ ।
ઇતિ જ્ઞાત્વા તુ ભો દેવિ વેત્રવત્યાં વિશેષતઃ

સ્નાનં કુર્વંતિ યે વિપ્રાસ્તે મુક્તા નગનંદિનિ ।
રાજન્યો વાથ વૈશ્યો વા શૂદ્રો વા સુરસત્તમે

યત્ર સ્નાનં પ્રકુર્વંતિ તે મુક્તાઃ પાપબંધનાત્ ।
કાર્તિકે વાઽથ માઘે વા બાહ્યો વા વેદનિંદકઃ

સરિતાં સંગમે સ્નાત્વા મુચ્યતે દેવિ કિલ્બિષાત્ ।
સાભ્રમત્યાઃ સમં યત્ર તસ્યાઃ સંગઃ પ્રદૃશ્યતે

તત્ર સ્નાત્વા વિશેષેણ મુચ્યતે બ્રહ્મહા સદા ।
ખેટકં નગરં દિવ્યં સ્વર્ગરૂપં તુ વાઽનઘે

બ્રહ્મણા તત્ર વૈ દેવિ યોગાશ્ચ બહવઃ કૃતાઃ ।
તત્ર સ્નાત્વા ચ ભુક્ત્વા ચ પુનર્જન્મ ન વિદ્યતે

સા દ્વિતીયા સ્મૃતા ગંગા કલૌ દેવિ વિશેષતઃ ।
યે નરાઃ સુખમિચ્છંતિ ધનમિચ્છંતિ યે નરાઃ

સ્વર્ગમિચ્છંતિ યે લોકાસ્તે વૈ સ્નાત્વા પુનઃપુનઃ ।
ઇહલોકે સુખં ભુક્ત્વા યાંતિ વિષ્ણોઃ સનાતનમ્

સૂર્યવંશે ચ યે જાતાઃ સોમવંશે તથૈવ ચ ।
આગતા વેત્રવત્યાં તુ સ્નાત્વા નિર્વૃતિમાગતાઃ

દર્શનાદ્ધરતે દુઃખં સ્પર્શનાન્માનસં હ્યઘમ્ ।
સ્નાત્વા ભુક્ત્વા તથા દેવિ મુક્તિભાગી ન સંશયઃ

સ્નાનાજ્જપાત્તથાહોમાદનંતં ફલમશ્નુતે ।
ગત્વા વારાણસીતીર્થં ભક્ત્યા ચાંદ્રાયણં ચરેત્

તત્ર ગત્વા મહત્પુણ્યં તત્પુણ્યં સુરસત્તમે ।
વેત્રવત્યાં વિશેષેણ પંચત્વં યદિ ગચ્છતિ

સ વૈ ચતુર્ભુજો ભૂત્વા યાતિ વિષ્ણોઃ પરં પદમ્ ।
પૃથિવ્યાં યાનિ તીર્થાનિ યે દેવાઃ પિતરસ્તથા

તે સર્વે ચ વસંતીહ વેત્રવત્યાં સુરેશ્વરિ ।
કિમન્યદ્બહુનોક્તેન ભૂયો ભૂયો વરાનને

વેત્રવત્યાઃ સમં તીર્થં પૃથિવ્યાં ન સનાતનિ ।
અહં વિષ્ણુસ્તથા બ્રહ્મા દેવાશ્ચ પરમર્ષયઃ

તિષ્ઠંતિ દેવતાઃ સર્વે વેત્રવત્યાં મહેશ્વરિ ।
એકકાલં દ્વિકાલં વા ત્રિકાલં ચ વિશેષતઃ

સ્નાનં કુર્વંતિ યે તત્ર તે વૈ મુક્તા ન સંશયઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયાં ઉત્તરખંડે વેત્રવતી માહાત્મ્યે ચતુસ્ત્રિંશાધિકશતતમોઽધ્યાયઃ