પદ્મ પુરાણ · અધ્યાય 6.110

ધર્મદત્ત ઉવાચ।
જયશ્ચ વિજયશ્ચૈવ વિષ્ણોર્દ્વાસ્થૌ મયા શ્રુતૌ ।
કિંતુ તાભ્યાં પુરા ચીર્ણં યસ્માત્તદ્રૂપધારિણૌ

ગણાવૂચતુઃ।
તૃણબિંદોસ્તુ કન્યાયાં દેવહૂત્યાં પુરા દ્વિજ ।
કર્દમસ્ય તુ દૃષ્ટ્યૈવ પુત્રૌ દ્વૌ સંબભૂવતુઃ

જ્યેષ્ઠો જયઃ કનિષ્ઠોઽભૂદ્વિજયશ્ચેતિ નામતઃ ।
અન્યસ્યામભવત્પશ્ચાત્કપિલો યોગધર્મવિત્

જયશ્ચ વિજયશ્ચૈવ વિષ્ણુભક્તિરતૌ સદા ।
સંનિયમ્યેંદ્રિયગ્રામં ધર્મશીલૌ બભૂવતુઃ

નિત્યમષ્ટાક્ષરી જાપ્યૌ વિષ્ણુવ્રતકરાવુભૌ ।
સાક્ષાત્કારં દદૌ વિષ્ણુસ્તયોર્નિત્યાર્ચને સદા

મરુત્તેન કદાચિત્તાવાહૂતૌ યજ્ઞકર્મણિ ।
જગ્મતુર્યજ્ઞકુશલૌ દેવર્ષિગણસેવિતૌ

જયસ્તત્રાભવદ્બ્રહ્મા યાજકો વિજયોઽભવત્ ।
તતો યજ્ઞવિધિં કૃત્સ્નં પરિપૂર્ણં ચ ચક્રતુઃ

મરુતોઽવભૃથસ્નાતસ્તાભ્યાં વિત્તં દદૌ બહુ ।
તત્સમાદાય તૌ વિત્તં જગ્મતુઃ સ્વાશ્રમં પ્રતિ

યજનાય તદા વિષ્ણોસ્તુષ્ટ્યર્થં તૌ તદા મુને ।
તદ્ધનં વિભજંતો વૈ પસ્પર્દ્ધાતે પરસ્પરમ્

જયોઽબ્રવીત્સમો ભાગઃ ક્રિયતામિતિ તત્ર સઃ ।
વિજયશ્ચાબ્રવીત્તત્ર યલ્લબ્ધં યેન તસ્ય તત્

તતો જયોઽશપત્ક્રોધાદ્વિજયં ક્ષુબ્ધમાનસઃ ।
ગૃહીત્વા ન દદાસ્યેતત્તસ્માદ્ગ્રાહો ભવેતિ તમ્

વિજયસ્તસ્ય તં શાપં શ્રુત્વા સોઽપ્યશપચ્ચ તમ્ ।
મદભ્રાંતોશપદ્યસ્માત્તસ્માન્માતંગતાં વ્રજ

તૌ તથા ચખ્યતુર્વિષ્ણું દૃષ્ટ્વા નિત્યાર્ચને વિભુમ્ ।
શાપયોસ્તુનિવૃત્તિં તૌ યયાચાતે રમાપતિમ્

ભક્તાવાવાં કથં દેવ ગ્રાહમાંતગયોનિગૌ ।
ભવિષ્યાવઃ કૃપાસિંધો તચ્છાપો વિનિવર્ત્યતામ્

શ્રીભગવાનુવાચ।
મદ્ભક્તયોર્વચોઽસત્યં ન કદાચિદ્ભવિષ્યતિ ।
મયાપિ નાન્યથા કર્તું શક્યતે તત્કદાચન

પ્રહ્લાદવચનાત્સ્તંભઽપ્યાવિર્ભૂતો હ્યહં પુરા ।
તથાંબરીષવાક્યેન જાતો માર્ગે સ્વયં કિલ

તસ્માદ્ધ્રુવમિમૌ શાપાવનુભૂય સ્વયંકૃતૌ ।
લભેતાં મત્પદં નિત્યમિત્યુક્ત્વાંતર્દધે હરિઃ

