પદ્મ પુરાણ · અધ્યાય 6.104

નારદ ઉવાચ-
તતો જલંધરો દૃષ્ટ્વા રુદ્રમદ્ભુતવિક્રમમ્ ।
ચકાર માયયા ગૌરીં ત્ર્યબકં મોહયંસ્તદા

રથોપરિગતાં દૃષ્ટ્વા રુદંતીં ચ તદા શિવઃ ।
શુંભનિશુંભદૈત્યૈશ્ચ વધ્યમાનાં દદર્શ સઃ

ગૌરીં તથાવિધાં દૃષ્ટ્વા શિવોઽપ્યુદ્વિગ્નમાનસઃ ।
અવાઙ્મુખઃ સ્થિતસ્તૂષ્ણીં વિસ્મૃત્ય સ્વપરાક્રમમ્

તતો જલંધરો વેગાત્ત્રિભિર્વિવ્યાધ સાયકૈઃ ।
આપુંખમગ્નૈસ્તં રુદ્રં શિરસ્યુરસિ ચોદરે

તતો જજ્ઞે સ તાં માયાં વિષ્ણુના સંપ્રબોધિતઃ ।
રૌદ્રરૂપધરો જાતો જ્વાલામાલાતિભીષણઃ

તસ્યાતીવમહારૌદ્રં રૂપં દૃષ્ટ્વા મહાસુરાઃ ।
ન શેકુઃ પ્રમુખે સ્થાતું ભેજિરે ચ દિશો દશ

તતઃ શાપં દદૌ દેવસ્તયોઃ શુંભનિશુંભયોઃ ।
મમ યુદ્ધાદપક્રાંતૌ ગૌર્યાવધ્યૌ ભવિષ્યથઃ

પુનર્જલંધરો વેગાદ્વવર્ષ નિશિતૈઃ શરૈઃ ।
બાંણાંધકારસંચ્છન્નં યથા ભૂમિતલં મહત્

યાવદ્રુદ્રઃ પ્રચિચ્છેદ તસ્યબાણાંસ્ત્વરાન્વિતઃ ।
તાવત્સ પરિઘેણાશુ જઘાન વૃષભં બલી

વૃષસ્તેન પ્રહારેણ પરાવૃત્તો રણાંગણાત્ ।
રુદ્રેણાકૃષ્યમાણોઽપિ ન તસ્થૌ રણભૂમિષુ

તતઃ પરમસંક્રુદ્ધો રુદ્રો રૌદ્રવપુર્દ્ધરઃ ।
ચક્રં સુદર્શનં વેગાચ્ચિક્ષેપાદિત્યવર્ચસમ્

પ્રદહદ્રોદસી વેગાત્તદાસાદ્ય જલંધરમ્ ।
જહાર તચ્છિરઃ કાયાન્મહદાયતલોચનમ્

રથાત્કાયઃ પપાતોર્વ્યાં નાદયન્વસુધાતલમ્ ।
તેજશ્ચ નિર્ગતં દેહાત્તદ્રુદ્રે લયમાગમત્

દૃષ્ટ્વા દેહોદ્ભવં તેજસ્તદ્ગૌરીશે લયં ગતમ્ ।
અથ ચેંદ્રાદયો દેવા હર્ષાદુત્ફુલ્લલોચનાઃ

પ્રણમ્ય શિરસા રુદ્રં શશંસુર્વિષ્ણુચેષ્ટિતમ્ ।
દેવા ઊચુઃ।
મહાદેવ ત્વયા દેવા રક્ષિતાઃ શત્રુજાદ્ભયાત્

કિંચિદન્યત્સમુદ્ભૂતં તત્ર કિં કરવામહૈ ।
વૃંદાલાવણ્યસંભ્રાંતો વિષ્ણુસ્તિષ્ઠતિ મોહિતઃ

ઈશ્વર ઉવાચ।
ગચ્છધ્વં શરણં દેવા વિષ્ણોર્મોહાપનુત્તયે ।
શરણ્યાં મોહિનીં માયાં સા વઃ કાર્યં કરિષ્યતિ

નારદ ઉવાચ।
ઇત્યુક્ત્વાંતર્દધે દેવઃ સહભૂતગણૈસ્તથા ।
દેવાશ્ચ તુષ્ટુવુર્મૂલપ્રકૃતિં ભક્તવત્સલામ્

દેવા ઊચુઃ ।
યદુદ્ભવાઃ સત્વરજસ્તમોગુણાઃ સર્ગસ્થિતિધ્વંસનિદાનકારણમ્ ।
યદિચ્છયા વિશ્વમિદં ભવાભવૌ તનોતિ શુદ્ધાં પ્રકૃતિં નતાઃ સ્મ તામ્

યે હિ ત્રયોવિંશતિભેદિસંજ્ઞિતા જગત્યશેષે સમધિષ્ઠિતા પુરા ।
યદ્રૂપકર્માણિ જડાસ્ત્રયોઽપિ તે દેવા વિદુર્ન પ્રકૃતિં નતાઃ સ્મ તામ્

યદ્ભક્તિયુક્તાઃ પુરુષાસ્તુ નિત્યં દારિદ્ર્યવ્યામોહપરાભવાદિકમ્ ।
ન પ્રાપ્નુવંત્યેવ હિ ભક્તવત્સલાં સદૈવ વિષ્ણોઃ પ્રકૃતિં નતાઃ સ્મ તામ્

નારદ ઉવાચ।
સ્તોત્રમેતત્ત્રિસંધ્યં યઃ પઠેદેકાગ્રમાનસઃ ।
દારિદ્ર મોહદુઃખાનિ ન કદાચિત્સ્પૃશંતિ તમ્

ઇતિ સ્તુવંતસ્તે દેવાસ્તેજોમંડલમાસ્થિતામ્ ।
દદૃશુર્ગગને તત્ર જ્વાલાવ્યાપ્તદિગંતરામ્

તન્મધ્યાદ્ભારતીં સર્વે દદૃશુર્વ્યોમચારિણીમ્ ।
અહમેવ ત્રિધા ભિન્ના તિષ્ઠામિ ત્રિવિધૈર્ગુણૈઃ

ગૌરીલક્ષ્મીસ્વરા ચેતિ રજઃસત્ત્વતમોગુણૈઃ ।
તત્ર ગચ્છત તં કાર્યં વિધાસ્યંતિ ચ વઃ સુરાઃ

નારદ ઉવાચ-
શૃણ્વતામિતિ દેવાનામંતર્દ્ધાનમગાન્મહઃ ।
દેવાનાં વિસ્મયોત્ફુલ્લનેત્રાણાં તત્તદા નૃપ

તતઃ સર્વેઽપિ તે દેવા ગત્વા તદ્વાક્યનોદિતાઃ ।
ગૌરીં લક્ષ્મીં સ્વરાં ચૈવ પ્રણેમુર્ભક્તિતત્પરાઃ

તતસ્તાસ્તાન્સુરાન્દૃષ્ટ્વા પ્રણતાન્ભક્તવત્સલાઃ ।
બીજાનિ પ્રદદુસ્તેભ્યો વાક્યાન્યૂચુશ્ચ ભૂમિપ

દેવ્ય ઊચુઃ।
ઇમાનિ ક્ષેત્રબીજાનિ વિષ્ણુર્યત્રાવતિષ્ઠતિ ।
નિર્વપધ્વં તતઃ કાર્યં ભવતાં સિદ્ધિમેષ્યતિ

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્તિકમાહાત્મ્યે શ્રીકૃષ્ણસત્યભામાસંવાદે જાલંધરવધોનામ ચતુરધિકશતતમોઽધ્યાયઃ