પદ્મ પુરાણ · અધ્યાય 6.112

શ્રીકૃષ્ણ ઉવાચ।
ઇતિ તદ્વચનં શ્રુત્વા પૃથુર્વિસ્મિતમાનસઃ ।
સંપૂજ્ય નારદં ભક્ત્યા વિસસર્જ તદા પ્રિયે

તસ્માદ્વ્રતત્રયં હ્યેતન્મમાતીવપ્રિયંકરમ્ ।
માઘકાર્તિકયોસ્તદ્વત્તથૈવૈકાદશીવ્રતમ્

વનસ્પતીનાં તુલસી માસાનાં કાર્તિકઃ પ્રિયઃ ।
એકાદશી તિથીનાં ચ ક્ષેત્રાણાં દ્વારકા મમ

એતેષાં સેવનં યસ્તુ કરોતિ ચ જિતેંદ્રિયઃ ।
સ મે વલ્લભતાં યાતિ ન તથા યજનાદિભિઃ

પાપેભ્યો ન ભયં તેન કર્ત્તવ્યં નિયમાદપિ ।
એતેષાં સેવનં કાંતે કુર્વતા મત્પ્રસાદતઃ

સત્યભામોવાચ।
વિસ્માપનીયં તન્નાથ યત્ત્વયા કથિતં મમ ।
પરદત્તેન પુણ્યેન કલહા મુક્તિમાગતા

ઇત્થં પ્રભાવો માસોઽયં કાર્ત્તિકસ્તે પ્રિયંકરઃ ।
સ્વામિદ્રોહાદિપાપાનિ સ્નાનદાનૈર્ગતાનિ યત્

દત્તં ચ લભતે પુણ્યં યત્પરેણ કૃતં વિભો ।
અદત્તં કેન માર્ગેણ લભતે ચાપિ માનવઃ

શ્રીકૃષ્ણ ઉવાચ।
અદત્તાન્યપિ પુણ્યાનિ પાપાનિ ચ યથા નરૈઃ ।
પ્રાપ્યંતે કર્મણા યેન તદ્યથાવન્નિશામય

દેશગ્રામકુલાનિ સ્યુર્ભાગભાંજિ કૃતાદિષુ ।
કલૌ તુ કેવલં કર્ત્તા ફલભુક્પુણ્યપાપયોઃ

અકૃતેઽપિ હિ સંસર્ગે વ્યવસ્થેયમુદાહૃતા ।
સંસર્ગાત્પુણ્યપાપાનિ યથા યાંતિ નિબોધ તત્

એકત્રમૈથુનાદ્યાનાદેકપાત્રસ્થભોજનાત્ ।
ફલાર્દ્ધં પ્રાપ્નુયાન્મર્ત્યો યથાવત્પુણ્યપાપયોઃ

અધ્યાપનાદ્યાજનાદ્વાપ્યેકપંક્ત્યશનાદપિ ।
તુર્યાંશં પુણ્યપાપાનાં નિત્યં પ્રાપ્નોતિ માનવઃ

એકાસનાદેકયાનાન્નિઃશ્વાસસ્યાંગસંગતઃ ।
ષડંશં ફલભાગી સ્યાન્નયતં પુણ્યપાપયોઃ

સ્પર્શનાદ્ભાષણાદ્વાપિ પરસ્ય સ્તવનાદપિ ।
દશાંશં પુણ્યપાપાનાં નિત્યં પ્રાપ્નોતિ માનવઃ

દર્શનશ્રવણાભ્યાં ચ મનોધ્યાનાત્તથૈવ ચ ।
પરસ્ય પુણ્યપાપાનાં શતાંશં પ્રાપ્નુયાન્નરઃ

પરસ્ય નિંદાં પૈશુન્યં ધિક્કારં ચ કરોતિ યઃ ।
તત્કૃતં પાતકં પ્રાપ્ય સ્વપુણ્યં પ્રદદાતિ સઃ

કુર્વતઃ પુણ્યકર્માણિ સેવાં યઃ કુરુતે નરઃ ।
પત્નીભૃતકશિષ્યેભ્યો યદન્યઃ કોઽપિ માનવઃ

તસ્ય સેવાનુરૂપેણ દ્રવ્યં કિંચિન્ન દીયતે ।
સોઽપિ સેવાનુરૂપેણ તત્પુણ્યફલભાગ્ભવેત્ ।
એકપંક્ત્યશ્નતાં યસ્તુ લંઘયેત્પરિવેષણમ્

તસ્ય પાપષડંશં તુ લભેદ્વૈ પરિવેષકઃ ।
સ્નાનસંધ્યાદિકં કુર્વન્યઃ સ્પૃશેદ્વા પ્રભાષતે

સ પુણ્યકર્મષષ્ઠાંશં દદ્યાત્તસ્મૈ સુનિશ્ચિતમ્ ।
ધર્મોદ્દેશેન યો દ્રવ્યમપરં યાચતે નરઃ

તત્પુણ્યકર્મજં તસ્ય ધનદસ્ત્વાપ્નુયાત્ફલમ્ ।
અપહૃત્ય પરદ્રવ્યં પુણ્યકર્મ કરોતિ યઃ

કર્મકૃત્પાપભાક્તત્ર ધનિનસ્તદ્ભવં ફલમ્ ।
નાપનુદ્ય ઋણં યસ્તુ પરસ્ય મ્રિયતે નરઃ

ધની તત્પુણ્યમાધત્તે સ્વધનસ્યાનુરૂપતઃ ।
બુદ્ધિદસ્ત્વનુમંતા ચ યશ્ચોપકરણપ્રદઃ

બલકૃચ્ચાપિ ષષ્ઠાંશં પ્રાપ્નુયાત્પુણ્યપાપયોઃ ।
પ્રજાભ્યઃ પુણ્યપાપાનાં રાજા ષષ્ઠાંશમુદ્ધરેત્

શિષ્યાદ્ગુરુઃ સ્ત્રિયો ભર્ત્તા પિતાપુત્રાત્તથૈવ ચ ।
સ્વપતેરપિ પુણ્યસ્ય યોષિદર્દ્ધમવાપ્નુયાત્

ચિત્તસ્યાનુવ્રતા શશ્વદ્વર્તતે તુષ્ટિકારિણી ।
પરહસ્તેન દાનાદિ કુર્વતઃ પુણ્યકર્મણિ

વિના ભૃતકપુત્રાભ્યાં કર્ત્તા ષષ્ઠાંશમુદ્ધરેત્ ।
વૃત્તિદો વૃત્તિસંભોક્તુઃ પુણ્યમષ્ટાંશમુદ્ધરેત્

આત્મનો વા પરસ્યાપિ યદિ સેવાં ન કારયેત્

શ્રીકૃષ્ણ ઉવાચ।
ઇત્થં હ્યદત્તાન્યપિ પુણ્યપાપાન્યા યાંતિ નિત્યં પરસંચિતાનિ ।
શૃણુષ્વ ચેમં ઇતિહાસમગ્ર્યં પુરાભવં પુણ્યમતિપ્રદં ચ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે કાર્ત્તિકમાહાત્મ્યે શ્રીકૃષ્ણસત્યભામાસંવાદે પુણ્યપાપાંશકથનંનામ દ્વાદશાધિકશતતમોઽધ્યાયઃ