ગણાવૂચતુઃ ।
તતસ્તૌ ગ્રાહમાતંગા બભૂતાં ગંડકી તટે ।
જાતિસ્મરૌ ચ તદ્યોન્યામપિ વિષ્ણુવ્રતે સ્થિતૌ

કદાચિત્સ ગજઃ સ્નાતું કાર્તિકે ગંડકીં ગતઃ ।
તાવજ્જગ્રાહ ચ ગ્રાહઃ સંસ્મરઞ્છાપકારણમ્

ગ્રાહગૃહીતોઽસૌ નાગઃ સંસ્માર શ્રીપતિં તદા ।
તાવદાવિરભૂદ્વિષ્ણુઃ શંખચક્રગદાધરઃ

તૄતસ્તૌ ગ્રાહમાતંગૌ ચક્રં ક્ષિપ્ત્વા સમુદ્ધૃતૌ ।
દત્ત્વા ચ નિજસારૂપ્યં વૈકુંઠમનયદ્વિભુઃ

તદાપ્રભૃતિ તત્સ્થાનં હરિક્ષેત્રમિતિ શ્રુતમ્ ।
ચક્રસંઘર્ષણાદ્યસ્મિન્પાષાણોઽપિ હિ લાંછિતઃ

તાવિમૌ વિશ્રુતૌ લોકે જયશ્ચ વિજયશ્ચ હ ।
નિત્યં વિષ્ણુપ્રિયૌ દ્વાઃસ્થૌ પૃષ્ટૌ યૌ હિ ત્વયા દ્વિજ

અતસ્ત્વમપિ ધર્મજ્ઞ નિત્યં વિષ્ણુવ્રતે સ્થિતઃ ।
ત્યક્તમાત્સર્યદંભો હિ ભવ સ્વસમદર્શનઃ

તુલામકરમેષેષુ પ્રાતઃસ્નાયી સદા ભવ ।
એકાદશીવ્રતે તિષ્ઠ તુલસીવનપાલકઃ

બ્રાહ્મણાનપિ ગાશ્ચાપિ વૈષ્ણવાંશ્ચ સદા ભજ ।
મસૂરાશ્ચારનાલાશ્ચ વૃંતાકાનપિ ખાદ મા

એવં ત્વમપિ દેહાંતે તદ્વિષ્ણોઃ પરમં પદમ્ ।
પ્રાપ્નોષિ ધર્મદત્ત ત્વં તદ્ભક્ત્યૈવ યથા વયમ્

તવાજન્મવ્રતાત્તસ્માદ્વિષ્ણુસંતુષ્ટિકારકાત્ ।
ન યજ્ઞા ન ચ દાનાનિ ન તીર્થાન્યધિકાનિ વૈ

ધન્યોઽસિ વિપ્રાગ્ર્ય યતસ્ત્વયૈતદ્વ્રતં કૃતં તુષ્ટિકરં જગદ્ગુરોઃ ।
યત્પુણ્યભાગાપ્તફલં મુરારેઃ પ્રણીયતેસ્માભિરિયં સલોકતામ્

નારદ ઉવાચ।
ઇત્થં તૌ ધર્મદત્તં તમુપદિશ્ય વિમાનગૌ ।
તયા કલહયા સાર્દ્ધં વૈકુંઠભવનં ગતૌ

ધર્મદત્તોપ્યસૌ જાતપ્રત્યયસ્તદ્વ્રતે સ્થિતઃ ।
દેહાંતે તદ્વિભોઃ સ્થાનં ભાર્યાભ્યામન્વિતોઽભ્યગાત્

ઇતિહાસમિમં પુરાભવં શૃણુતે યશ્ચ પુમાન્યથાવિધિ ।
હરિસંનિધિકારિણીં મતિં લભતેઽસૌ કૃપયા જગદ્ગુરોઃ

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તર।
ખણ્ડે કાર્તિકમાહાત્મ્યે શ્રીકૃષ્ણસત્યભામાસંવાદે કલહોપાખ્યાને ગણપૂર્વપુણ્યવર્ણનોનામ દશાધિશતતમોઽધ્યાયઃ